Samtang ginatangla ni Maria Magdalena ang iya pinalangga nga Ginuo nga nagabitay sa usok, ginapahiran niya ang iya mga luha. Udto pa lang sadto sa tion sang tigpamulak pero “nagdulom ang bug-os nga duta.” (Lucas 23:44, 45) Ginputos niya sing kunop ang iya lawas kag nagtupad sa grupo sang mga babayi. Ining tatlo ka oras nga kadulom pinasahi gid, kay indi ini eclipse. Kay ang eclipse nagalawig lamang sang pila ka minuto. Mahimo pa gani nga nabatian ni Maria kag sang iban nga ato didto ang mga sapat nga sa kinaandan nagahuni lamang kon gab-i. Ang iban nga nagatan-aw hinadlukan gid amo nga nagsiling sila: “Matuod gid nga sia amo ang Anak sang Dios.” (Mateo 27:54) Gani nagpati ang mga sumulunod ni Jesus kag ang iban nga ato didto nga si Jehova nasubuan gid kag naakig sa brutal nga pagtratar sa iya Anak.

 Mahimo nga grabe gid ang pag-antos ni Jesus sina nga tion kag daw indi na gid maagwanta ni Maria Magdalena nga magtan-aw. Pero indi man sia makahalin. (Juan 19:25, 26) Kay man, kinahanglan man sang iloy ni Jesus ang bulig kag paumpaw.

 Madamo gid sing ginhimo si Jesus para kay Maria Magdalena gani gusto gid niya himuon ang tanan niya nga masarangan para kay Jesus. Nag-antos sing grabe kag makaluluoy gid si Maria Magdalena sadto pero ginbuligan sia ni Jesus. Gani may dignidad na liwat kag katuyuan ang iya kabuhi. Nangin halimbawa sia sang babayi nga may mabakod nga pagtuo. Paano ini natabo? Kag ano ang matun-an naton sa iya ginpakita nga pagtuo?

 Sa Biblia, ang istorya ni Maria Magdalena nagsugod sa isa ka regalo. Regalo sang kahilwayan. Kahilwayan sa ano? Sang una nga panahon, uso nga ang mga demonyo nagasulod sa mga tawo. Ginasudlan nila kag ginakontrol ang mga tawo. Kag si Maria Magdalena isa sa mga ginsudlan sang demonyo. Kag indi lang isa ka demonyo ang nagsulod sa iya kundi pito ka mapintas kag bastos nga mga demonyo. Maayo na lang kay ara si Jesucristo, gintabog niya ang mga demonyo.—Lucas 8:2.

 Wala na ang mga demonyo kag hilway na si Maria Magdalena. Gani nagbag-o gid ang iya kabuhi. Paano niya mapakita ang pagpasalamat? Nangin mainunungon sia nga sumulunod ni Jesus kag nagpangita sing paagi nga makabulig. Kinahanglan ni Jesus kag sang iya mga apostoles sang pagkaon, bayo, kag dalayunan. Kay ti indi man sila manggaranon, kag sina nga tion wala sila nagaobra para makapokus sila sa pagbantala kag pagpanudlo. Gani kinahanglan nga may magsuporta sa ila sa materyal.

 Para masuportahan ang ila materyal nga kinahanglanon, si Maria Magdalena kag ang iban pa nga mga babayi nagbulig. Ini nga mga babayi ‘nag-alagad kay Jesus kag sa mga apostoles paagi sa paggamit sang ila mga pagkabutang.’ (Lucas 8:1, 3) Ang iban sini nga mga babayi mahimo nga manggaranon. Wala man ginhambal sa Biblia kon bala nagaluto sila, nagalaba, ukon nagapangita sing dalayunan para kay Jesus kag sa iya mga apostoles sa kada lugar nga kadtuan nila. Pero gusto gid nila nga suportahan ining nagalakbay nga grupo nga mahimo nagalab-ot sa 20 ka tawo. Daku gid ang nabulig sining mga babayi para si Jesus kag ang iya mga apostoles makapokus sa ila pagbantala. Bal-an ni Maria Magdalena nga indi gid niya mabalusan ang tanan nga ginhimo ni Jesus para sa iya. Pero nalipay gid sia nga himuon ang tanan niya nga masarangan.

