Ano ang Ginasiling sang Biblia Parte sa Pagpuasa?
Ang sabat sang Biblia
Sang panahon sang Biblia, ang pagpuasa ginabaton sang Dios kon husto ang motibo sang isa. Pero kon sala ang motibo, wala ini nagapahalipay sa iya. Sa karon, ang pagpuasa wala na ginapatuman sang Biblia sa mga tawo, pero wala man ini ginadumili.
Mga rason sang pagpuasa sang panahon sang Biblia
Pagpangayo sing bulig kag paggiya sang Dios. Ang mga tawo nga nagalakbay pakadto sa Jerusalem nagapuasa para ipakita nga sinsero ang ila pagpangabay sing bulig sa Dios. (Esdras 8:21-23) Kon kaisa, si Pablo kag si Bernabe nagapuasa man kon nagatangdo sing mga gulang sa kongregasyon.—Binuhatan 14:23.
Paghanda sa paghimo sang kabubut-on sang Dios. Sa tapos nga mabawtismuhan si Jesus, nagpuasa sia sa sulod sang 40 ka adlaw para ihanda ang iya kaugalingon sa paghimo sang kabubut-on sang Dios sa iya ministeryo.—Lucas 4:1, 2.
Paghinulsol sa sala nga nahimo sang una. Paagi kay propeta Joel, ginsilingan sang Dios ang indi matutom nga mga Israelinhon: “Magbalik kamo sa akon sa bug-os ninyo nga tagipusuon, nga nagapuasa kag nagahibi kag nagahaya.”—Joel 2:12-15.
Pagselebrar sang Adlaw sang Pagtumbas Para sa Sala. Lakip sa Kasuguan nga ginhatag sang Dios sa pungsod sang Israel amo ang sugo nga magpuasa sa Adlaw sang Pagtumbas Para sa Sala nga ginahimo kada tuig. a (Levitico 16:29-31) Kinahanglan nila nga magpuasa para ipahanumdom sa mga Israelinhon nga indi sila perpekto kag kinahanglan nila ang kapatawaran sang Dios.
Ano ang pila sa indi insakto nga mga motibo sa pagpuasa?
Para magpadayaw. Si Jesus nagsiling nga ang isa nga nagapuasa para sa Dios, dapat maghimo sini sing pribado. Buot silingon, sia lang kag ang Dios ang nakahibalo.—Mateo 6:16-18.
Para pamatud-an nga matarong ang isa. Ang pagpuasa wala nagahimo sa isa nga mas maayo sangsa iban sa moral ukon sa espirituwal.—Lucas 18:9-14.
Para tabunan ang hungod nga pagpakasala. (Isaias 58:3, 4) Ginabaton lamang sang Dios ang pagpuasa kon ang nagapuasa matinumanon kag mahinulsulon sa iya mga sala.
Para ipakita nga relihioso ang isa. (Isaias 58:5-7) Ang Dios pareho sa isa ka ginikanan nga wala gid nalipay kon ang iya kabataan napilitan lang sa pagpalangga sa iya.
Ginasugo bala ang mga Cristiano nga magpuasa?
Wala. Ginsugo sang Dios ang mga Israelinhon nga magpuasa kon Adlaw sang Pagtumbas Para sa Sala, pero gin-untat na ini sang gingawad ni Jesus ang mga sala sang mahinulsulon nga mga tawo. (Hebreo 9:24-26; 1 Pedro 3:18) Wala na ginapatuman sa mga Cristiano ang Kasuguan nga ginhatag sang Dios kay Moises, kag nalakip sa sini ang Adlaw sang Pagtumbas Para sa Sala. (Roma 10:4; Colosas 2:13, 14) Gani, depende na sa kada Cristiano kon bala mapuasa sia ukon indi.—Roma 14:1-4.
Para sa mga Cristiano, indi importante ang pagpuasa sa ila pagsimba. Ang Biblia wala nagsiling nga mangin malipayon ang isa kon magpuasa sia. Kundi ang matuod nga mga Cristiano mangin malipayon sa pagsimba kon sundon nila ang personalidad ni Jehova, ang “malipayon nga Dios.”—1 Timoteo 1:11; Manugwali 3:12, 13; Galacia 5:22.
