“Ginsugid ko ini sa inyo agod paagi sa akon may paghidait kamo. Sa kalibutan may kapipit-an kamo, apang magpakabakod kamo! Nadaug ko ang kalibutan.”—Juan 16:33, Bag-ong Kalibutan nga Badbad.

 “Ini napamulong ko sa inyo, agod nga kamo may paghidait sa akon. Sa kalibutan may kangitngitan kamo; apang magpakalig-on kamo, nadaug ko ang kalibutan.”—Juan 16:33, Ang Biblia sang Philippine Bible Society.

 Paagi sa sining ginsiling ni Jesus, ginpasalig niya ang iya mga sumulunod nga pareho sa iya, mapahamut-an man nila ang Dios bisan pa may mga kabudlayan sila nga maeksperiensiahan ukon bisan kontrahon sila sang iban.

 “Ginsugid ko ini sa inyo agod paagi sa akon a may paghidait kamo.” Kon basahon ang bilog nga teksto, maathag nga ang paghidait nga ginsambit diri wala nagakahulugan nga wala na gid sing gamo sa kabuhi sang isa ka tawo. Kundi, kalinong ini sa tagipusuon kag hunahuna. Mabatyagan ini nga kalinong “paagi” kay Jesus. Nagpromisa sia nga mapadala sia sang balaan nga espiritu. Bangod sining gamhanan nga “manugbulig” masarangan sang mga disipulo ni Jesus ang bisan ano nga kabudlayan.—Juan 14:16, 26, 27.

 “Sa kalibutan may kapipit-an kamo, apang magpakabakod kamo!” Ginprangka ni Jesus ang iya mga disipulo nga makaeksperiensia gid sila sang mga kabudlayan. Mahimo sila trataron sang indi maayo kag hingabuton. (Mateo 24:9; 2 Timoteo 3:12) Pero, may rason sila nga “magpakabakod,” ukon “magpakalig-on.”—Juan 16:33, Ang Biblia.

 “Nadaug ko ang kalibutan.” Ang tinaga diri nga “kalibutan” nagapatuhoy sa mga tawo nga wala sing suod nga kaangtanan sa Dios. b Ang 1 Juan 5:19, nagsiling: “Ang bug-os nga kalibutan yara sa gahom sang isa nga malauton,” ukon ni Satanas. Gani ang mga ginahimo kag ginahunahuna sang mga tawo sa sini nga “kalibutan” wala nagapahamuot sa Dios.—1 Juan 2:15-17.

 Gintinguhaan ni Satanas nga punggan si Jesus sa paghimo sang kabubut-on sang Dios. Nalakip sa mga ginhimo ni Jesus amo ang pagtudlo sa iban parte sa Dios kag ang paghatag sang iya kabuhi bilang gawad. (Mateo 20:28; Lucas 4:13; Juan 18:37) Pero ginpanikasugan gid ni Jesus nga indi sia maimpluwensiahan sang panghunahuna sang kalibutan, kay posible mangin rason ini para isikway niya ang Dios. Sa baylo, nagpabilin sia nga matutom asta nga napatay sia. Gani, nakasiling si Jesus nga nadaug niya ang kalibutan. Nakasiling man sia nga “ang manuggahom sang kalibutan,” nga amo si Satanas, ‘wala sing kontrol sa iya.’—Juan 14:30.

 Ginhimo ini ni Jesus kay gusto niya ipakita sa iya mga sumulunod nga puede man sila mangin matutom sa Dios bisan pa ginatinguhaan ni Satanas kag sang iya kalibutan nga pauntaton sila sa pag-alagad sa Dios. Daw pareho lang nga nagsiling si Jesus: “Kon nadaug ko ang kalibutan, madaug man ninyo ini.”

 Ginsiling ini ni Jesus sang gab-i antes sia napatay. Kabalo si Jesus nga dali na lang sia patyon, gani gingamit niya ini nga kahigayunan para laygayan ang iya matutom nga mga apostoles. Nalakip sa sini ang mga kamatuoran nga dapat gid nila pamensaran sing maayo: Indi na nila sia makita, kag sigurado nga hingabuton sila kag posible nga patyon pa gani. (Juan 15:20; 16:2, 10) Posible nga mahadlukan ang iya mga apostoles bangod sa iya ginsiling. Gani gintapos ni Jesus ang iya laygay sa ila paagi sa pagsiling sang mabasa naton sa Juan 16:33 para palig-unon sila kag pasaligon.

 Mapalig-on man ang mga sumulunod ni Jesus subong sa iya mga ginsiling. Ang tanan nga Cristiano puede mangin matutom sa Dios bisan pa may kabudlayan ukon kapipit-an sila nga maeksperiensiahan.