 Ginapakanubo sang kalabanan subong ang mga tawo nga nagaserbisyo sa iban. Pero indi amo sina ang pagtan-aw sang Dios. Sigurado nga nalipay gid sia nga makita si Maria Magdalena nga nagasakripisyo kag nagahimo sang tanan niya nga masarangan para buligan si Jesus kag ang iya mga apostoles. Subong, damo man sang matutom nga mga Cristiano nga nanamian gid nga magserbisyo para sa ila kauturan. Kay man, daku gid ang mahimo sang praktikal nga bulig ukon bisan sang simple nga pagpalig-on. Ginaapresyar gid ini ni Jehova.—Hulubaton 19:17; Hebreo 13:16.

 Si Maria Magdalena isa sa madamo nga babayi nga nag-upod kay Jesus pa-Jerusalem para sa Paskua sang 33 C.E. (Mateo 27:55, 56) Sang mabalitaan niya nga si Jesus gindakop kag ginbista sina mismo nga gab-i, sigurado nga nagalalain gid sia. Pero naglala pa gid ang sitwasyon. Kay ang gobernador nga si Poncio Pilato nagpadala sa pressure sang relihioso nga mga lider kag sang mga tawo, gani ginsentensiahan niya si Jesus nga mapatay paagi sa usok. Sigurado nga nakita gid ni Maria Magdalena ang iya Agalon nga nagadulugo na ang pilas, kapoy na kaayo, kag mahinay nga nagalakat samtang nagapas-an sang usok nga gamiton para bitayan sa iya.—Juan 19:6, 12, 15-17.

 Sa lugar diin ginlansang si Jesus kag diin nagdulom bisan udtong adlaw pa lang, si Maria Magdalena kag ang iban pa nga mga babayi nagatindog malapit “sa usok sang pag-antos ni Jesus.” (Juan 19:25) Bangod wala gid naghalin didto si Maria Magdalena, nakita niya kag nabatian nga ginbilin ni Jesus ang iya iloy sa iya pinalangga nga apostol nga si Juan. Nabatian man niya ang kasakit ni Jesus samtang nagapanawag ini sa iya Amay. Nabatian man niya nga antes napatay si Jesus, nagsiling ini, “Natuman na.” Grabe gid ang kasubo ni Maria Magdalena. Pero bisan sang patay na si Jesus, wala sia naglakat gilayon. Kag sang ulihi, si Maria Magdalena nagpabilin sa bag-o nga lulubngan diin ginlubong sang manggaranon nga si Jose nga taga-Arimatea si Jesus.—Juan 19:30; Mateo 27:45, 46, 57-61.

 Matun-an naton sa halimbawa ni Maria Magdalena kon ano ang puede naton himuon kon ara sa kabudlayan ang aton mga kauturan. Mahimo nga indi man naton mapunggan ang mga trahedya ukon madula ang kasakit nga ila ginabatyag, pero mapakita naton ang kaluoy kag kaisog. Kay man, daku gid ang mahimo sang presensia sang isa ka abyan sa tion sang kabudlayan. Ang pag-unong sa abyan nga nagakinahanglan nagapakita sang mabakod nga pagtuo kag nagahatag sang daku nga paumpaw.—Hulubaton 17:17.

  Sa tapos nga nabutang ang bangkay ni Jesus sa isa ka lulubngan, si Maria Magdalena isa sa mga babayi nga nagkuha sang dugang nga mahamot nga mga tanom nga ibutang nila sa ulihi sa bangkay ni Jesus. (Marcos 16:1, 2; Lucas 23:54-56) Pagkatapos sang Adlaw nga Inugpahuway, aga pa nagbugtaw si Maria Magdalena. Imadyina nga nagalakat sia samtang madulomdulom pa upod ang iban nga mga babayi pakadto sa lulubngan ni Jesus. Samtang nagalakat sila, ginapamensar nila kon sin-o ang mapaligid sang bato nga nagatabon sa puertahan sang lulubngan. (Mateo 28:1; Marcos 16:1-3) Pero wala ini nagpugong sa ila. Bangod sa ila pagtuo, ginhimo nila ang ila masarangan kag gintugyan ini kay Jehova.

