“Ang bayad sa sala amo ang kamatayon, apang ang dulot nga ginahatag sang Dios amo ang kabuhi nga wala sing katapusan paagi kay Cristo Jesus nga aton Ginuo.”—Roma 6:23, Bag-ong Kalibutan nga Badbad.

 “Ang bunga sang sala amo ang kamatayon; pero ang bugay sang Dios amo ang kabuhi nga walay katapusan dira kay Kristo Jesus nga aton Ginuo.”—Roma 6:23, Biblia sang Katilingban sang mga Kristiano.

 Sa sini nga teksto, ginapaathag ni apostol Pablo nga nagakapatay ang mga tawo bangod makasasala sila. Pero, nagatanyag ang Dios sa iya matutom nga mga sumilimba sang matahom nga paglaum. Amo ini ang regalo nga kabuhi nga wala sing katapusan.

 “Ang bayad sa sala amo ang kamatayon.” Ang tanan natawo nga indi perpekto gani pirme sila makasala. a (Salmo 51:5; Manugwali 7:20) Kag bangod natawo sila nga may sala, ang tanan nga tawo magatigulang kag mapatay.—Roma 5:12.

 Para iilustrar, ginkumparar ni Pablo ang sala sa isa ka agalon nga nagabayad sang sueldo. Pareho sa isa ka trabahador nga nagapaabot nga bayaran sia sa iya obra, mapaabot man sang mga tawo nga mapatay sila bangod indi sila perpekto.

 Pero, nagsiling man si Pablo nga ang tawo “nga napatay nahilway na sa iya sala.” (Roma 6:7) Kon ang isa ka tawo mapatay, nahilway na sia, ukon nakabuhi na, sa tanan nga sala nga nahimo niya. Gani wala sing rason nga patihan nga ang mga patay nagaantos gihapon sa iban nga lugar bangod sang ila nahimo nga mga sala sang una. Ang matuod, maathag nga ginasiling sang Biblia nga ang mga patay wala na sing nahibaluan ukon wala sing mahimo ukon wala sing mabatyagan.—Manugwali 9:5.

 “Apang ang dulot nga ginahatag sang Dios amo ang kabuhi nga wala sing katapusan paagi kay Cristo Jesus.” Indi pareho sa “bayad” sa sala, nga amo ang kamatayon, ang Dios nagatanyag sang regalo nga kabuhi nga wala sing katapusan. Ang orihinal nga tinaga para sa “dulot” puede man i-translate nga “wala tupong nga regalo” ukon “regalo bangod sa kaalwan.” Ginapatuhuyan sini ang regalo nga ginhatag bisan pa wala ini ginpangabudlayan sang nakabaton. Wala sang makasasala nga tawo ang makatigayon sang kaluwasan kag kabuhi nga wala sing katapusan sa iya lang pagtinguha. (Salmo 49:7, 8) Pero, ginahatag sang Dios sing libre ining wala tupong nga regalo nga kabuhi nga wala sing katapusan sa mga nagatuo kay Jesus.—Juan 3:16; Roma 5:15, 18.

 Ginhimo ni Pablo ini nga sulat para sa mga Cristiano sa Roma sang mga 56 C.E. Ang pila sa mga Cristiano sadto may sala nga pagpati parte sa kaluoy sang Dios. Bangod naimpluwensiahan sila sang panudlo sang mga Griego, mahimo nagapati sila nga kon mas madamo ang ila nahimo nga sala, mas makabenepisyo sila sa kaluoy sang Dios. (Roma 6:1) Ang iban nagarason nga wala sila sing salabton sa ila mga sala kay wala na ginapatuman sa ila ang Kasuguan nga ginhatag sang Dios kay Moises. (Roma 6:15) Sa iya sulat, ginpatalupangod ni Pablo nga ang mga Cristiano indi makabaton sang kaluoy sang Dios kon tugutan nila nga magpadaug lang pirme sa sala.—Roma 6:12-14, 16.

 Ginapasalig sang ginsiling ni Pablo ang mga sumilimba sang Dios subong nga bisan pa natawo sila nga makasasala, may paglaum sila gihapon. Kon tumanon nila ang mga sugo sang Dios parte sa moral kag indi magpadaug sa ila sala nga mga handum, nagpromisa ang Dios nga hatagan niya sila sang kabuhi nga wala sing katapusan.—Roma 6:22.

 Tan-awa ining malip-ot nga video para mahibaluan mo ang sumaryo sang sulat para sa mga taga-Roma.