“Dayawon ang Dios sa langit, kag sa duta may paghidait ang mga tawo nga nahamut-an sang Dios.”—Lucas 2:14, Bag-ong Kalibutan nga Badbad.

“Dalayawon ang Dios sa langit. May paghidaet na diri sa duta, sa mga tawo nga iya nahamut-an!”—Lucas 2:14, Ang Pulong sang Dios, APD.

Ini nga mga tinaga sang pagdayaw, nga ginhambal sang mga anghel sang natawo si Jesus, nagapakita nga ang mga nagatuo kay Jesus puede makahatag sang kalipay sa Dios kag makaeksperiensia sang paghidait.

“Dayawon ang Dios sa langit.” Sa sini nga mga tinaga nga ginhambal sang mga anghel, ginpakita nila nga ang Dios nagakabagay magbaton sang tanan nga himaya. Ginasugid man sini nga ang pagkabun-ag ni Jesus kag ang iya pagministeryo sa duta magahimaya pa gid kay Jehova a nga Dios. Halimbawa, kon magpanudlo si Jesus pirme niya ginahatag ang kadungganan sa Dios, pareho sang nagsiling sia: “Ang akon ginatudlo wala naghalin sa akon, kundi sa nagpadala sa akon.” (Juan 7:16-18) Kon maghimo sang milagro si Jesus, ang mga nagatan-aw masami ‘nagahimaya sa Dios.’ (Lucas 5:18, 24-26; Juan 5:19) Bisan ang kamatayon ni Jesus naghimaya sa Dios. Bangod sini, nangin posible nga matuman sang Dios ang iya dalayawon nga katuyuan nga pun-on ang duta sang matarong nga mga tawo nga gusto gid ang paghidait.—Genesis 1:28.

“Sa duta may paghidait.” Ini nga paghidait wala lang nagakahulugan nga wala na sing inaway. Nagalakip ini sang kalinong, ukon matawhay nga panghunahuna, nga posible lang mabaton sang isa kon nalipay si Jehova sa iya. Bangod kay Jesus, puede mangin maayo ang relasyon sang mga tawo sa Dios. (Santiago 4:8) Kag bilang Hari sang Ginharian sang Dios, ihatag ni Jesus ang matuod nga kalinong kag wala katapusan nga paghidait sa bilog nga duta.—Salmo 37:11; Lucas 1:32, 33.

“Mga tawo nga nahamut-an sang Dios.” Ini nga mga tinaga nagapatuhoy sa mga tawo nga nahamut-an sang Dios, ukon may maayo nga relasyon sa Dios, bangod sang ila matuod nga pagtuo sa iya kag sa isa nga iya ginpadala, si Jesus. Wala sini ginapatuhuyan ang kaayo sang Dios sa tanan nga tawo bisan ano man ang ila batasan kag ginahimo, ukon ang kaayo nga mahimo ginapakita sang mga tawo. Ang pila ka translation sang Biblia, pareho sang King James Version, nag-translate sini nga “kahamuot sa mga tawo.” Pero ginasuportahan sang nauna kag masaligan nga Griego nga mga manuscript ang translation sang New World Translation kag sang iban pa nga mas bag-o nga translation. Sa sini nga mga translation, maathag ang ideya nga nagapatuhoy ini sa paghidait sa mga tawo nga nahamut-an sang Dios.—Tan-awa ang “ Iban nga mga Translation sang Lucas 2:14.”

Ang Lucas kapitulo 2 nagasugid sang kabuhi ni Jesus sang bata pa sia. Sang matawo si Jesus, may anghel nga nagpakita sa mga manugbantay sang karnero nga “nagaistar sa latagon kag nagabantay sang ila mga panong sa bug-os nga gab-i.” b (Lucas 2:4-8) Ang anghel may ginpahibalo nga “maayong balita nga magahatag sing daku nga kalipay,” sang magsiling sia sa manugbantay sang karnero: “Karon nga adlaw sa siudad ni David, natawo ang isa nga magaluwas sa inyo, nga amo ang Cristo nga Ginuo.” (Lucas 2:9-11) Ginsugid sa mga manugbantay sang karnero kon diin nila makita ang lapsag, kag hinali lang nakita nila ang madamo nga anghel nga nagadayaw sa Dios. Pag-abot nila sa Betlehem, nakita nila si Maria kag si Jose kag ang lapsag nga si Jesus. (Lucas 2:12-16) Sa tapos nila masugid ang ila makatilingala nga eksperiensia, ang mga manugbantay sang karnero nagbalik sa ila panong, nga “nagahimaya kag nagadayaw sa Dios tungod sang tanan nga ila nabatian kag nakita.”—Lucas 2:17-20.

“Himaya sa Dios sa kahitaasan, kag paghidait sa duta sa tunga sang mga tawo nga iya nahamut-an!”—Lucas 2:14, Ang Biblia sang Philippine Bible Society.

“Himaya sa Dios sa kahitaasan! Kag paghidait sa duta sa mga tawo nga iya nahamut-an!”—Lucas 2:14, Maayong Balita nga Biblia.

“Himaya sa Dios sa kahitaasan kag sa duta paghidaet sa mga tawo nga iya nahamut-an.”—Lucas 2:14, Biblia sang Katilingban sang mga Kristiano.

Tan-awa ining malip-ot nga video para mahibaluan mo ang sumaryo sang libro sang Lucas.