 Mahimo nga mas nauna si Maria Magdalena nga nakalab-ot sa lulubngan. Pero nakibot gid sia sa iya naabtan. Ang bato sa puertahan sang lulubngan napaligid na, kag wala na ini sing unod! Bangod maabtik magdesisyon si Maria Magdalena, nagdalagan sia para magreport kay Pedro kag kay Juan. Imadyina nga ginalagas pa niya ang iya pagginhawa samtang nagasiling: “Ginkuha nila ang Ginuo sa lulubngan, kag wala kami makahibalo kon diin nila sia ginbutang”! Gani si Pedro kag Juan nagdalagan pakadto sa lulubngan, kag sang nakita nila nga wala gid man ini sing unod, nagpauli sila sa ila mga balay. a—Juan 20:1-10.

 Sang magbalik si Maria Magdalena sa lulubngan, nagpabilin sia didto nga isahanon. Pero bangod sa kalinong sang kaagahon, nabatyagan niya liwat ang kasubo kag naghibi sia. Indi gid sia maributay nga wala na ang iya Ginuo, gani nagsid-ing sia sa lulubngan kag nakibot gid sia sa iya nakita. May duha ka anghel nga nagapanapot sing puti nga nagapungko didto. “Ngaa nagahibi ka?” pamangkot nila. Gani ginsulit niya ang iya ginhambal sa mga apostoles: “Ginkuha nila ang akon Ginuo, kag wala ako makahibalo kon diin nila sia ginbutang.”—Juan 20:11-13.

 Nagbalikid sia kag may nakita sia nga lalaki nga nagatindog. Wala niya ini makilala gani abi niya amo ini ang hardinero nga nagaatipan sang mga lulubngan. Ginpamangkot sia sang tawo: “Babayi, ngaa nagahibi ka? Sin-o ang ginapangita mo?” Si Maria Magdalena nagsabat, “Ginuo, kon ikaw ang nagkuha sa iya, sugiri ako kon diin mo sia ginbutang, kay kuhaon ko sia.” (Juan 20:14, 15) Masarangan gid bala sang isa ka babayi nga hakwaton ang bangkay ni Jesucristo, nga isa ka mabukod nga tawo? Wala na ina ginpamensar ni Maria. Ang sa iya lang amo nga dapat may himuon sia.

 Kon makaatubang kita sing mga kasubo ukon kabudlayan, mailog bala naton si Maria Magdalena? Kon pensaron lang naton ang aton mga kaluyahon kag mga limitasyon, mahimo nga magpahimunong na lang kita kag wala na sing himuon. Pero kon himuon naton ang tanan naton nga masarangan kag bug-os nga magsalig sa Dios, posible nga mahimo naton ang mga butang nga abi naton indi ta masarangan. (2 Corinto 12:10; Filipos 4:13) Labaw sa tanan, nagapahalipay ini kay Jehova. Amo ina ang ginhimo ni Maria Magdalena, kag ginpadyaan sia ni Jehova sa isa ka pinasahi nga paagi.

 Ang lalaki nga nakita ni Maria Magdalena indi hardinero. Ang nakita niya isa sadto ka panday, dayon nangin manunudlo, kag nangin pinalangga nga Ginuo ni Maria Magdalena. Pero wala niya sia makilala, gani nagtalikod sia para maglakat. Mahimo wala gid magsulod sa pensar ni Maria Magdalena nga si Jesus mabanhaw bilang isa ka gamhanan nga espiritu. Pero bisan pa espiritu na sia, nagpakita sia bilang tawo, pero sa lain na nga lawas. Sa sining makalilipay nga mga tion pagkatapos sia mabanhaw, masami nga indi sia makilala bisan sang mga tawo nga suod sa iya.—Lucas 24:13-16; Juan 21:4.

 Ano ang ginhimo ni Jesus para makilala sia ni Maria Magdalena? Sang buhi pa si Jesus, may espesyal sia nga paagi sa pagtawag sa ngalan ni Maria Magdalena. Gani sang nagsiling sia: “Maria!” nagbalikid dayon si Maria Magdalena kag nagsinggit “Rabboni!” Amo ini ang tawag ni Maria Magdalena kay Jesus sa Hebreo nga lenguahe. Nakilala na niya ang iya Manunudlo! Grabe gid ang iya kalipay gani nagkapyot sia kay Jesus kag indi na niya luyag magbuhi.—Juan 20:16.

