Nabatian ni Elias ang balita: Patay na si Hari Ahab. Imadyina ang tigulang na nga manalagna nga nagahikap sang iya burangos, nagatulok sa malayo, samtang ginapamensaran niya ang iya indi maayo nga inagihan sa malain nga hari. Grabe gid ang iya ginbatas! Ginpahog sia, ginlagas, kag ginpapatay pa gani—ginhimo ini tanan ni Ahab kag sang iya rayna nga si Jezebel. Wala ginpunggan sang hari sang ginpapatay ni Jezebel ang madamo nga manalagna ni Jehova. Bangod sa kasakon, ginpapatay pa gani nila nga duha ang inosente kag matarong nga si Nabot, lakip ang iya mga bata. Bisan pa sini, ginpahayag ni Elias ang paghukom ni Jehova kay Ahab kag sa iya paggahom. Nagakatuman na ang ginsiling sang Dios. Napatay si Ahab suno gid sa ginsiling ni Jehova.—1 Hari 18:4; 21:1-26; 22:37, 38; 2 Hari 9:26.

 Pero, nakahibalo si Elias nga dapat sia magpadayon sa pagbatas. Buhi pa si Jezebel, kag impluwensiado niya gihapon ang iya pamilya kag ang bug-os nga pungsod. Madamo pa sing maatubang nga kabudlayan si Elias, kag madamo pa sia sing dapat itudlo kay Eliseo nga kaupod niya kag magabulos sa iya. Istoryahan naton subong ang tatlo sa pinakaulihi nga asaynment ni Elias. Samtang ginatun-an naton kon paano ang iya pagtuo nagbulig sa iya nga magbatas, mas makahibalo kita kon paano mapabakod ang aton pagtuo sa sining mabudlay nga panahon.

 Si Ahazias, nga anak ni Ahab kag ni Jezebel, amo ang hari subong sang Israel. Ginsunod niya ang malain nga halimbawa sang iya mga ginikanan, imbes nga magtuon sa sini. (1 Hari 22:52) Nagsimba man sia kay Baal. Bangod sa pagsimba kay Baal, madamo nga tawo ang nagapakighilawas sa templo kag nagahalad pa gani sang ila kabataan. May magapabag-o pa ayhan kay Ahazias para pangunahan niya ang katawhan nga untatan ang paghimo sing malain sa panulok ni Jehova?

 Dayon may natabo nga trahedya sa sining bugalon nga hari. Nahulog sia sa atop kag malubha ang iya kahimtangan. Bisan pa sa sini, wala sia gihapon nangayo sing bulig kay Jehova. Sa baylo, nagpadala sia sing mensahero sa siudad sang mga Filistinhon sa Ekron nga ila kaaway para mamangkot sa dios nga si Baal-zebub kon bala magaayo pa sia. Naakig gid si Jehova. Nagpadala sia sing anghel kay Elias kag ginsilingan nga punggan niya ini nga mga mensahero. Ginpabalik sila sang manalagna sa hari dala ang matigdas nga mensahe. Daku gid ang sala ni Ahazias kay pamatyag niya daw wala lang sang Dios ang Israel. Nagsiling si Jehova nga indi na gid magaayo si Ahazias.—2 Hari 1:2-4.

 Ang indi mahinulsulon nga si Ahazias namangkot: “Ano ang hitsura sang tawo nga nagsugata sa inyo kag nagsiling sina sa inyo?” Nagsabat ang mga mensahero paagi sa pagsugid sang ginasuksok nga bayo sang manalagna, kag nagsiling dayon si Ahazias: ‘Si Elias yadto.’ (2 Hari 1:7, 8) Talalupangdon gid nga bangod simple lang ang kabuhi ni Elias kag napokus sa pag-alagad sa Dios, makilala na sia bisan sa bayo pa lang. Lain gid sia kay Ahazias kag sa mga ginikanan sini nga mga materyalistiko. Ginapahanumdom kita sang halimbawa ni Elias nga sundon ang ginlaygay ni Jesus nga magkabuhi sing simple kag magpokus sa mas importante nga mga butang.—Mateo 6:22-24.

