“Ginhimo niya nga matahom ang tanan nga butang sa tagsa ka tion sini. Ginbutang man niya sa ila tagipusuon ang wala sing katubtuban; apang indi gid matungkad sang mga tawo ang binuhatan sang matuod nga Dios halin sa ginsuguran tubtob sa katapusan.”—Manugwali 3:11, Bag-ong Kalibutan nga Badbad.

 “Ang tagsa ka butang ginhimo niya nga matahum sa iya tion; ginbutang man niya ang wala sing katubtuban sa ila tagiposoon, apang agud nga ang tawo indi makatungkad sang binuhatan nga ginhimo sang Dios kutub sa ginsuguran bisan tubtub sa katapusan.”—Manugwali 3:11, Ang Biblia sang Philippine Bible Society.

 “Ginhimo niya nga matahom ang tanan nga butang sa tagsa ka tion sini.” Ang Hebreo nga tinaga nga gin-translate nga “matahom” mahimo magpatuhoy indi lang sa pisikal ukon sa gua lang nga katahom. Puede man ini ma-translate nga “naplastar sing maayo,” “eksakto,” ukon “nagakaigo.” (Manugwali 3:11, footnote) Nalakip sa matahom nga hinimuan sang Dios indi lang ang tanan nga butang nga iya gintuga kundi pati man ang tanan nga iya ginahimo para matuman ang iya kabubut-on.—Daniel 2:21; 2 Pedro 3:8; Bugna 4:11.

 “Ginbutang man niya sa ila tagipusuon ang wala sing katubtuban.” Gintuga sang Dios ang mga tawo para magkabuhi sing wala katapusan. (Salmo 37:29) Gani indi katingalahan nga gintuga man niya sila nga may handum nga mabuhi asta san-o. Pero, ang una nga mag-asawa nga si Adan kag si Eva, wala nagtuman sa Dios kag bilang resulta, napatay sila kag ang ila mga kaliwat mapatay man. (Genesis 3:17-19; Roma 5:12) Bisan pa sini, ang Dios nagpromisa nga ‘ihatag niya ang handum sang tagsa ka buhi nga butang,’ pati ang handum sang mga tawo nga mabuhi sing wala katapusan. (Salmo 145:16) Ginapaathag sang Biblia kon ano ang ginhimo ni Jehova para may paglaum liwat ang mga tawo nga mabuhi asta san-o.—Roma 6:23.

 “Indi gid matungkad sang mga tawo ang binuhatan sang matuod nga Dios halin sa ginsuguran tubtob sa katapusan.” Ang kaalam sang Dios madalom gid kag indi matungkad amo nga siling sa Biblia ‘indi ini mausoy.’ (Roma 11:33) Pero, ginasugid sang Dios ang iya mga katuyuan sa mga tawo nga gusto maghimo sang iya kabubut-on para malipay sia.—Amos 3:7.

 Ang libro sang Manugwali ginsulat ni Hari Solomon sang Israel sadto, ang tawo nga kilala bangod sa kaalam nga ginhatag sa iya sang Dios. Mabasa sa sini ang praktikal nga mga laygay kon ano gid nga mga butang ang matuod nga may kapuslanan kag kon ano ang wala sing pulos. (Manugwali 1:2, 3; 2:1, 17; 7:1; 12:1, 13) Sa kapitulo 3, ginsambit ni Solomon ang mga hitabo nga sulitsulit nga nagakatabo sa kabuhi. Ginsambit man niya ang sarisari nga hilikuton ukon buluhaton. (Manugwali 3:1-8, 10) Ginhatagan sang Dios ang mga tawo sing kahilwayan sa pagpili kon diin sa sini nga mga hilikuton ang ila himuon kag kon san-o nila ini himuon. (Deuteronomio 30:19, 20; Josue 24:15) Si Solomon nagsiling nga mangin matuod lang nga malipayon ang mga tawo sa ila binuhatan kon manghikot sila suno sa katuyuan sang Dios kag respetuhon ang Iya “tion” ukon ang iya iskedyul. Nagsiling si Solomon nga “dulot ini sang Dios.”—Manugwali 3:1, 12, 13.

 Tan-awa ining malip-ot nga video para mahibaluan mo ang sumaryo sang libro sang Manugwali.