 Bal-an gid ni Jesus ang ginahunahuna ni Maria Magdalena. Gani nagsiling sia, “Untati ang pagkapyot sa akon.” Maimadyin naton si Jesus nga may kaayo nga nagahambal, ayhan nagayuhumyuhum samtang nagapanginpadlos sia kay Maria Magdalena kag nagapaathag sa iya sang rason kon ngaa: “Kay wala pa ako makakayab sa Amay.” Indi pa tion nga magbalik si Jesus sa langit kay may dapat pa sia himuon diri sa duta, kag gusto niya nga buligan sia ni Maria. Namati gid sing maayo si Maria Magdalena sa ginsiling ni Jesus. “Magkadto ka sa akon mga kauturan kag isiling sa ila, ‘Magakayab ako sa akon Amay kag inyo Amay kag sa akon Dios kag inyo Dios.’”—Juan 20:17.

 Kanami gid sang asaynment nga ginhatag sang Agalon sa iya. Si Maria Magdalena amo ang isa sa una nga mga disipulo nga nakakita sa ginbanhaw nga si Jesus. Kag subong, pribilehiyo niya nga isugid ining maayong balita sa iban. Nalipay gid sia, gani daw indi na sia makahulat nga pangitaon ang mga disipulo para sugiran sila. Imadyina sia nga nagahapuhapo pa samtang nagasugid sa ila nga “Nakita ko ang Ginuo!” Ini nga mga tinaga indi gid malipatan ni Maria Magdalena pati man sang mga ginsugiran niya. Eksayted gid si Maria Magdalena nga isugid sa ila ang tanan nga ginsiling ni Jesus amo nga kadasig sa iya maghambal. (Juan 20:18) Bangod sa iya ginsugid, nangin maathag sa mga disipulo ang ginreport sang iban nga mga babayi kon ngaa wala na sing unod ang lulubngan ni Jesus.—Lucas 24:1-3, 10.

 Ano ang reaksion sang mga lalaki? Sang primero wala sila nagpati. Mabasa naton: “Ang ila ginsugid daw wala sing pulos para sa ila, kag wala sila magpati sa mga babayi.” (Lucas 24:11) Wala man sing malain nga intension ini nga mga lalaki. Galing, nagdaku sila sa kultura nga masami wala nagasalig sa mga babayi. Kag suno sa tradisyon nga ginapatuman sang mga Rabbi, ang isa ka babayi indi makahatag sing testimonya sa korte. Mahimo nga naimpluwensiahan sini gihapon ang mga apostoles. Pero indi amo sina si Jesus kag ang iya Amay. Ginhatagan nila sang espesyal nga pribilehiyo ang isa ka matutom nga babayi.

 Sigurado gid nga wala naglain ang buot ni Maria Magdalena sa reaksion sang mga lalaki. Ang importante sa iya amo nga ginsaligan sia sang iya Agalon. Ang tanan nga sumulunod ni Jesus ginsaligan man sang importante nga mensahe para isugid sa iban. Ginatawag sang Biblia ini nga mensahe nga “maayong balita sang Ginharian sang Dios.” (Lucas 8:1) Wala nagsiling si Jesus sa iya mga sumulunod nga manamian ang tanan ukon mapati ang tanan sa ila ginasugid. (Juan 15:20, 21) Gani dapat dumdumon sang mga Cristiano si Maria Magdalena. Bisan pa wala sia ginpatihan sang iya mismo mga kauturan sa espirituwal, wala nadula ang iya kalipay sa padayon nga pagsugid sang maayong balita nga nabanhaw na si Jesus!

 Sang ulihi, si Jesus nagpakita man sa iya mga apostoles kag sa mas madamo pa gid nga mga sumulunod niya. Isa ka bes, nagpakita sia gani sa sobra 500 sa ila. (1 Corinto 15:3-8) Kag sa kada makita sia ni Maria Magdalena ukon mabatian ang report parte sa iya, sigurado nga mas nagabakod ang iya pagtuo. Mahimo pa gani nga si Maria Magdalena isa sa mga babayi nga nagtambong sa miting sa Jerusalem sang ang espiritu ginbubo sa mga sumulunod ni Jesus nga nagatipon didto.—Binuhatan 1:14, 15; 2:1-4.

 Masiling gid naton nga si Maria Magdalena nagpabilin nga matutom asta sa iya kamatayon. Kabay nga mangin determinado man kita nga ilugon sia. Mailog naton ang pagtuo ni Maria Magdalena kon ipakita naton ang pagpasalamat sa tanan nga ginhimo ni Jesus para sa aton kag mapainubuson nga magserbisyo sa iban samtang nagasalig nga buligan kita sang Dios.