 Gusto gid magbalos ni Ahazias, gani nagpadala sia sing 50 ka soldado upod sa ila pangulo para dakpon si Elias. Sang nakita nila nga “nagapungko si Elias sa ibabaw sang bukid,” a ginsinggitan sang pangulo sang mga soldado si Elias nga “manaug”—mahimo agod patyon. Imadyina! Bisan pa nahibaluan nila nga si Elias “tawo sang matuod nga Dios,” naghunahuna ang mga soldado nga ok lang nga daugdaugon sia kag pahugon. Nagsala gid sila! Ginsilingan ni Elias ang pangulo sang mga soldado: “Kon ako tawo sang Dios, kabay pa nga may kalayo nga manaug halin sa langit kag sunugon ikaw kag ang imo 50 ka soldado.” Ginhimo ini sang Dios. “May kalayo nga nanaug halin sa langit kag ginsunog sia kag ang iya 50 ka soldado.” (2 Hari 1:9, 10) Ang malain nga natabo sa mga soldado nagapahanumdom sa aton nga wala ginabalewala ni Jehova kon ginapahog ukon wala ginarespeto ang iya mga alagad.—1 Cronica 16:21, 22.

 Nagpadala liwat sing pangulo kag 50 ka soldado si Ahazias. Mas agresibo pa gid ang ikaduha nga pangulo. Wala gid sia nakatuon sa 51 ka lalaki nga napatay nga mahimo nakita pa niya ang ila mga abo. Ginsulit niya ang ginsiling sang una nga pangulo kay Elias nga “manaug.” Buangbuang gid sia! Gani pareho sa una nga grupo, napatay man sila. Pero mas buangbuang ang hari. Wala pa sia nadudla, nagpadala sia liwat sang ikatlo nga grupo sang mga soldado. Maayo lang kay maalamon ang pangulo sang ikatlo nga grupo. Mapainubuson sia nga nangabay kay Elias nga indi sila pagpatyon. Gin-ilog ni Elias ang kaluoy ni Jehova, amo nga ginpamatian niya ang pangabay sang mapainubuson nga pangulo. Ginsilingan sang anghel ni Jehova si Elias nga mag-upod sa mga soldado. Nagtuman si Elias kag ginhambal niya liwat ang paghukom ni Jehova sa malain nga hari. Natabo gid ini, napatay si Ahazias. Duha lang ka tuig ang iya paggahom.—2 Hari 1:11-17.

 Paano nakabatas si Elias bisan pa matig-a sing ulo kag rebelyuso ang mga tawo? Praktikal gid ini nga pamangkot sa aton. Naluyahan ka bala sing buot kay wala namati sa laygay ang isa nga suod sa imo kag ginpadayon ang indi maayo nga buhat? Paano kita makabatas kon amo sina ang natabo sa aton? May matun-an kita sa lugar diin nakita sang mga soldado si Elias, “sa ibabaw sang bukid.” Wala kita makahibalo kon ngaa yara didto si Elias, pero mahimo bangod pirme gid sia nagapangamuyo, nakita niya nga maayo gid ining malinong nga lugar para mangin suod pa gid sa iya pinalangga nga Dios. (Santiago 5:16-18) Mahimo man kita mangita sing tion nga mag-isahanon para mangamuyo sa Dios, nga ginatawag ang iya ngalan kag ginasugid sa iya ang tanan naton nga kabudlayan kag mga kabalaka. Makabulig ini sa aton nga magbatas kon ang mga suod sa aton mangin indi mahalungon kag nagapadayon sa paghimo sing malain.

