Ang “Bag-o nga Jerusalem,” isa ka ekspresyon nga mabasa sing duha ka beses sa Biblia. Isa ini ka simbuliko nga siudad nga nagarepresentar sa grupo sang mga sumulunod ni Jesus nga mapalangit para maggahom upod sa iya sa Ginharian sang Dios. (Bugna 3:12; 21:2) Ginapakita sang Biblia nga ini nga grupo ginatawag man nga nobya sang Cristo.

1.   Ang Bag-o nga Jerusalem ara sa langit. Kon sambiton sang Biblia ang Bag-o nga Jerusalem, mabasa nga manaug ini halin sa langit, kag ginabantayan sang mga anghel ang mga gawang sang siudad. (Bugna 3:12; 21:2, 10, 12) Tama kadaku sang siudad amo nga indi puede nga sa duta ini. Kuadrado ang korte sini nga “12,000 ka estadio” ang takus. a (Bugna 21:16) Gani ang kada kilid sini mga halos 560 ka kilometro ang kataason nga nagalab-ot sa kahawaan.

2.   Ang mga miembro sang Bag-o nga Jerusalem amo ang grupo sang mga sumulunod ni Jesus, ukon ang nobya sang Cristo. Ang Bag-o nga Jerusalem ginatawag nga “ang nobya, ang asawa sang Kordero.” (Bugna 21:9, 10) Sa sining simbuliko nga paglaragway, ang Kordero nagapatuhoy kay Jesucristo. (Juan 1:29; Bugna 5:12) “Ang asawa sang Kordero,” ukon ang nobya sang Cristo, nagarepresentar sa mga Cristiano nga makaupod ni Jesus sa langit. Sa Biblia, ginkumparar ang kaangtanan ni Jesus sa sini nga mga Cristiano sa mag-asawa. (2 Corinto 11:2; Efeso 5:23-25) Dugang pa, ang sadsaran nga mga bato sang Bag-o nga Jerusalem “may 12 ka ngalan sang 12 ka apostoles sang Kordero.” (Bugna 21:14) Ini nga detalye nagabulig sa aton nga makilala ang Bag-o nga Jerusalem, kay ang mga Cristiano nga mabuhi sa langit ‘gintukod na sa sadsaran sang mga apostoles kag mga manalagna.’—Efeso 2:20.

3.   Ang Bag-o nga Jerusalem bahin sang isa ka gobierno. Ang dumaan nga Jerusalem amo ang kapital sang Israel, diin si Hari David, ang iya bata nga si Solomon, kag ang ila kaliwat naggahom “sa trono ni Jehova.” (1 Cronica 29:23) Gani ang Jerusalem nga gintawag “balaan nga siudad,” nagarepresentar sa Ginharian sang Dios halin sa pamilya ni David. (Nehemias 11:1) Ang Bag-o nga Jerusalem ginatawag man nga “ang balaan nga siudad,” nga ang mga miembro sini makaupod ni Jesus sa langit kag “magagahom sila sa duta subong mga hari.”—Bugna 5:9, 10; 21:2.

4.   Ang Bag-o nga Jerusalem magahatag sing mga pagpakamaayo sa mga tawo sa duta. Ang paglaragway sa Bag-o nga Jerusalem nga “nagapanaug halin sa langit gikan sa Dios,” nagapakita nga ginagamit ini sang Dios para sa mga hilikuton sa duta. (Bugna 21:2) Ginaangot sini nga ekspresyon ang Bag-o nga Jerusalem sa Ginharian sang Dios, nga gamiton sang Dios sa pagtuman sang iya kabubut-on “sa duta subong sang sa langit.” (Mateo 6:10) Ang katuyuan sang Dios para sa mga tawo sa duta nagalakip sini nga mga pagpakamaayo:

   •   Pagdula sang sala. “Ang suba sang tubig sang kabuhi” nagailig halin sa Bag-o nga Jerusalem kag nagasuplay sing tubig sa “mga kahoy sang kabuhi” nga “makapaayo sa mga pungsod.” (Bugna 22:1, 2) Ining pisikal kag espirituwal nga pag-ayo magadula sang sala kag matigayon sang mga tawo ang perpekto nga kabuhi, nga amo ang orihinal nga katuyuan sang Dios.—Roma 8:21.

   •   Maayo nga kaangtanan sang Dios kag sang tawo. Bangod sa sala, napahilayo ang mga tawo sa Dios. (Isaias 59:2) Paagi sa pagdula sang sala, matuman sing bug-os ini nga tagna: “Ang tolda sang Dios yara sa mga tawo, kag magaistar sia kaupod nila, kag sila mangin iya katawhan. Kag ang Dios mismo mangin kaupod nila.”—Bugna 21:3.

   •   Wala na sing pag-antos kag kamatayon. Paagi sa iya Ginharian, “pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.”—Bugna 21:4.