“Amligan mo ang mga nagasalig sa imo sing bug-os; hatagan mo sila sing dayon nga paghidait, bangod nagasalig sila sa imo.”—Isaias 26:3, Bag-ong Kalibutan nga Badbad.

 “Ikaw magatipig sa iya sa himpit nga paghidait, nga ang iya hunahuna natuhoy sa imo, bangud nga nagasalig sia sa imo.”—Isaias 26:3, Ang Biblia sang Philippine Bible Society.

 Paagi sa sini nga mga tinaga, ginapasalig ni propeta Isaias nga ginaproteksionan sang Dios ang mga nagasalig gid sa Iya. Ginahimo niya ini paagi sa pagbulig sa ila nga makabatyag sing kalig-unan kag paghidait.

 “Amligan mo ang mga nagasalig sa imo sing bug-os.” Ini nga bahin sang bersikulo nagalaragway sa mga determinado gid nga magsalig kay Jehova a nga Dios sa tanan nga tion. Ang mga nagasalig sa Dios nakahibalo nga kinahanglan nila magsandig sa iya. Halimbawa, wala sila nagasalig sa ila kaugalingon nga panghunahuna kon nagahimo sila sang importante nga mga desisyon, kundi ginabase nila ang tanan nila nga ginahimo sa panghunahuna sang Dios. (Hulubaton 3:5, 6) Ginahibalo nila ang pagtan-aw sang Dios sa isa ka sitwasyon paagi sa pagbasa sing maayo sang iya Pulong, ang Biblia, kag sa pagpamensar sing maayo sang ila ginabasa. (Salmo 1:2; 119:15) Kon makaatubang sila sang mabudlay nga sitwasyon, nagapangamuyo sila kay Jehova para magpangayo sing bulig. (Salmo 37:5; 55:22) Kon ginahimo nila ini, ginapakita nila nga nagasalig sila sa Dios, kag bilang resulta, hatagan niya sila sang paghidait.

 “Hatagan mo sila sing dayon nga paghidait.” Sa orihinal nga Hebreo, ang tinaga para sa “paghidait” duha ka beses nga ginasulat para padakuon ini. Gani para mapakita ina nga pagpadaku, ini nga ekspresyon puede ma-translate nga “dayon nga paghidait,” “himpit nga paghidait,” ukon “kompleto nga paghidait.” Buot silingon, ang mga nagasalig gid kay Jehova makabatyag sing kalinong, nga amo ang pagpabilin nga kalmado bisan ano man ang ila sitwasyon. (Salmo 112:7; 119:165) Ini nga paghidait resulta sang malapit nga relasyon kay Jehova kag sang pagtinguha nga himuon ang insakto sa iya pagtan-aw.—Hulubaton 3:32; Isaias 48:18.

 Ang “dayon nga paghidait” wala nagakahulugan nga ginakuha sang Dios ang tanan nga problema sang mga nagasimba sa iya para indi na sila magkabalaka. (1 Samuel 1:6, 7; Job 6:1, 2; Salmo 31:9) Pero, ginabuligan niya sila nga mabatas ang ila mga kabudlayan. (Isaias 41:10, 13) Ginapamatian niya ang ila mga pangamuyo, dayon ginahatagan sila sang kaalam, kusog, kag ginapaumpawan sila. (Salmo 94:19; Hulubaton 2:6; Isaias 40:29) Bilang resulta, kalmado gihapon sila bisan nagaatubang sila sang mabudlay nga sitwasyon.—Filipos 4:6, 7.

 Si propeta Isaias nabuhi sang mga ikawalo nga siglo B.C.E. Sina nga tion, kag sa mga tinuig pagkatapos sina, madamo nga tawo sa Juda ang wala nagasimba sing matutom kay Jehova nga Dios. Bilang resulta, sang tuig 607 B.C.E., ginpabay-an ni Jehova nga gub-on ang ila kapital nga siudad nga Jerusalem.

 Pero, sobra isa ka gatos ka tuig antes ini ginguba, nagsulat si propeta Isaias sang kanta sang pagdayaw kay Jehova nga narekord sa kapitulo 26. (Isaias 26:1-6) Mabasa sa sina nga kanta nga maabot ang tion nga patindugon liwat sa duta sang Juda ang isa ka siudad, nga maathag nga amo ang Jerusalem.

 Gintukod liwat ang Jerusalem sa mga tinuig pagkatapos sang 537 B.C.E. Sang natabo ini, ang nagbalik nga matutom nga mga Judiyo makabatyag nga may kalig-unan kag makasiling: “May mabakod kami nga siudad.” (Isaias 26:1) Ang mapag-on nga mga pader sini indi ang rason nga mabakod ang siudad, kundi ang pagpakamaayo kag proteksion ni Jehova sa sini.—Isaias 26:2.

 Pareho man ini sa aton subong. Ang mga nagasalig gid kay Jehova nagabatyag sang kalig-on bangod ginakabig nila sia nga ila “Igang,” ukon dalangpan.—Isaias 26:4.

 Tan-awa ining malip-ot nga video para mahibaluan mo ang sumaryo sang libro sang Isaias.