 Tion na agod buy-an ni Elias ang iya asaynment. Talupangda ang iya ginhimo. Sang naghalin na sila ni Eliseo sa banwa sang Gilgal, ginpilit niya si Eliseo nga magpabilin didto kay makadto sia sa Betel, nga mga 11 ka kilometro ang kalayuon. Malig-on nga nagsabat si Eliseo: “Ginapanumpa ko sa buhi nga Dios nga si Jehova kag sa imo atubangan, indi ako magbulag sa imo.” Sang nag-abot sila sa Betel, nagsiling si Elias nga indi na niya pag-updon si Eliseo sa Jerico, nga mga 22 ka kilometro ang kalayuon. Amo gihapon ang sabat ni Eliseo. Sa ikatlo nga tion, sa Jerico, amo gihapon ang natabo antes sila magtabok sa Suba Jordan, nga mga 8 ka kilometro ang kalayuon. Sa liwat, wala nagpasugot si Eliseo. Indi niya pagbiyaan si Elias!—2 Hari 2:1-6.

 Ginpakita ni Eliseo ang importante gid nga kinaiya, ang mainunungon nga gugma. Amo man sini nga gugma ang ginpakita ni Rut kay Noemi, ang gugma nga nagapahulag sa isa nga indi gid magbiya sa iya ginpakitaan sini. (Rut 1:15, 16) Mas kinahanglan gid subong sang tanan nga alagad sang Dios ina nga kinaiya. Importante man bala ini sa aton pareho sa ginpakita ni Eliseo?

 Sigurado nga natandog gid si Elias sa mainunungon nga gugma sang iya bataon nga kaupod. Bangod sini, nasaksihan ni Eliseo ang katapusan nga milagro ni Elias. Sa pangpang sang masulog kag madalom nga Suba Jordan, ginhampak ni Elias ang iya kunop sa tubig. Natunga ang tubig! Nakita man ini sang ‘50 ka anak sang mga manalagna,’ nga mahimo mga ginahanas man para manguna sa matuod nga pagsimba. (2 Hari 2:7, 8) Mahimo nga gindumalahan ni Elias ini nga paghanas. Sang nagligad nga pila ka tuig, may tion sadto nga nagbatyag si Elias nga sia na lang ang nabilin nga matutom nga manalagna sa duta. Sugod sadto, ginpadyaan ni Jehova ang pagbatas ni Elias, amo nga nakita niya ang pag-uswag sa mga sumilimba ni Jehova.—1 Hari 19:10.

 Sang nakatabok na sila sa Jordan, ginsilingan ni Elias si Eliseo: “Ano ang luyag mo nga himuon ko para sa imo antes ako kuhaon sa imo?” Nahibaluan ni Elias nga magabiya na sia. Wala niya gindalukan ang iya bataon nga abyan sang pribilehiyo kag kabantugan. Sa baylo, gusto niya nga buligan sia. Amo lang ini ang ginpangayo ni Eliseo: “Palihug, mahatagan mo bala ako sing doble nga parte sang imo gahom?” (2 Hari 2:9) Indi buot silingon nga gusto niya nga doble ang iya mabaton nga balaan nga espiritu sangsa kay Elias. Sa baylo, nagapangayo sia sang palanublion pareho sang subang, nga suno sa kasuguan, mas daku ukon doble, para matungdan niya ang iya responsibilidad bilang ulo sang pamilya. (Deuteronomio 21:17) Bilang manunubli sa espirituwal ni Elias, nakita niya nga kinahanglan niya ang kaisog ni Elias para matuman ang iya responsibilidad.

 Mapainubuson nga gintugyan ni Elias ang sabat kay Jehova. Kon ipakita ni Jehova kay Eliseo ang pagkuha kay Elias, buot silingon huo ang sabat sa iya pangabay. Kag wala magdugay, samtang “nagalakat sila nga nagahambalanay,” may tumalagsahon nga natabo!—2 Hari 2:10, 11.

 May makatilingala nga kasanag sa langit nga amat-amat nga nagapalapit. Maimadyin naton ang gahod kag paghagunos sang buhawi nga gulpi lang nag-abot, upod ang masanag nga butang nga nagapalapit sa ila kag nakibot gid sila, amo nga nagbulagay sila nga duha. Nakita nila ang isa ka kangga nga masanag katama nga daw kalayo. Nahibaluan ni Elias nga amo na ini ang tion. Nagsakay bala sia sa kangga? Wala kita sing mabasa sa Biblia. Ano man ang natabo, pamatyag niya gin-alsa sia paibabaw sa kalangitan, kag gindala sang buhawi!

