GINPAATHAG ANG MGA BERSIKULO SA BIBLIA

Josue 1:9—“Magpakalig-on Ka kag Magpakaisog”

I-PLAY

“Gani ginasugo ko ikaw, ‘Magpakaisog ka kag magpakabakod. Indi ka mahadlok, kay kaupod mo si Jehova nga imo Dios bisan diin ka magkadto.’”—Josue 1:9, Bag-ong Kalibutan nga Badbad.

“Dumdumon mo ining akon bilin sa imo: ‘Magpakalig-on ka kag magpakaisog. Indi ka magkahadlok ukon magkaluya, kay ako, ang GINOO nga imo Dios, magaupod sa imo bisan diin ka magkadto.’”—Josue 1:9, Ang Pulong sang Dios.

Kahulugan sang Josue 1:9

Paagi sa sini nga mga tinaga, ginapasalig ni Jehova a nga Dios ang iya matutom nga sumilimba nga si Josue nga puede sia ‘magpakaisog kag magpakabakod’ bisan pa sa mabudlay nga mga sitwasyon kag sa daw indi masarangan nga mga kabudlayan. Indi gid dapat mahadlok si Josue sa matabo kon sundon niya ang mga sugo sang Dios, kay daw pareho lang nga ara si Jehova sa tupad niya nga nagabulig para magmadinalag-on sia. Kaupod ni Josue ang Dios bangod ginatudluan sia sang Dios sang iya himuon kag ginapadaug Niya sia sa iya mga kaaway.

Paano mahimo ni Josue nga ‘magpakaisog kag magpakabakod’? Puede sia mapalig-on sang mga sinulatan halin kay Jehova nga matigayon na sina nga tion. Nalakip sa sini “ang tanan nga kasuguan nga ginsugo [kay Josue] sang [alagad ni Jehova] nga si Moises.” b (Josue 1:7) Ginsilingan ni Jehova si Josue nga ‘basahon ini kag pamalandungan sa adlaw kag gab-i.’ (Josue 1:8) Ini nga pagbasa kag pagpamalandong nagpabakod sang hunahuna kag tagipusuon ni Josue nga himuon ang kabubut-on sang Dios. Dayon, dapat sundon ni Josue sa iya kabuhi ang iya mga natun-an sa Pulong sang Dios para ‘matuman niya ang tanan nga nasulat sa sini.’ Kon himuon niya ini, mangin maalamon sia kag magamadinalag-on. Kag amo gid sina ang natabo. Bisan pa may mga kabudlayan man si Josue, makalilipay ang iya kabuhi bilang isa ka matutom nga sumilimba ni Jehova.—Josue 23:14; 24:15.

Makapalig-on gihapon ang ginsiling ni Jehova kay Josue bisan subong. Ginapakita sini nga nagaulikid gid si Jehova sa tanan niya nga mga sumilimba ilabi na kon nagaatubang sila sing mga kabudlayan. Gusto niya nga mangin madinalag-on sila pareho ni Josue. Puede man sila mangin ‘maisog kag mabakod’ pareho ni Josue, paagi sa regular nga pagbasa sa Pulong sang Dios, ang Biblia, kag pagpamalandong sa sini kag dayon himuon ang ginasiling sini sa ila kabuhi.

Kaingod nga mga Teksto sang Josue 1:9

Sang mapatay si Moises, ginpili ni Jehova si Josue nga manguna sa pungsod sang Israel. (Josue 1:1, 2) Sina nga tion, nagahanda na ang mga Israelinhon nga magsulod sa Ginsaad nga Duta, ang duta sang Canaan. Pero dapat anay nila pierdihon ang gamhanan nga mga kontra. Halimbawa, dapat makig-away si Josue sa mga Canaanhon, nga malain katama nga mga tawo. c (Deuteronomio 9:5; 20:17, 18) Kag kon ikumparar sa mga Israelinhon, ang mga Canaanhon mas madamo sing soldado kag mas maayo ang ila mga gamit para sa inaway. (Josue 9:1, 2; 17:18) Pero nagpakaisog si Josue kag ginsunod niya ang mga sugo ni Jehova. Kag ginpamatud-an gid sang Dios nga kaupod sia ni Josue kay napierde sang mga Israelinhon ang kalabanan nila nga mga kaaway sa sulod lang sang anom ka tuig.—Josue 21:43, 44.

a Ang ngalan nga Jehova amo ang Hiligaynon nga translation sang ngalan sang Dios sa Hebreo—ang apat ka letra nga ‏) יהוהYHWH(‏,‏ nga ginatawag man nga Tetragrammaton. Ini nga ngalan gin-translate nga “GINOO” sa sini nga teksto sa Ang Pulong sang Dios. Para sa dugang nga impormasyon parte kay Jehova kag kon ngaa ginkuha sang iban nga translation sang Biblia ini nga ngalan, tan-awa ang artikulo nga “Sin-o si Jehova?”

b Mahimo nalakip sa mga sinulatan nga ginbasa sadto ni Josue, kag mabasa man naton subong sa Biblia, amo ang lima ka libro ni Moises (Genesis, Exodo, Levitico, Numeros, kag Deuteronomio), ang libro sang Job, kag isa ukon duha ka salmo.

c Para sa dugang nga impormasyon kon ngaa ginatugutan ang amo sina nga mga inaway sadto, tan-awa ang artikulo nga “Ngaa Nakig-away ang Dios sa mga Taga-Canaan?” sa Enero 1, 2010, nga Ang Lalantawan.