“Ang akon wala tupong nga kaayo bastante na para sa imo; kay ang akon gahom mapakita sing bug-os sa kaluyahon.”—2 Corinto 12:9, Bag-ong Kalibutan nga Badbad.

“Ang akon grasya amo ang kinahanglan mo, kay ang akon gahom mabatyagan mo sing labi kon ikaw maluya.”—2 Corinto 12:9, Maayong Balita nga Biblia.

Nagpromisa ang Dios nga hatagan niya si apostol Pablo sang kusog nga kinahanglan niya para mabatas ang ginaatubang niya nga mga pagtilaw kag mga limitasyon.

“Ang akon wala tupong nga kaayo bastante na para sa imo.” Ang sabat sang Dios sa sulitsulit nga pangamuyo ni Pablo puede man ma-translate nga “ang akon kaayo amo lang ang kinahanglan mo.” Buot silingon, ang wala tupong nga kaayo sang Dios bastante na nga mabuligan si Pablo para mabatas niya ang iya mga pagtilaw. Paano? Ang tinaga nga gin-translate “wala tupong nga kaayo,” ukon “grasya,” amo ang wala bayad kag wala ginpangabudlayan nga regalo nga maalwan nga ginahatag sang Dios. Ang mga sinulatan ni Pablo nagapakita nga nakabenepisyo gid sia sa wala tupong nga kaayo sang Dios. Bisan pa nga ginhingabot ni Pablo ang mga Cristiano sang una, ginhatagan sia sang Dios sang kusog nga kinahanglan niya para mabag-o ang iya paggawi kag para mabuligan ang iban nga mangin Cristiano man. (1 Corinto 15:9, 10; 1 Timoteo 1:12-14) Makasalig gid si Pablo sa bulig sang Dios nga masarangan ang bisan ano nga problema kag mga kabudlayan nga iya maatubang.

“Kay ang akon gahom mapakita sing bug-os sa kaluyahon.” Ginapahanumdom sang Ginuong Jehova a si Pablo nga mabatyagan gid ang Iya gahom kon gamiton niya ini para buligan ang maluya kag indi perpekto nga mga tawo. (2 Corinto 4:7; 12:8) Kon ginakilala sang mga Cristiano ang ila mga limitasyon kag magsalig sa bulig ni Jehova, ginatugutan nila ang gahom sang Dios nga magbulig sa ila. (Efeso 3:16; Filipos 4:13) Paagi sini, makita ang gahom sang Dios sa kaluyahon sang tawo.

Sang mga 55 C.E., gingiyahan sang Dios si Pablo nga magsulat sa mga Cristiano sa Corinto. Sa katapusan nga bahin sang iya sulat, gindepensahan niya ang iya awtoridad bilang isa ka apostol. Ginhimo niya ini bangod may pila ka nagapangangkon nga mga manunudlo nga nagpakalain sa iya. Mahimo nga ginhukman nila sia base sa iya hitsura ukon sa iya ikasarang sa paghambal.—2 Corinto 10:7-10; 11:5, 6, 13; 12:11.

Para depensahan ang iya kaugalingon, ginpaathag ni Pablo nga kon sa iya lang kaugalingon, wala sia sing kusog para mahimo ang iya ministeryo kag mabatas ang madamo nga pagtilaw. (2 Corinto 6:4; 11:23-27; 12:12) Sa kapitulo 12, ginsambit niya ang isa ka daw “tunok sa unod,” nga amo ang isa ka wala nagakadula nga kabudlayan nga nagaresulta sa pisikal ukon emosyonal nga kasakit. (2 Corinto 12:7) Bisan wala ginsambit ni Pablo kon ano ini nga kabudlayan, determinado gid sia nga batason ini sa bulig sang Dios.

Ang mga Cristiano subong mahimo man mag-atubang sang mga kabudlayan kag paghingabot. Makapaumpaw gid mahibaluan nga ang gahom sang Dios makabulig gid sa ila nga mabatas ang bisan ano nga problema nga ila maeksperiensiahan. Pareho kay Pablo, makasiling gid sila: “Kon maluya ako, mabaskog ako.”—2 Corinto 12:10.

Tan-awa ining malip-ot nga video para mahibaluan mo ang sumaryo sang Ikaduha nga Sulat Para sa mga Taga-Corinto.