Ang pagkabalaan isa ka kahimtangan nga nahamulag sa kahigkuan. Ang Hebreo nga tinaga nga gin-translate “balaan” naghalin sa isa ka termino nga nagakahulugan sing “pagpain.” Gani ang isa nga balaan ginpain sa kinaandan nga paggamit, ukon ginakabig ini nga sagrado bangod matinlo ini kag putli.

 Ang Dios balaan sa pinakamataas nga kahulugan. Ang Biblia nagsiling: “Wala gid sing balaan nga pareho kay Jehova.” a (1 Samuel 2:2) Gani nagakaigo lang nga ang Dios amo ang nagahimo sing talaksan sang pagkabalaan.

 Ang tinaga nga “balaan” puede gamiton sa bisan ano nga may direkta nga kaangtanan sa Dios, ilabi na sa mga butang nga ginpain para gamiton sa pagsimba. Halimbawa, ang Biblia nagsambit parte sa:

•   Balaan nga mga lugar: Nagsiling si Jehova kay Moises malapit sa nagadabdab nga tunukon nga kahoykahoy: “Balaan ang duog nga imo ginatindugan.”—Exodo 3:2-5.

•   Balaan nga pagtilipon: Ang mga Israelinhon sadto nagasimba kay Jehova sa tion sang relihioso nga mga kapiestahan nga ginatawag “balaan nga mga pagtilipon.”—Levitico 23:37.

•   Balaan nga mga butang: Ang mga kagamitan nga gingamit sa pagsimba sa Dios sa dumaan nga templo sa Jerusalem gintawag nga “sagrado nga kagamitan.” (1 Hari 8:4) Ining sagrado nga mga butang dapat respetuhon gid, pero indi ini dapat pagsimbahon. b

 Huo. Ginasugo sang Dios ang mga Cristiano: “Dapat mangin balaan kamo, tungod balaan ako.” (1 Pedro 1:16) Siempre indi gid malab-ot sang indi perpekto nga mga tawo ang perpekto nga talaksan sang Dios sa kon ano ang balaan. Pero ang mga tawo nga nagasunod sa matarong nga kasuguan sang Dios puede masiling nga “balaan kag kalahamut-an sa Dios.” (Roma 12:1) Matalupangdan sa ginahambal kag ginahimo sang isa ka tawo kon nagatinguha sia nga mangin balaan. Halimbawa, ginasunod niya ang laygay sang Biblia nga “mangin balaan . . . kag maglikaw sa seksuwal nga imoralidad.”—1 Tesalonica 4:3; 1 Pedro 1:15.

 Huo. Kon wala na ginasunod sang isa ang talaksan sang Dios sa pagkabuhi, mangin indi na sia balaan sa panan-aw sang Dios. Halimbawa, ang libro sang Hebreo sa Biblia ginsulat para sa “balaan nga mga kauturan,” pero nagpaandam ini nga mahimo magtubo sa ila ang “malaut nga tagipusuon nga wala sing pagtuo bangod sa pagpalayo sa buhi nga Dios.”—Hebreo 3:1, 12.

 Sala nga pagpati: Mangin balaan ang isa kon indi sia mangasawa ukon mamana.

 Ang kamatuoran: Puede magdesisyon ang isa ka Cristiano nga indi mangasawa ukon mamana, pero wala ini nagagarantiya nga ang isa balaan na sa panan-aw sang Dios. Ang mga wala sing bana ukon asawa mas makapokus gid man sa ila pagsimba. (1 Corinto 7:32-34) Pero ginapakita sang Biblia nga bisan ang mga may bana ukon asawa puede mangin balaan. Ang matuod, ang isa sa mga apostoles ni Jesus nga si Pedro, may asawa.—Mateo 8:14; 1 Corinto 9:5.