Sin-o Ukon Ano ang mga Anghel?
Ang sabat sang Biblia
Ang mga anghel mga tinuga nga may gahom kag kusog nga labaw sangsa mga tawo. (2 Pedro 2:11) Nagaistar sila sa langit ukon sa lugar sang mga espiritu—isa ka lugar nga mas mataas sangsa aton uniberso. (1 Hari 8:27; Juan 6:38) Gani, ginatawag man sila nga mga espiritu.—1 Hari 22:21; Salmo 18:10.
Diin naghalin ang mga anghel?
Kaupod sang Dios sa pagtuga sa mga anghel si Jesus, nga ginatawag sang Biblia nga “panganay sa tanan nga tinuga.” Kon parte sa paggamit sang Dios kay Jesus sa pagpanuga, ang Biblia nagasiling: “Paagi sa iya gintuga ang tanan iban pa nga butang sa langit kag sa duta, ang mga butang nga makita kag indi makita,” dala na ang mga anghel. (Colosas 1:13-17) Ang mga anghel wala nagapangasawa ukon nagapamana, kag wala man sila nagapanganak. (Marcos 12:25) Ining “mga anak sang matuod nga Dios” isaisa nga gintuga.—Job 1:6.
Madugay na nga gintuga ang mga anghel antes pa gintuga ang duta. Sang gintuga sang Dios ang duta, ang mga anghel “nagsinggit sa kalipay.”—Job 38:4-7.
Daw ano kadamo ang mga anghel?
Ang Biblia wala nagsiling kon pila gid sila, pero ginapakita sini nga tama sila kadamo. Halimbawa, sa palanan-awon nga ginpakita kay apostol Juan nakita niya ang ginatos ka milyon nga anghel.—Bugna 5:11, footnote.
May ngalan bala kag personalidad ang kada anghel?
Huo. Mabasa sa Biblia ang ngalan sang duha sa ila: Si Miguel kag si Gabriel. (Daniel 12:1; Lucas 1:26) a Ang iban nga anghel nagsiling nga may ngalan sila, pero wala nila ini ginsugid.—Genesis 32:29; Hukom 13:17, 18.
Ang mga anghel may sarisari nga personalidad. Makakomunikar sila sa isa kag isa. (1 Corinto 13:1) Makapamensar man sila kag makahunahuna sing mga tinaga para dayawon ang Dios. (Lucas 2:13, 14) May kahilwayan man sila sa pagpili sa husto kag sala, pareho sang ginhimo sang pila sa ila sang ginpili nila ang sala kag nag-upod sila kay Satanas nga Yawa sa pagrebelde sa Dios.—Mateo 25:41; 2 Pedro 2:4.
May ranggo bala ang mga anghel?
Huo. Ang anghel nga may pinakadaku nga gahom kag may pinakataas nga awtoridad amo si Miguel nga arkanghel. (Judas 9; Bugna 12:7) Ang mga serafin, mataas sing ranggo nga mga anghel kag ara sila malapit sa trono ni Jehova. (Isaias 6:2, 6) Ang mga kerubin naman, isa pa ka grupo sang mga anghel nga mataas man sing ranggo kag may pinasahi sila nga asaynment. Halimbawa, mga kerubin ang ginpabantay sa dalan pakadto sa hardin sang Eden sang ginpagua sanday Adan kag Eva.—Genesis 3:23, 24.
Ang mga anghel bala nagabulig sa mga tawo?
Huo, ginagamit sang Dios ang iya matutom nga mga anghel para buligan ang mga tawo subong.
Ang mga anghel ginagamit sang Dios para giyahan ang iya mga alagad sa pagbantala sang maayong balita sang Ginharian sang Dios. (Bugna 14:6, 7) Daku ini nga bulig sa mga nagabantala kag sa mga nagapamati sang maayong balita.—Binuhatan 8:26, 27.
Ang mga anghel nagabulig man nga indi maimpluwensiahan sang malain nga mga tawo ang Cristianong kongregasyon.—Mateo 13:49.
Ang mga anghel nagagiya kag nagaproteksion sa mga tawo nga matutom sa Dios.—Salmo 34:7; 91:10, 11; Hebreo 1:7, 14.
Sa indi madugay, ang mga anghel magapakig-away upod kay Jesucristo para dulaon ang tanan nga kalainan, gani maeksperiensiahan na sang katawhan ang paumpaw.—2 Tesalonica 1:6-8.
