“Dayon nagsiling ang Dios: ‘Mahimo kita sing tawo suno sa larawan naton kag kaangay naton, kag magagahom sila sa mga isda sa dagat kag sa mga pispis kag sa mahagop nga mga sapat kag sa bug-os nga duta kag sa tanan nga sapat nga nagakamang sa duta.’”—Genesis 1:26, Bag-ong Kalibutan nga Badbad.

 “Niyan ang Dios nagsiling, ‘Himoon ta ang tawo sa dagway naton, sono sa kaangay naton; kag pagahumon sila sa kaisdaan sang dagat, kag sa kapispisan sang kahanginan, kag sa kahayupan, kag sa bug-os nga duta, kag sa tagsa ka butang nga nagasaug sa duta.’”—Genesis 1:26, Ang Biblia sang Philippine Bible Society.

 Ang mga tawo gintuga sa larawan sang Dios, gani matun-an nila kag mapakita ang mga kinaiya sang Dios pareho sang gugma, empatiya, kag hustisya. Amo ini ang rason kon ngaa ang mga tawo makailog sang personalidad sang Dios.

 “Nagsiling ang Dios: ‘Mahimo kita sing tawo suno sa larawan naton.’” Antes ginhimo ni Jehova nga Dios a ang bisan sin-o ukon ang bisan ano, nagtuga sia anay sang isa ka gamhanan nga anghel nga nakilala nga si Jesus. Paagi kay Jesus, “gintuga ang tanan iban pa nga butang sa langit kag sa duta.” (Colosas 1:16) Ginpakita ni Jesus ang personalidad ni Jehova—“sia amo ang larawan sang dimakita nga Dios.” (Colosas 1:15) Gani makasiling gid ang Dios kay Jesus: “Mahimo kita sing tawo suno sa larawan naton.”

 “Magagahom sila sa . . . mga sapat kag sa bug-os nga duta.” Ang mga sapat wala gintuga sa larawan sang Dios. Wala sila gindesinyo nga magpakita sang mga kinaiya sang mga tawo pareho sang gugma kag wala man sila sing konsiensia. Pero palangga gihapon sang Dios ang mga sapat. Amo kon ngaa nga nagsiling sia nga dapat “maggahom” ang mga tawo sa sapat, isa ka sugo nga nagakahulugan man nga “magadumala” (Biblia sang Katilingban sang mga Kristiano). Gani ginhatagan ni Jehova sing responsibilidad ang mga tawo nga atipanon ang mga sapat. (Salmo 8:6-8; Hulubaton 12:10) Ginapaabot ni Jehova nga atipanon gid sing maayo sang mga tawo ang duta kag ang tanan nga nagakabuhi sa sini.

 Ang una nga duha ka kapitulo sang Genesis nagalaragway sang pagtuga sang uniberso, sang aton planeta, kag sang kabuhi sa duta. Ang tanan nga gintuga ni Jehova makatilingala, pero ang mga tawo amo ang pinasahi gid nga tinuga niya sa duta. Sang natapos sang Dios ang iya pagpanuga, “nakita niya nga maayo gid ini.”—Genesis 1:31.

 Tan-awa ining malip-ot nga video para mahibaluan mo ang kasaysayan sang pagpanuga sa Genesis.

 Sala nga pagpati: Ang Genesis 1:26 nagapamatuod nga si Jesus amo ang Dios.

 Ang matuod: Ang Dios kag si Jesus may suod nga kaangtanan bilang mag-amay, pero indi sila isa ka persona. Nagtudlo si Jesus nga mas labaw ang Dios sa iya. (Juan 14:28) Para sa dugang nga impormasyon, tan-awa ang video nga Dios Bala si Jesucristo? ukon basaha ang artikulo nga “Ngaa Gintawag si Jesus nga Anak sang Dios?”

 Tan-awa ining malip-ot nga video para mahibaluan mo ang sumaryo sang libro sang Genesis.