“Wala sing pagsulay nga nagaabot sa inyo nga wala maagihan sang iban. Apang ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.”—1 Corinto 10:13, Bag-ong Kalibutan nga Badbad.

 “Walay pagsulay nga nakaabut sa inyo nga indi masarangan sang tawo. Ang Dios matutum, kag indi magtugut nga sulayon kamo labaw sa inyo masarangan, kondi kaupud sang pagsulay magahatag man sing lulutsan, agod nga makasarang kamo sa pagbatas.”—1 Corinto 10:13, Ang Biblia sang Philippine Bible Society.

 Ginasugid sini nga bersikulo ang isa ka manami nga kinaiya sang Dios amo kon ngaa palangga gid naton sia. Amo ini ang iya katutom. Ang mainunungon nga mga alagad sang Dios makasalig nga buligan niya sila, ilabi na kon may ginaatubang sila nga mga kabudlayan ukon pagsulay.

 “Wala sing pagsulay nga nagaabot sa inyo nga wala maagihan sang iban.” Ang mga alagad sang Dios mahimo sulayon ukon tentaron nga maghimo sang mga butang nga nagapaakig sa iya. Ini nga mga pagsulay, mabudlay atubangon, pero madamo na nga tawo ang nakaagi sini. a Gani ang mga alagad sang Dios makasigurado nga maatubang man nila ukon mabatas ini nga mga pagtilaw.

 “Ang Dios matutom.” Si Jehova b nga Dios masaligan gid. Pirme niya ginatuman ang iya promisa nga indi niya pagbayaan ang mga tawo nga nagapalangga, nagatuman, kag matutom sa iya. (Deuteronomio 7:9; Salmo 9:10; 37:28) Gani, masaligan man sang mga nagasimba sa iya ang duha pa ka makapalig-on nga promisa sa ulihi nga bahin sini nga bersikulo.

 “Indi sia magtugot nga sulayon kamo labaw sa inyo masarangan.” Matutom gid ang Dios kay indi sia magsugot nga mangin grabe kabudlay ang mga pagtilaw asta nga imposible na ini nga mabatas sang bisan sin-o. Nahibaluan niya kon ano ang masarangan himuon ukon indi sang kada isa sa iya mga alagad.—Salmo 94:14.

 “Kon mag-abot ang pagsulay magahimo man sia sang lulutsan agod mabatas ninyo ini.” Posible nga kuhaon sang Dios ang pagtilaw ukon magahatag sia sang paagi para mabatas ini sang iya mga alagad. Halimbawa, makahatag sia sang giya paagi sa balaan nga espiritu, paumpaw halin sa Biblia, ukon praktikal nga bulig halin sa mga kauturan.—Juan 14:26; 2 Corinto 1:3, 4; Colosas 4:11.

 Ini nga bersikulo, bahin sang sulat ni apostol Pablo para sa Cristiano nga kongregasyon sa Corinto. Sa sini nga bahin sang iya sulat, ginsambit ni apostol Pablo ang kasaysayan sang dumaan nga Israel para tudluan ang mga taga-Corinto parte sa mga butang nga indi nila dapat paghimuon. (1 Corinto 10:11) Ginlista ni Pablo ang pila ka pagsulay nga naagyan sang mga Israelinhon, lakip ang pagsimba sa mga diosdios kag seksuwal nga imoralidad. (1 Corinto 10:6-10) Ang iban sa ila nadaug sini nga mga pagsulay. Base sa ila halimbawa, ginpahanumdom ni Pablo ang mga Cristiano nga indi sila dapat magkompiansa sing sobra, ukon magpensar nga indi gid sila madaug sang pagsulay. (1 Corinto 10:12) Pero, ginpasalig man niya sila paagi sa iya ginsiling sa 1 Corinto 10:13. Masarangan sang mainunungon nga mga alagad sang Dios nga mabatas ang bisan ano nga pagtilaw.

 Tan-awa ining malip-ot nga video para mahibaluan mo ang sumaryo sang Nahauna nga Sulat Para sa mga Taga-Corinto.