“Sa tanan nga butang may kusog ako paagi sa isa nga nagapabakod sa akon.”—Filipos 4:13, Bag-ong Kalibutan nga Badbad.

 “Masarangan ko nga atubangon ang bisan ano nga kahimtangan paagi sa bulig ni Cristo nga nagapabakod sa akon.”—Filipos 4:13, Ang Pulong sang Dios.

 Ining ginsulat ni apostol Pablo, nagapasalig sa mga nagasimba sa Dios nga makabaton sila sing kusog para matuman nila ang Iya kabubut-on.

 Ang pila ka translation sang Biblia nagsiling nga ang Cristo amo ang nagahatag sing kusog kay Pablo. Pero, ang tinaga nga “Cristo” indi makita sa pinakadaan nga Griego nga mga manuskrito. Gani, ang pila ka moderno nga translation sang Biblia naggamit sing mga tinaga nga “sa isa nga nagapabakod sa akon” (Bag-ong Kalibutan nga Badbad), “sa iya nga nagapabakod sa akon” (Ang Biblia sang Philippine Bible Society), kag “sa iya nga amo ang ginhalinan sang akon kusog” (New American Bible). Ti, sin-o gid man ang ginatumod ni Pablo?

 Kon ibase naton sa mga bersikulo antes sining ginsiling ni Pablo, makasiling kita nga ang ginatumod ni Pablo amo ang Dios. (Filipos 4:6, 7, 10) Antes sining ginsiling ni Pablo, pero sa amo gihapon nga sulat, nagsulat sia sa mga taga-Filipos: “Ang Dios amo ang isa nga nagapapagsik sa inyo, nga nagahatag sa inyo sang . . . kusog nga himuon kon ano ang iya nahamut-an.” (Filipos 2:13) Kag sa 2 Corinto 4:7, nagsulat sia nga ang Dios amo ang naghatag sa iya sing gahom para mahimo niya ang iya ministeryo. (Ipaanggid ang 2 Timoteo 1:8.) Gani, maathag nga makasiling kita nga ang ginatumod ni Pablo nga “sa isa nga nagapabakod sa akon” amo ang Dios.

 Ano ang buot silingon ni Pablo sang nagsulat sia nga may kusog sia “sa tanan nga butang”? Ang mga butang nga ginatumod ni Pablo amo ang sarisari nga sitwasyon nga iya naeksperiensiahan sa paghimo sang kabubut-on sang Dios. Bastante man ukon indi ang kinahanglanon ni Pablo, nagsalig gid sia nga amanan sia sang Dios. Bangod sini, natun-an ni Pablo nga mangin kontento bisan ano man ang iya sitwasyon.—2 Corinto 11:23-27; Filipos 4:11.

 Makapalig-on gid para sa mga nagasimba sa Dios subong ang mga ginsiling ni Pablo. Hatagan sila sang Dios sing kusog para mabatas nila ang ila kabudlayan kag para mahimo nila ang iya kabubut-on. Pabakuron sila sang Dios paagi sa iya balaan nga espiritu, ukon aktibo nga puersa. Mahimo man sila pabakuron sang Dios paagi sa ila mga kauturan kag sa iya Pulong, ang Biblia.—Lucas 11:13; Binuhatan 14:21, 22; Hebreo 4:12.

 Ining ginsiling ni Pablo nalakip sa iya katapusan nga sulat para sa mga Cristiano sa Filipos. Ginhimo niya ini nga sulat sang mga 60-61 C.E., sang una nga bes nga ginpriso sia sa Roma. May mga tion nga wala nasuportahan sang mga Cristiano sa Filipos si Pablo sa iya mga kinahanglanon. Pero sang tion nga ginpriso si Pablo, ginapadal-an sia nila sing mga dulot para suportahan ang iya mga kinahanglanon.—Filipos 4:10, 14.

 Ginpasalamatan ni Pablo ang kaalwan sang mga Cristiano sa Filipos kag ginpasalig sila nga bastante ang iya mga kinahanglanon. (Filipos 4:18) Gingamit man niya ini nga kahigayunan para isugid sa ila ang importante nga kamatuoran parte sa kabuhi sang isa ka Cristiano: Mahimo mangin kontento ang tanan nga Cristiano, bisan manggaranon man sila ukon pigado, kon magsalig sila sa bulig sang Dios.—Filipos 4:12.