Ang Dios Bala Ara Bisan Diin?

I-PLAY

Ang sabat sang Biblia

Makita sang Dios ang tanan nga butang kag makapanghikot sia bisan diin nga gusto niya. (Hulubaton 15:3; Hebreo 4:13) Pero, wala ginatudlo sang Biblia nga ang Dios omnipresent ukon ara bisan diin. Sa baylo, ginatudlo sini nga ang Dios isa ka persona kag may lugar sia nga ginaistaran.

Dagway sang Dios: Ang Dios isa ka espiritu nga persona. (Juan 4:24) Indi sia makita sang mga tawo. (Juan 1:18) Ang mga palanan-awon sa Biblia parte sa Dios pirme nagasiling nga ara sia sa isa ka espesipiko nga lugar. Wala sing mabasa sa Biblia nga ara sia bisan diin.—Isaias 6:1, 2; Bugna 4:2, 3, 8.
Puluy-an sang Dios: Nagaistar ang Dios sa lugar sang mga espiritu, nga indi pareho sa pisikal nga lugar nga makita naton. Sa sina nga lugar, ang Dios may “puluy-an sa langit.” (1 Hari 8:30) Ginsambit sang Biblia nga isa ka bes ang espiritu nga mga tinuga “nagtipon sa atubangan ni Jehova,” a nga nagapakita nga ang Dios nagaistar sa espesipiko nga lugar.—Job 1:6.

Mabuligan bala ako sang Dios bisan pa ara lang sia sa isa ka espesipiko nga lugar?

Huo. Nagaulikid gid ang Dios sa kada isa sa aton. Bisan pa nagaistar sia sa lugar sang mga espiritu, makita niya ang mga tawo nga nagahimo sang iya kabubut-on, kag ginabuligan niya sila. (1 Hari 8:39; 2 Cronica 16:9) Binagbinaga kon paano ginapakita ni Jehova ang iya pag-ulikid sa matutom nga mga sumilimba:

Kon nagapangamuyo ka: Sa kada tion nga mangamuyo ka, ginapamatian ini ni Jehova.—2 Cronica 18:31.
Kon may problema ka: “Malapit si Jehova sa mga nagaantos; ginaluwas niya ang mga nalisdan.”—Salmo 34:18.
Kon kinahanglan mo sang giya: Hatagan ka ni Jehova “sing paghangop kag tudluan [niya] ikaw” paagi sa iya Pulong, ang Biblia.—Salmo 32:8.

Sala nga pagpati parte sa omnipresence

Sala nga pagpati: Ang Dios ara bisan diin.

Ang matuod: Ang Dios wala nagaistar sa duta ukon bisan diin sa pisikal nga uniberso. (1 Hari 8:27) Matuod ang mga bituon kag iban pa nga tinuga “nagapahayag sang himaya sang Dios.” (Salmo 19:1) Apang ang Dios wala nagaistar sa iya mga tinuga pareho nga ang artist wala nagaistar sa iya painting. Pero paagi sa painting, madamo kita sing matun-an parte sa artist nga naghimo sini. Pareho sini, matun-an naton sa mga tinuga sa kalibutan ang parte sa “indi makita nga mga kinaiya” sang Manunuga, pareho sang gahom, kaalam, kag gugma.—Roma 1:20.

Sala nga pagpati: Ang Dios ara gid bisan diin kay nabal-an niya ang tanan nga butang kag sia ang labing gamhanan.

Ang matuod: Ang balaan nga espiritu ukon ang aktibo nga puersa sang Dios amo ang nagapanghikot nga gahom sang Dios. Paagi sa iya balaan nga espiritu, mabal-an kag mahimo sang Dios ang tanan nga butang bisan diin man ini nga lugar, sa bisan ano nga oras, kag bisan wala sia sa amo nga lugar.—Salmo 139:7.

Sala nga pagpati: Ginatudlo sang Salmo 139:8 nga ang Dios ara bisan diin kay nagasiling ini: “Kon magsaka ako sa langit, makita mo ako didto, kag kon dalhon ko ang akon hiligdaan sa Lulubngan, makita mo man ako didto.”

Ang matuod: Ini nga bersikulo wala nagapatuhoy sa lokasyon sang Dios. Isa ini ka binalaybay nga nagatudlo sa aton nga bisan diin man kita, puede kita buligan sang Dios.

a Jehova ang ngalan sang Dios suno sa Biblia.