Sang 1987, si Lyman Swingle, nga miembro sang Nagadumala nga Hubon sang mga Saksi ni Jehova, nagpamulongpulong sa 63,580 ka tawo nga nagtipon sa Plaza Monumental sa Valencia, Venezuela. Madamo ang nagbiyahe sa bus sing bilog nga gab-i para makapamati sa iya. Si Brother Swingle nagsiling sa madamo katama nga nagtambong: “Indi na kamo gamay nga sanga talatapan. Subong, nagdamo na kamo. Kag kon tan-awon naton ang inyo pag-uswag, sa indi madugay malab-ot man ninyo ang 100,000 ka manugbantala!”

Sang 1987, ang Venezuela may sobra 38,000 ka manugbantala, ukon mga Saksi ni Jehova nga aktibo nga nagasugid sang maayong balita sang Ginharian. Sadto nga tion, walo lamang ka pungsod ang may sobra 100,000 ka manugbantala.

Ang pagdamo sang mga Saksi ni Jehova sa bilog nga kalibutan dalayawon gid. Pagkatapos sang Bug-os Kalibutan nga Inaway I, pila lamang ka libo ang nagawali sa publiko parte sa Ginharian ni Jehova. Pero nagbag-o ini. Ang 1943 Yearbook of Jehovah’s Witnesses nagsiling: “Ang kabilugan nga report para sa 1942, bisan indi kompleto, bangod sa kakulang sang komunikasyon, ginpakamaayo gid . . . , kay ginapakita sini nga sa bilog nga kalibutan sobra na sa 106,000 ka manugbantala ang nagareport nga nagapakigbahin sa hilikuton [nga pagbantala sang maayong balita].” Bisan pa sang grabe nga kagamo sang Bug-os Kalibutan nga Inaway II, madamo nga tawo ang nagbaton sang kamatuoran sa Biblia. Sang 1950, sa United States lamang, sobra na sa 100,000 ang manugbantala.

Ang masunod nga pungsod nga nakalab-ot sa 100,000 ka manugbantala amo ang Nigeria sang 1974.

Pagkadason nga tuig, ang kadamuon sang mga manugbantala sa Brazil kag Germany sobra na sa 100,000. Ini nga pagdamo sa apat ka kontinente ebidensia nga ang kamatuoran sa Biblia makagalanyat gid sa bilog nga kalibutan.

Sa bilog nga kalibutan, ang kadamuon sang mga nagbaton sang maayong balita padayon nga nagauswag. Nagasantu ini sa gintagna sang Biblia: “Ang diutay mangin isa ka libo kag ang gamay nga pungsod mangin gamhanan. Ako, si Jehova, magapadasig sini sa nagakaigo nga tion sini.”​—Isaias 60:22.

Suno sa report para sa 2014 nga tuig sang pag-alagad, 24 na ka pungsod ang may sobra 100,000 ka Saksi. Nalakip sa sini ang Venezuela, nga nalab-ot ini nga kadamuon sang 2007. Sa bilog nga kalibutan, may 115,416 ka kongregasyon sang mga Saksi ni Jehova kag 8,201,545 ka manugbantala.