Sayop nga mga pagpati parte sa pagtamod sang Biblia sa pagpuasa
Sayop nga pagpati: Nagsiling si apostol Pablo nga dapat magpuasa ang Cristiano nga mga mag-asawa.—1 Corinto 7:5, King James Version.
Ang kamatuoran: Ang pinakadaan nga manuskrito sang Biblia wala nagsambit sang pagpuasa sa 1 Corinto 7:5. b Maathag nga gindugang lang sang mga manugkopya ang ideya parte sa pagpuasa, indi lang sa sini nga bersikulo kundi pati na sa Mateo 17:21; Marcos 9:29; kag Binuhatan 10:30. Sa kalabanan nga mga translation sang Biblia subong, ginkuha ining gindugang lang kag sala nga ideya.
Sayop nga pagpati: Ang mga Cristiano dapat magpuasa para dumdumon ang pagpuasa ni Jesus sa sulod sang 40 ka adlaw sa kamingawan sa tapos sia mabawtismuhan.
Ang kamatuoran: Wala ginsugo ni Jesus ini nga klase sang pagpuasa. Kag wala man sing mabasa sa Biblia nga nagapakita nga ginsunod ini sang mga Cristiano sang una. c
Sayop nga pagpati: Dapat magpuasa ang mga Cristiano kon ginadumdom ang kamatayon ni Jesus.
Ang kamatuoran: Wala ginsugo ni Jesus ang iya mga disipulo nga magpuasa kon ginadumdom nila ang iya kamatayon. (Lucas 22:14-18) Nagsiling gid man si Jesus nga magapuasa ang iya mga disipulo kon mapatay sia. Pero indi ini sugo sa ila, kundi ginhambal lang niya kon ano ang matabo. (Mateo 9:15) Ang Biblia nagsiling nga ang mga Cristiano nga nagutom dapat magkaon anay sa ila balay antes magsaulog sang Memoryal sang kamatayon ni Jesus.—1 Corinto 11:33, 34.
a Ginsilingan sang Dios ang mga Israelinhon: “Pabudlayan ninyo ang inyo kaugalingon,” ukon “pit-an ninyo ang inyo mga kalag,” sa Adlaw sang Pagtumbas Para sa Sala. (Levitico 16:29, 31; Ang Biblia, PBS) Ginahunahuna sang iban nga ini nga ekspresyon nagapatuhoy sa pagpuasa. (Isaias 58:3) Gani ang Contemporary English Version nag-translate sini nga: “Dapat indi kamo magkaon para ipakita nga nasubuan kamo sa inyo mga sala.”
b Tan-awa ang A Textual Commentary on the Greek New Testament, ni Bruce M. Metzger, Third Edition, pahina 554.
c Parte sa kasaysayan sang 40 ka adlaw nga pagpuasa kon Kuaresma, ang New Catholic Encyclopedia nagsiling: “Sa una nga 300 ka tuig, ang kalawigon sang pagpuasa para sa paghanda sa kapiestahan sang paskua [Easter] indi maglampas sa isa ka semana; sa masami isa ukon duha lang ini ka adlaw. . . . Una nga ginsambit ang kalawigon nga 40 ka adlaw sa ikalima nga kanon sang Council of Nicaea (325), pero indi man sigurado ang iban nga scholar kon bala Kuaresma gid man ang ginapatuhuyan diri.”—Second Edition, Volume 8, pahina 468.
Basi Manamian Ka Man
SI JESUS—ANG DALAN, ANG KAMATUORAN, ANG KABUHI
Ngaa Wala Nagapuasa ang mga Disipulo ni Jesus?
Naggamit si Jesus sang ilustrasyon parte sa panit nga suludlan sang alak para sabton sila.
SABAT SA MGA PAMANGKOT SA BIBLIA
Patawaron Bala Ako sang Dios?
Binagbinaga ang ginasiling sang Biblia parte sa kon paano mapatawad sang Dios.
PARTE SA AMON
Mag-request nga Kadtuan Ka
Istoryahi ninyo ang isa ka pamangkot sa Biblia, ukon ang dugang nga impormasyon parte sa mga Saksi ni Jehova.