“Bisan nagalakat ako sa madulom nga nalupyakan, wala ako mahadlok, kay kaupod ko ikaw; ang imo bilugon kag ang imo sungkod nagapasalig sa akon.”—Salmo 23:4, Bag-ong Kalibutan nga Badbad.

 “Bisan nagalatas ako sang nalupyakan sang landong sang kamatayon, wala ako sing kahadlukan nga malaut; kay ikaw kaupud nakon; ang imo sungkud kag ang imo itulukud, nagalipay sila sa akon. “—Salmo 23:4, Ang Biblia sang Philippine Bible Society.

 Ginaproteksionan sang Dios ang mga nagasimba sa iya, bisan pa kon kaisa makaeksperiensia sila sang mabudlay nga mga sitwasyon. Sa sini nga bersikulo, ang Dios ginpaanggid sa isa ka manugbantay nga nagaatipan sang iya mga karnero. b Wala sila nahadlok bisan ara sila sa mabudlay nga mga sitwasyon, nga ginlaragway sa sini nga bersikulo nga isa ka lugar nga grabe ang kadulom ukon daw landong sang kamatayon. Wala sila nahadlok kay daw pareho lang nga kaupod nila ang Dios.

 Sang panahon sang Biblia, ang manugbantay nagagamit sang iya bilugon ukon inughanot para proteksionan ang iya mga karnero sa mabangis nga mga sapat. Ginagamit man niya ang iya sungkod nga sa masami isa ka malaba nga kahoy nga daw kaw-it ang puno, para giyahan ang iya mga karnero ukon ipalayo sila sa katalagman. Sing kaanggid, si Jehova nga Dios isa man ka mahigugmaon nga Manugbantay nga nagaproteksion kag nagagiya sa mga nagasimba sa iya. Bisan sa pinakamabudlay nga bahin sang ila kabuhi, ginaatipan sila ni Jehova sa sarisari nga paagi.

•   Ginatudluan niya sila kag ginapaumpawan paagi sa iya nasulat nga Pulong, ang Biblia.—Roma 15:4.

•   Nagapamati sia sa ila mga pangamuyo kag ginahatagan sila sang kalinong sa hunahuna kag paghidait.—Filipos 4:6, 7.

•   Ginagamit niya ang iban niya nga mga sumilimba para palig-unon sila.—Hebreo 10:24, 25.

•   Nagapromisa sia nga mangin maayo ang kahimtangan sa palaabuton kag dulaon niya ang malain nga mga butang nga ila naeksperiensiahan subong.—Salmo 37:29; Bugna 21:3-5.

 Si David amo ang nagsulat sang Salmo 23. Manugbantay sia sang karnero sang pamatan-on pa sia kag sang ulihi nangin hari sia sang pungsod sang Israel sadto. (1 Samuel 17:34, 35; 2 Samuel 7:8) Ang salmo nagasugod paagi sa paglaragway kay Jehova bilang Manugbantay nga nagagiya, nagapakaon, kag nagapaumpaw sa iya mga sumilimba pareho sa ginahimo sang isa ka manugbantay sa iya mga karnero.—Salmo 23:1-3.

 Sa Salmo 23:4, sang ginapadaku ni David ang proteksion sang Dios sa iya, gingamit niya ang tinaga nga “ikaw” sa pagpatuhoy sa Dios imbes nga “sia.” Ining pagbag-o sa termino nga gingamit ni David nagapakita nga malapit gid sia kay Jehova. Kabalo si David nga nagaulikid sa iya ang Dios kag nabal-an Niya ang iya ginaatubang nga mga pagtilaw. Gani, wala nahadlok si David.

 Sa Salmo 23, bersikulo 5 kag 6, nagbag-o ang paglaragway halin sa isa ka manugbantay kag sa iya mga karnero pakadto sa isa ka tagbalay kag sa iya bisita. Pareho sa isa ka maabiabihon nga tagbalay, gintratar ni Jehova si David bilang isa ka dungganon nga bisita. Indi mapunggan sang mga kaaway ni David ang proteksion nga ginahatag sang Dios sa iya. Sa katapusan nga bahin sang salmo, ginpabutyag ni David ang iya pagsalig nga pakitaan sia sang Dios sang kaayo kag gugma sa bilog niya nga kabuhi.

 Natun-an naton sa paglaragway sa Salmo 23 ang mahigugmaon kag wala nagauntat nga pag-atipan sang Dios sa mga nagasimba sa iya.—1 Pedro 2:25.