Ano ang Ginasiling sang Biblia Parte sa Cremation?
Ang sabat sang Biblia
Wala sing direkta nga ginasiling ang Biblia parte sa cremation ukon pagsunog sa bangkay. Wala man sing sugo sa Biblia kon bala ilubong ukon i-cremate ang patay.
Pero mabasa sa Biblia nga may pila ka matutom nga alagad sang Dios nga naglubong sang ila patay. Halimbawa, nangabudlay gid si Abraham para makabakal sing lulubngan para sa iya asawa nga si Sara.—Genesis 23:2-20; 49:29-32.
May mabasa man sa Biblia parte sa matutom nga mga indibiduwal nga nagsunog sang patay. Halimbawa, sang napatay sa inaway si Hari Saul sang Israel kag ang iya tatlo ka anak nga lalaki, ang ila mga bangkay ginpakahuy-an sa teritoryo sang ila kaaway. Sang mabalitaan ini sang matutom nga mga hangaway nga Israelinhon, ginkuha nila ang mga bangkay ni Saul kag sang iya mga anak, ginsunog ini, kag ginlubong. (1 Samuel 31:8-13) Ginapakita sa Biblia nga nagakaigo ang ginhimo nila sa mga bangkay sadto nga mga lalaki.—2 Samuel 2:4-6.
Ang kinaandan nga sayop nga mga pagpati parte sa cremation
Sala nga pagpati: Ang cremation wala nagapadungog sa lawas.
Ang kamatuoran: Ang Biblia nagsiling nga ang mga napatay nagabalik sa yab-ok, kag amo ini ang matabo sa mga bangkay kon madunot na ini. (Genesis 3:19) Ginapadasig sang cremation ini nga proseso kay ginahimo na sini nga abo ukon yab-ok ang lawas.
Sala nga pagpati: Sang panahon sang Biblia, ang mga tawo lamang nga wala ginakahamut-an sang Dios ang ginasunog pagkapatay nila.
Ang kamatuoran: Ginsunog ang mga bangkay sang pila ka indi matutom nga tawo, pareho kay Acan kag sang iya pamilya. (Josue 7:25) Pero wala ginapakita sini nga ginapatuman sang kasuguan nga sunugon ang mga bangkay sang indi matutom nga mga tawo. (Deuteronomio 21:22, 23) Subong sang ginsambit kaina, ang mga bangkay sang pila ka matutom nga tawo, pareho sa anak ni Hari Saul nga si Jonatan, ginsunog pagkapatay niya.
Sala nga pagpati: Indi na mabanhaw sang Dios ang gin-cremate nga bangkay.
Ang kamatuoran: Parte sa pagbanhaw sa mga patay, indi problema sa Dios kon ang patay ginlubong, gin-cremate, nalumos sa dagat kag wala na nakita ang lawas, ukon ginkaon sang mabangis nga mga sapat. (Bugna 20:13) Masarangan sang Labing Gamhanan nga maghimo sing bag-o nga lawas sang napatay nga tawo.—1 Corinto 15:35, 38.
Basi Manamian Ka Man
SABAT SA MGA PAMANGKOT SA BIBLIA
Ano ang Nagakatabo Kon Mapatay Ka?
Nakahibalo bala ang mga patay sa nagakatabo sa ila palibot?
IMPORTANTE NGA MGA PANUDLO SANG BIBLIA
Ano ang Kahimtangan sang mga Patay?
Ang Biblia nagapromisa nga maabot ang tion nga banhawon ang madamo nga tawo nga napatay, pareho sa ginhimo kay Lazaro.
PARTE SA AMON
Mag-request nga Kadtuan Ka
Istoryahi ninyo ang isa ka pamangkot sa Biblia, ukon ang dugang nga impormasyon parte sa mga Saksi ni Jehova.