“Nagsabat si Jesus: ‘Ako amo ang dalan kag ang kamatuoran kag ang kabuhi. Wala sing makakadto sa Amay kon indi paagi sa akon.’”—Juan 14:6, Bag-ong Kalibutan nga Badbad.

 “Si Jesus nagsabat sa ila, ‘Ako amo ang dalan, ang kamatuoran, kag ang kabuhi; wala sing may makakadto sa Amay kon indi paagi sa akon.’”—Juan 14:6, Maayong Balita nga Biblia.

 Kon gusto sang isa ka tawo nga simbahon ang Amay, nga amo si Jehova a nga Dios, dapat niya kilalahon ang importante nga papel ni Jesus.

 “Ako amo ang dalan.” Si Jesus amo ang dalan bangod paagi sa iya batunon sang Dios ang pagpalapit sang mga tawo. Halimbawa, ang mga nagapangamuyo sa Dios dapat mangamuyo paagi sa ngalan ni Jesus. (Juan 16:23, 24) Bangod sa kamatayon ni Jesus posible na liwat sa mga tawo nga makatigayon sang maayo nga relasyon sa Dios, ukon mabaton ang iya kahamuot. (Roma 5:8-11) Ginpakita man ni Jesus ang maayo nga paggawi nga dapat sundon sang mga tawo para malipay ang Dios sa ila.—Juan 13:15.

 “Ako amo . . . ang kamatuoran.” Pirme ginasugid ni Jesus ang kamatuoran halin sa Dios kag ginapakita gid niya ini sa iya kabuhi. (1 Pedro 2:22) Paagi sa pagpamati kay Jesus, matun-an sang isa ka tawo ang kamatuoran parte sa Dios. (Juan 8:31, 32) Si Jesus man ang “kamatuoran” bangod gintuman niya ang mga tagna sa Biblia. Paagi sa iya nangin matuod ang mga promisa sang Dios.—Juan 1:17; 2 Corinto 1:19, 20; Colosas 2:16, 17.

 “Ako amo . . . ang kabuhi.” Ginhatag ni Jesus ang iya kabuhi para ang mga nagatuo sa iya makatigayon sang kabuhi nga wala sing katapusan. (Juan 3:16, 36) Sia man “ang kabuhi” sang mga napatay na kay banhawon niya sila.—Juan 5:28, 29; 11:25.

 “Wala sing makakadto sa Amay kon indi paagi sa akon.” Dapat batunon sang mga tawo nga gusto makatigayon sing maayo nga relasyon sa Dios ang pinasahi nga papel ni Jesus. Dapat sila mangamuyo sa Dios paagi sa ngalan ni Jesus. Kon himuon nila ini, ginapakita nila nga ginakilala nila ang awtoridad ni Jesus. (Juan 15:16) Nagapati man sila nga ang kaluwasan nangin posible lamang paagi kay Jesus.—Binuhatan 4:12; Filipos 2:8-11.

 Mabasa sa kapitulo 13 asta 17 ang laygay ni Jesus sa iya 11 ka matutom nga apostoles sang gab-i antes sia napatay. Sa kapitulo 14, ginpalig-on ni Jesus ang iya mga disipulo nga magtuo sa iya kag sa iya Amay kag palanggaon sila kag tumanon. (Juan 14:1, 12, 15-17, 21, 23, 24) Ginsugid niya ang iya suod nga kaangtanan sa iya Amay. (Juan 14:10, 20, 28, 31) Bisan pa nga malapit na lang sia magbalik sa langit, ginpasalig niya ang iya mga disipulo nga indi niya sila pagbiyaan. (Juan 14:18) May ginpromisa man sia sa ila nga “manugbulig” nga amo “ang balaan nga espiritu, nga ipadala sang Amay sa [iya] ngalan.” (Juan 14:25-27) Ginhimo ini ni Jesus para ihanda ang iya mga sumulunod sa mga pagtilaw nga ila maeksperiensiahan.