Ang matuod nga mga abyan masaligan. Daw pareho sila sa mga utod nga nagaunong kag nagapalangga sa imo ilabi na sa tion sang kabudlayan.

 “Ang matuod nga abyan nagahigugma sa tanan nga tion.” Ini nga ekspresyon nagakahulugan man nga “ang mga abyan pirme nagapakita sang ila pagpalangga.” Ang Hebreo nga tinaga para sa “gugma” nga gingamit sa sini nga ekspresyon indi lang basta isa ka balatyagon para sa isa ka tawo. Isa ini ka sinsero nga gugma nga ginapakita indi lang paagi sa hambal, kundi paagi man sa aksion. (1 Corinto 13:4-7) Ang mga mag-abyan nga may amo sini nga klase sang gugma nagaunungay bisan pa naglainay ang ila buot ukon may mga problema sila. Handa sila nga patawaron ang isa kag isa. (Hulubaton 10:12) Kag ang isa ka abyan wala nagakahisa kon may matabo nga maayo sa iya abyan, kundi nalipay sia para sa iya.—Roma 12:15.

 “Ang matuod nga abyan . . . isa ka utod nga masaligan sa tion sang kalisdanan.” Ini nga hulubaton nabase sa realidad nga ang mag-ulutod close gid sa isa kag isa. Gani kon ginabuligan naton ang isa ka abyan nga may problema, daw pareho lang nga nangin utod kita para sa iya. Ang aton relasyon bilang mag-abyan indi basta-basta mapaluya sang mga pagtilaw. Kundi mas nagabakod pa gid ini bangod sa aton gugma kag respeto sa isa kag isa.

 Mabasa mo sa libro sang Mga Hulubaton ang simple pero makapahunahuna nga mga hulubaton kag madamo ka sing matun-an sa sini. Ang kalabanan nga bahin sining libro sang Biblia ginsulat ni Hari Solomon. Ang iya paagi sang pagsulat pareho sang Hebreo nga mga binalaybay. Imbes nga maggamit sang rhyme, naggamit sia sang parallel nga mga ideya diin ang ikaduha nga linya nagasuporta sa una nga linya. Naggamit man sia sang contrasting ukon magkatuhay nga ideya. Ang Hulubaton 17:17 isa ka halimbawa sang parallel nga binalaybay, kon sa diin ang ikaduha nga linya nagasuporta sa una nga linya. Ang Hulubaton 18:24 isa ka halimbawa sang magkatuhay nga ideya. “May mga magkaupod nga handa maghalit sa isa kag isa, apang may abyan nga mas suod pa sangsa isa ka utod.”

 Sang ginsulat ni Solomon ang Hulubaton 17:17, posible ginapamensar niya ang pag-abyanay sang iya amay nga si David kag ni Jonatan nga anak ni Hari Saul. (1 Samuel 13:16; 18:1; 19:1-3; 20:30-34, 41, 42; 23:16-18) Bisan pa si David kag si Jonatan indi paryentihanay, mas close pa sila sangsa mag-utod. Ginrisgo pa gani ni Jonatan ang iya kabuhi para sa iya bataon nga abyan. a

 “Ang abyan nagahigugma sa tanan nga tion. Ano ang pulos sang mga mag-utod kon wala sila nagabinuligay sa kalisdanan?”—Maayong Balita nga Biblia.

 “Ang isa ka abyan nagahigugma sa tanan nga tion, kag ang mag-utod ginabun-ag sa pag-ambit sang kahul-anan.”—Biblia sang Katilingban sang mga Kristiano.

 “Ang isa ka abyan nagahigugma sa imo sa tanan nga tion, kag ang katuyuan nga may paryente ka amo nga agod may magbulig sa imo sa tion sang kalisod.”—Ang Pulong sang Dios.

 Tan-awa ining malip-ot nga video para mahibaluan mo ang sumaryo sang libro sang Mga Hulubaton.