“Sa katapusan, mga kauturan, padayon ninyo nga hunahunaa ang bisan ano nga butang nga matuod, serioso, matarong, matinlo, hiligugmaon, dungganon, maayo, kag dalayawon.”—Filipos 4:8, Bag-ong Kalibutan nga Badbad.

 “Sa katapusan, mga utod, ang bisan ano nga matuod, halangdon, matarong, putli, hiligugmaon, dalayawon, ang bisan ano nga labing maayo kag takus dayawon – ini tanan ang hunahonaon ninyo.”—Filipos 4:8, Biblia sang Katilingban sang mga Kristiano.

 Interesado ang Dios sa ginahunahuna sang mga tawo, ilabi na bangod sa masami ginahimo naton kon ano ang aton ginapensar. (Salmo 19:14; Marcos 7:20-23) Gani, kon gusto sang mga tawo nga malipay ang Dios sa ila, ginalikawan nila nga magpensar sang mga butang nga malain sa pagtan-aw sang Dios. Sa baylo, ginapensar nila ang mga butang nga makapalipay sa iya.

 Ini nga bersikulo nagsambit sang walo ka maayo nga mga butang nga dapat ‘padayon nga hunahunaon’ ukon pirme pensaron sang isa ka Cristiano.

•   “Matuod.” Amo ini ang mga butang nga maayo kag masaligan, pareho sang impormasyon nga makita sa Pulong sang Dios, ang Biblia.—1 Timoteo 6:20.

•   “Serioso.” Amo ini ang mga butang nga importante. Indi ini witiwiti ukon wala sing pulos nga mga butang. Kon serioso nga mga butang ang ginapamensar pirme sang isa ka Cristiano makabulig ini sa iya nga mangin determinado nga himuon ang insakto.—Tito 2:6-8.

•   “Matarong.” Ini nga tinaga nagapatuhoy sa mga plano kag mga buhat nga insakto base sa mga pagsulundan sang Dios kag indi suno sa limitado nga kaalam sang tawo.—Hulubaton 3:5, 6; 14:12.

•   “Matinlo.” Ginapahangop sini nga tinaga ang mga panghunahuna kag motibo nga matinlo kag balaan, indi lang sa seksuwal nga mga butang kundi sa tanan nga bagay.—2 Corinto 11:3.

•   “Hiligugmaon.” Ini nga tinaga nagapatuhoy sa mga butang nga maayo, nga nagapahulag sa aton nga magpalangga imbes nga magdumot, maghinakit, ukon makig-away.—1 Pedro 4:8.

•   “Dungganon.” Ini nga tinaga nagapatuhoy sa mga butang nga nagapanami sang reputasyon sang isa ka tawo kag gusto man ini sang mga tawo nga nagarespeto sa Dios.—Hulubaton 22:1.

•   “Maayo.” Nagapatuhoy ini sa mga prinsipio kag mga pagpati nga nabase sa mga pagsulundan sang Dios. Maayo gid ini nga mga butang.—2 Pedro 1:5, 9.

•   “Dalayawon.” Ginapatuhuyan sini ang dalayawon nga mga butang, ilabi na sa panan-aw sang Dios. Nalakip man sa sini ang dalayawon nga mga hinimuan sang Dios, nga dapat hunahunaon sang mga tawo.—Salmo 78:4.

 Sang ginhimo ni apostol Pablo ini nga sulat para sa mga Cristiano sa Filipos, naka-house arrest sia sa Roma. Pero bisan amo sina ang iya sitwasyon, ang mga Bible commentator nagsiling nga ang iya sulat, isa ka “sulat nga puno sang kalipay” bangod mabasa sa sini ang mga tinaga parte sa kalipay kag pagpalangga.—Filipos 1:3, 4, 7, 8, 18; 3:1; 4:1, 4, 10.

 Palangga gid ni Pablo ang iya mga kauturan sa Filipos, kag gusto niya nga mabatyagan man nila ang kalipay kag kalinong nga iya nabatyagan. (Filipos 2:17, 18) Gani sa hingapusan sang iya sulat, ginpalig-on niya sila nga tinguhaan nga ipakita pirme ang kalipay, mangin makatarunganon, magsalig sa Dios paagi sa pangamuyo, kag pirme hunahunaon ang mga butang nga makahatag sang kalinong kag sang paghidait halin sa Dios.—Filipos 4:4-9.

 Tan-awa ining malip-ot nga video para mahibaluan mo ang sumaryo sang libro sang Filipos.