Sa Biblia, ang tinaga nga “langit” may tatlo ka panguna nga kahulugan: (1) pisikal nga langit; (2) lugar sang mga espiritu; kag (3) simbulo sang mataas nga posisyon. Ang konteksto ukon ang palibot nga mga teksto makabulig para mabal-an kon ano ang ginapatuhuyan. a

1.   Ang pisikal nga langit. Sa sini nga kahulugan, ang “kalangitan” nagapatuhoy sa atmospera sang duta, diin nagahuyop ang hangin, nagalupad ang mga pispis, may mga panganod nga nagahimo nga ulan kag niebe, kag nagapangilat. (Salmo 78:26; Hulubaton 30:19; Isaias 55:10; Lucas 17:24) Mahimo man ini magkahulugan sing kahawaan, diin ara “ang adlaw kag ang bulan kag ang mga bituon.”​—Deuteronomio 4:​19; Genesis 1:1.

2.   Ang lugar sang mga espiritu. Ang termino nga “langit” nagapatuhoy man sa espirituwal nga kalangitan ukon lugar nga ginaistaran sang mga espiritu, sa gua sang pisikal nga uniberso kag mas mataas sangsa sini. (1 Hari 8:​27; Juan 6:​38) Si Jehova nga Dios nga isa ka “Espiritu,” pati ang mga espiritu nga mga anghel nga iya gintuga diri nagaistar sa espirituwal nga kalangitan. (Juan 4:​24; Mateo 24:36) Kon kis-a, ang “kalangitan” nagapresentar man sa matutom nga mga anghel, “ang kongregasyon sang mga balaan.”​—Salmo 89:​5-7.

    Ginagamit man sang Biblia ang “kalangitan” para patuhuyan ang isa ka bahin sang lugar sang mga espiritu nga “puluy-an” mismo ni Jehova. (1 Hari 8:​43, 49; Hebreo 9:​24; Bugna 13:6) Halimbawa, gintagna sang Biblia nga si Satanas kag ang iya mga demonyo itagbong halin sa langit, kag indi na sila puede makaatubang liwat kay Jehova. Pero sia kag ang iya mga demonyo ara gihapon sa lugar sang mga espiritu.​—Bugna 12:​7-9, 12.

3.   Simbulo sang mataas nga posisyon. Sa Biblia, ang “langit” nagarepresentar man sang mataas nga posisyon, nga sa masami nagapatuhoy sa awtoridad sa paggahom. Ini nga posisyon puede magpatuhoy sa:

   •   Awtoridad ni Jehova nga Dios bilang ang labing gamhanan nga Soberano.​—2 Cronica 32:20; Lucas 15:21.

   •   Ginharian sang Dios, ang gobierno nga magabulos sa paggahom sang tawo. Ginatawag sang Biblia ini nga Ginharian nga “bag-o nga langit.”​—Isaias 65:17; 66:22; 2 Pedro 3:​13. b

   •   Mga Cristiano, nga samtang ari pa sa duta, may paglaum nga mapalangit.​—Efeso 2:6.

   •   Mga gobierno sang tawo nga nagpakataas sang ila kaugalingon sa ila mga sakop.​—Isaias 14:12-​14; Daniel 4:​20-​22; 2 Pedro 3:7.

   •   Malaut nga mga espiritu nga nagagahom subong sa kalibutan.​—Efeso 6:​12; 1 Juan 5:​19.

Ano ang ara sa langit?

 Madamo sing hilikuton sa lugar sang mga espiritu. Ginapuy-an ini sang ginatos ka milyon ka espiritu nga mga tinuga, nga ‘nagatuman sa tingog ni Jehova.’​—Salmo 103:20, 21; Daniel 7:​10.

 Sa Biblia, ang langit ginalaragway nga may tuman nga kapawa. (1 Timoteo 6:​15, 16) Ang propeta nga si Ezequiel nakakita sing palanan-awon paagi sa ‘masilaw nga kasanag,’ samtang sa palanan-awon ni Daniel parte sa langit nakita niya ang “kalayo nga nagailig nga daw suba.” (Ezequiel 1:​26-​28; Daniel 7:​9, 10) Ang langit balaan, ukon matinlo, kag matahom.​—Salmo 96:6; Isaias 63:15; Bugna 4:​2, 3.

 Makahalawhaw gid ang paglaragway sang Biblia sa langit. (Ezequiel 43:​2, 3) Pero, bangod sa aton limitasyon bilang tawo, indi gid naton bug-os nga maintiendihan kon ano gid ang langit.