 Nahalawhaw gid si Eliseo. Sang nakita niya ining dalayawon gid nga hitabo, nahibaluan niya nga hatagan sia ni Jehova sing “doble nga parte” sang kaisog ni Elias. Pero nasubuan gid sia sa pagpamensar sini. Wala sia makahibalo kon sa diin makadto ang iya tigulang na nga abyan, kag wala gid niya ginapaabot nga makitaay pa sila. Nagsinggit sia: “Amay ko, amay ko! Ang kangga sang Israel kag ang iya mga manugkabayo!” Sang indi na niya makita ang iya pinalangga nga manunudlo, gingisi niya ang iya kunop bangod sa kasubo.—2 Hari 2:12.

 Sang gin-alsa sa kalangitan si Elias, nabatian bala niya ang paghibi sang iya bataon nga abyan kag mahimo nga naghibi man sia? Ano man ang natabo, sigurado nga nakabulig gid sa iya ang iya abyan nga mabatas ang mga kabudlayan. Makatuon gid kita sa halimbawa ni Elias kag makig-abyan man sa mga tawo nga nagapalangga sa Dios kag nagauna sang iya kabubut-on!

 Diin gindala si Elias? Ginatudlo sang pila ka relihion nga gindala sia sa langit para makaupod ang Dios. Pero imposible gid ina. Pila ka gatos ka tuig sang ulihi, nagsiling si Jesucristo nga wala pa gid sing tawo nga nakakadto sa langit antes sa iya. (Juan 3:13) Gani sang nabasa naton nga “gindala sang buhawi si Elias sa kalangitan,” ano ang buot silingon sini? (2 Hari 2:11) Kon ginasambit sang Biblia ang “kalangitan” wala lamang ini nagapatuhoy sa lugar diin nagaistar si Jehova, kundi nagapatuhoy man ini sa kalangitan sa ibabaw sang duta diin may mga panganod kag nagalupad nga mga pispis. (Salmo 147:8) Sa sina nga kalangitan—sa kahawaan—gindala si Elias. Ano dayon ang natabo?

 Ginsaylo lang ni Jehova ang manalagna sa iya bag-o nga asaynment, sa katupad nga ginharian sang Juda. Ginapakita sang Biblia nga nanghikot pa si Elias didto, mga pito pa ka tuig sang ulihi. Ang hari sadto nga tion sa Juda amo ang malain nga si Hari Jehoram. Ginpangasawa niya ang anak ni Ahab kag ni Jezebel, gani ara gihapon ang ila malain nga impluwensia. Ginsugo ni Jehova si Elias nga magsulat sing mensahe sang paghukom kay Jehoram. Napatay si Jehoram suno gid sa ginsiling ni Jehova. Ang malala pa kay ang rekord nagsiling: “Wala gid sing tawo nga nasubuan sang mapatay sia.”—2 Cronica 21:12-20.

 Lain gid si Elias sa sining malain nga tawo! Wala kita makahibalo kon paano kag san-o napatay si Elias. Pero sigurado nga indi pareho kay Jehoram ang iya pagkapatay, nga wala gid sing tawo nga nasubuan. Nahidlaw gid si Eliseo sa iya abyan. Amo man ang iban pa nga matutom nga manalagna. Ginapabaloran gihapon ni Jehova si Elias mga 1,000 ka tuig sang ulihi, sang gingamit niya ang representasyon sang manalagna sa isa ka pagbaylo-dagway. (Mateo 17:1-9) Luyag mo bala magtuon sa halimbawa ni Elias kag magpalambo sang pagtuo nga makabulig sa imo nga magbatas bisan sang mga kabudlayan? Dumduma pirme nga makig-abyan sa mga nagapalangga sa Dios, magpokus sa pag-alagad kay Jehova, kag pirme gid mangamuyo sing tinagipusuon. Kabay nga malakip ka man sa mga ginapalangga ni Jehova!