Ang kada isa bala sa aton may guardian angel?
Interesado gid ang mga anghel sa espirituwal nga kaayuhan sang mga alagad sang Dios. Pero indi buot silingon nga ang Dios may gin-asayn nga isa ka anghel sa kada Cristiano para bantayan sia. b (Mateo 18:10) Ang mga anghel wala nagabulig sa mga alagad sang Dios sa tanan nga pagtilaw ukon pagsulay nga ila maatubang. Ginapakita sang Biblia nga ang Dios amo ang ‘magahimo sang lulutsan’ sa pagtilaw paagi sa paghatag sa isa ka tawo sing kaalam kag kusog para makabatas.—1 Corinto 10:12, 13; Santiago 1:2-5.
Sayop nga mga pagpati parte sa mga anghel
Sayop nga pagpati: Ang tanan nga anghel maayo.
Kamatuoran: Ang Biblia nagsiling parte sa “puersa sang malaut nga mga espiritu” kag “mga anghel nga nakasala.” (Efeso 6:12; 2 Pedro 2:4) Ining malain nga mga anghel amo ang mga demonyo nga nag-upod kay Satanas sa pagrebelde sa Dios.
Sala nga pagpati: Ang mga anghel imortal.
Kamatuoran: Ang malain nga mga anghel, pati na si Satanas nga Yawa laglagon.—Judas 6.
Sala nga pagpati: Kon mapatay ang mga tawo mahimo sila nga mga anghel.
Kamatuoran: Ang mga anghel separar nga gintuga sang Dios, indi sila ginbanhaw nga mga tawo. (Colosas 1:16) Ang mga tawo nga banhawon para magkabuhi sa langit makabaton sing imortal nga kabuhi halin sa Dios. (1 Corinto 15:53, 54) Makabaton sila sing posisyon nga mas mataas sangsa mga anghel.—1 Corinto 6:3.
Sala nga pagpati: Gintuga ang mga anghel para magserbisyo sa mga tawo.
Kamatuoran: Ang mga anghel nagatuman sa sugo sang Dios, indi sang mga tawo. (Salmo 103:20, 21) Bisan si Jesus nagsiling nga sa Dios sia nagapangayo sing bulig, indi sa mga anghel.—Mateo 26:53.
Sala nga pagpati: Makapangamuyo kita sa mga anghel para buligan nila kita.
Kamatuoran: Ang pagpangamuyo sa Dios bahin sang aton pagsimba, nga para lang kay Jehova nga Dios. (Bugna 19:10) Dapat sa Dios lang kita mangamuyo, paagi kay Jesus.—Juan 14:6.
a Ang pila ka translation sang Biblia naggamit sang termino nga “Lucifer” sa Isaias 14:12, kag nagapati ang iban nga amo ini ang ngalan sang anghel nga nangin Satanas nga Yawa. Pero ang orihinal nga Hebreo nga tinaga nga gingamit diri nagakahulugan sing “nagasilak nga bituon.” Base sa konteksto, ini nga termino wala nagapatuhoy kay Satanas, kundi sa dinastiya sang Babilonia nga ginpakahuy-an sang Dios bangod bugalon gid ini. (Isaias14:4, 13-20) Ang ekspresyon nga “nagasilak nga bituon” gingamit para insultuhon ang dinastiya sang Babilonia sang napukan ini.
b Nagapati ang iban nga may guardian angel si Pedro kay base sa kasaysayan ginbuligan sia sang anghel nga makagua sa prisuhan. (Binuhatan 12:6-16) Sang nagsiling ang mga disipulo nga “anghel [ni Pedro] ina,” abi nila anghel ni Pedro ang nagkadto sa ila. Pero ang matuod, si Pedro yadto.
Basi Manamian Ka Man
SABAT SA MGA PAMANGKOT SA BIBLIA
Sin-o si Miguel nga Arkanghel?
Mahimo mas pamilyar ka sa isa pa niya ka ngalan.
ANG LALANTAWAN
May Anghel de la Guardia Ka Bala?
Makasiling ka bala nga may anghel ukon mga anghel nga magaproteksion sa imo?
SABAT SA MGA PAMANGKOT SA BIBLIA
Matuod Bala ang mga Demonyo?
Ano ang mga demonyo? Diin sila naghalin?
PANUDLO SANG BIBLIA
Testingi ang Amon Pagtuon sa Biblia
Testingi ang libre nga interactive nga pagtuon sa Biblia upod sa isa ka instruktor.