“Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.”—Binuhatan 1:8, Bag-ong Kalibutan nga Badbad.

 “Magabaton kamo sing gahum kon ang Espiritu Santo mag-abut sa inyo; kag manginsaksi ko kamo sa Jerusalem kag sa bug-os nga Judea kag Samaria kag tubtub sa ukbung sang duta.”—Binuhatan 1:8, Ang Biblia sang Philippine Bible Society.

 Nagpromisa si Jesus sa iya mga sumulunod nga hatagan sila sang kusog sang balaan nga espiritu sang Dios para mahimo nila ang ila ministeryo sa pinakamalayo nga bahin sang duta.

 “Magabaton kamo sing gahom kon ang balaan nga espiritu mag-abot sa inyo.” Ginsulit ni Jesus ang iya promisa nga ginhambal niya sa iya mga disipulo nga makabaton sila sang bulig paagi sa espiritu a sang Dios sa tapos sia magbalik sa langit. (Juan 14:16, 26) Pulo ka adlaw sa tapos magkayab si Jesus sa langit sang tuig 33 C.E., ang iya mga sumulunod nakabaton sang balaan nga espiritu nga ginpromisa niya sa ila. (Binuhatan 2:1-4) Ginbuligan sila sang espiritu sang Dios nga makahambal sang sarisari nga lenguahe kag makahimo sang milagro. Ginhatagan man sila sang ikasarang nga magbantala nga may kaisog sang ila pagtuo parte kay Jesus.—Binuhatan 3:1-8; 4:33; 6:8-10; 14:3, 8-10.

 “Mangin saksi ko kamo.” Ang tinaga nga gin-translate “saksi” nagakahulugan sang “isa nga nagahatag sang testimonya” ukon “nagatestigo sa isa ka butang” base sa iya nakita ukon naeksperiensiahan mismo. Bilang mga nakasaksi sa kabuhi ni Jesus, ang mga apostoles makatestigo sa mga natabo sa iya ministeryo kag pati man sa iya kamatayon kag pagkabanhaw. (Binuhatan 2:32; 3:15; 5:32; 10:39) Ang ila masaligan gid nga testimonya nagpakumbinsi sa madamo nga si Jesus amo ang Cristo, ang ginpromisa nga Mesias. (Binuhatan 2:32-36, 41) Ang mga nagpati sa mga apostoles nangin mga saksi ni Jesus, kag dayon, sila man, nagbantala sa iban parte sa kabuhi, kamatayon, kag pagkabanhaw ni Jesus.—Binuhatan 17:2, 3; 18:5.

 “Tubtob sa pinakamalayo nga bahin sang duta.” Ini nga ekspresyon puede man i-translate nga “sa ukbong sang duta” ukon “sa iban nga mga pungsod.” Ginapakita sang ginsiling ni Jesus nga malayo ang malab-utan sang iya mga sumulunod para mangin saksi niya. Mas malayo pa sangsa Judea kag Samaria ang ila makadtuan para sugiran ang iban parte sa ila mga ginapatihan. Ang matuod, mas malapad nga teritoryo kag mas madamo nga tawo ang ila mabantalaan sangsa nahimo ni Jesus. (Mateo 28:19; Juan 14:12) Halos 30 ka tuig sa tapos ginhambal ini ni Jesus, si apostol Pablo nagsulat nga ang maayong balita parte kay Jesus “ginbantala sa tanan nga tinuga sa idalom sang langit,” bisan sa malayo nga mga lugar pareho sang Roma, Partia (southeast sang Caspian Sea), kag sa North Africa.—Colosas 1:23; Binuhatan 2:5, 9-11.

 Ang libro sang Mga Binuhatan nag-umpisa paagi sa pagsugid sang pareho nga hitabo nga narekord sa katapusan sang Ebanghelyo ni Lucas. (Lucas 24:44-49; Binuhatan 1:4, 5) Ang nagsulat sini amo si disipulo Lucas, ginsugdan niya ini nga rekord paagi sa pagsugid kon paano nagpakita si Jesus sa iya mga sumulunod pagkatapos sia mabanhaw. (Binuhatan 1:1-3) Ginsugid niya man kon paano natukod ang Cristianong kongregasyon kag kon paano ini nag-uswag halin sang 33 C.E. asta mga 61 C.E.—Binuhatan 11:26.

 Ang konteksto sang Binuhatan 1:8 nagapakita kon paano ang mga sumulunod ni Jesus nagpalibog kon bala magagahom si Jesus bilang Hari sa Ginharian sang Dios sa ila tion. (Binuhatan 1:6) Bilang sabat, ginsilingan sila ni Jesus nga indi gid magkabalaka parte sa kon san-o matukod ang Ginharian. (Binuhatan 1:7) Kundi, dapat magpokus ang iya mga sumulunod sa pagpanaksi parte kay Jesus “sa pinakamalayo nga bahin sang duta.” (Binuhatan 1:8) Amo man sini ang ginahimo sang mga Cristiano subong, ginabantala man nila sing mapisan ang maayong balita parte sa Ginharian sang Dios.—Mateo 24:14.

 Tan-awa ining malip-ot nga video para mahibaluan mo ang sumaryo sang libro sang Mga Binuhatan.