“Hanasa ang bata sa husto nga dalanon; bisan magtigulang na sia indi sia magtalikod sa sini.”—Hulubaton 22:6, Bag-ong Kalibutan nga Badbad.

 “Hanasa ang bata sa dalanon nga dapat niya paglaktan, kag bisan tigulang na sia indi sia magtalikod sa sini.”—Hulubaton 22:6, Ang Biblia sang Philippine Bible Society.

 Kon ginatudluan sang mga ginikanan ang ila kabataan nga palanggaon ang Dios kag sundon ang iya mga kasuguan mapaabot sang mga ginikanan nga ini nga paghanas makabulig sa ila mga bata sa bilog nila nga kabuhi.

 “Hanasa ang bata sa husto nga dalanon.” Ini nga mga tinaga puede man i-translate nga “palakta ang bata sa husto nga dalan.” Sulitsulit nga ginapalig-on sang libro sang Hulubaton ang mga ginikanan nga tudluan ang ila kabataan sang husto kag sala samtang bata pa. (Hulubaton 19:18; 22:15; 29:15) Pero naintiendihan sang mapinalanggaon nga mga ginikanan nga pareho sa mga adulto, ang ila mga bata may kahilwayan man sa pagdesisyon. Gani imbes nga tudluan lang ang ila mga bata kon ano ang himuon, nagapangatarungan sila sa ila mga bata kag ginabuligan sila nga maghamtong para mangin responsable nga mga adulto nga makahimo sang maayo nga mga desisyon.—Deuteronomio 6:6, 7; Colosas 3:21.

 Ang pila ka scholar sa Biblia nagsiling nga ang kahulugan sini nga ekspresyon amo ang “paghanas sa bata suno sa iya naandan,” ukon pamatasan. Daw praktikal man ini nga paathag, pero ang Hebreo nga ekspresyon nga gin-translate “sa husto nga dalanon” mahimo nagapatuhoy sa maayo kag matarong nga pagkabuhi. Ginapakita sang libro sang Hulubaton nga may duha ka dalan nga puede pilian sang isa ka tawo. Ang isa ginatawag “ang dalanon sang maayo nga mga tawo,” “dalanon sang kaalam,” kag “husto nga dalanon.” (Hulubaton 2:20; 4:11; 23:19) Ang isa naman ginatawag “dalanon sang mga malaut,” kag “sala nga dalanon.” (Hulubaton 4:14; 16:29) Gani ang ginapatuhuyan sang “husto nga dalanon” amo ang dalan sang kabuhi nga ginatudlo sang Pulong sang Dios, ang Biblia.—Salmo 119:105.

 “Bisan magtigulang na sia indi sia magtalikod sa sini.” Kon tudluan sang mga ginikanan ang ila kabataan sang talaksan sang Dios sa moral, labanlaban nga magapabilin sia sa husto nga dalan sa bilog niya nga kabuhi. Pero, indi buot silingon sini nga ang bata nga ginhanas sing maayo, indi na gid “magtalikod” sa husto nga dalan ukon maglisa sa dalanon sang Dios. Halimbawa, kon ang isa ka tawo pirme nagapakig-upod sa mga tawo nga nanamian maghimo sang malain, posible nga biyaan niya ang “matarong nga mga banas” kag himuon ang malain. (Hulubaton 2:12-16; 1 Corinto 15:33.) Bisan pa matabo ini, kon ginahanas sang mga ginikanan ang ila kabataan nga sundon ang mga kasuguan sang Dios, amo gid ini ang pinakamaayo nga mahimo nila para mangin madinalag-on sa kabuhi ang ila mga bata.—Hulubaton 2:1, 11.

 Ang kapitulo 22 sang Hulubaton nagaunod sang malip-ot nga mga hambalanon nga nagabulig sa aton nga masunod ang kaalam sang Dios sa sarisari nga sitwasyon sa aton kabuhi. Ginapadaku sini nga mga hambalanon ang importansia sang maayo nga reputasyon kay Jehova, a nga mabaton sang isa ka tawo kon mangin mapainubuson sia, maalwan, kag mapisan. (Hulubaton 22:1, 4, 9, 29) Ang iban naman nga mga bersikulo nagapakita nga may malain nga epekto kon indi pagsundon sang mga tawo ang mga sugo sang Dios kag kon tratuhon nila sing indi maayo ang mga pigado.—Hulubaton 22:8, 16, 22-27.

 Bisan pa nga ang kalabanan nga mga bersikulo sa Hulubaton kapitulo 22 indi parte sa paghanas sa bata, ginapakita sini ang dalanon sang pagkabuhi nga makahatag sang matuod nga kalipay kag makapalipay man sa Dios. (Hulubaton 22:17-19) Kon ginahanas sang mga ginikanan ang ila kabataan nga sundon ini nga dalanon sa ila kabuhi, ginapakita nila nga gusto gid nila ang pinakamaayo sa ila kabataan.—Efeso 6:1-3.

 Tan-awa ining malip-ot nga video para mahibaluan mo ang sumaryo sa libro sang Hulubaton.