Ang sabat sang Biblia

 Si Daniel isa ka Judiyo nga propeta nga nagkabuhi sang ikapito kag ikaanom nga siglo B.C.E. Ginhatagan sia sang Dios sang ikasarang nga mapaathag ang mga damgo kag makita ang matabo sa palaabuton paagi sa mga palanan-awon, kag gingiyahan sia sang Dios sa pagsulat sang isa ka libro sa Biblia nga gintawag man nga Daniel.—Daniel 1:17; 2:19.

Sin-o si Daniel?

 Si Daniel nagdaku sa Juda, isa ka ginharian nga nagalakip sang siudad sang Jerusalem kag sang templo sang mga Judiyo. Sang 617 B.C.E., nasakop ni Nabocodonosor, nga hari sang Babilonia, ang Jerusalem kag gindala niya “ang kilala nga mga tawo” bilang bihag sa Babilonia. (2 Hari 24:15; Daniel 1:1) Si Daniel, nga posible tin-edyer sadto, gindala man upod sa ila.

 Si Daniel kag ang iban pa nga mga pamatan-on nga lalaki (lakip sanday Sadrac, Mesac, kag Abednego) gindala sa palasyo sang Babilonia para hatagan sang espesyal nga paghanas sa pagserbisyo sa gobierno. Bisan ginpilit sila sang mga opisyal nga himuon ang mga butang nga kabalo sila nga sala, si Daniel kag ang iya tatlo ka abyan nagpabilin nga matutom sa ila Dios nga si Jehova. (Daniel 1:3-8) Sang matapos na ang ila tatlo ka tuig nga paghanas, gindayaw sila ni Hari Nabocodonosor bangod sa ila kaalam kag abilidad. Nagsiling ang hari nga “mas maayo sila sing napulo ka pilo sangsa tanan nga madyikero nga saserdote kag babaylan sa bug-os niya nga ginharian.” Gin-asayn niya si Daniel kag ang iya tatlo ka abyan sa palasyo.—Daniel 1:18-20.

 Pagligad sang madamo nga tuig, sang mga nobentahon na ang edad ni Daniel, ginpatawag sia sa palasyo. Si Belsasar, nga amo sadto ang hari sa Babilonia, nagpangabay kay Daniel nga isugid ang kahulugan sang sinulatan sang kamot nga makatilingala nga naggua sa pader. Sa paggiya sang Dios, ginpaathag ni Daniel nga ang Babilonia sakupon sang Emperyo sang Medo-Persia. Nasakop ang Babilonia sa sina mismo nga gab-i.—Daniel 5:1, 13-31.

 Sang Medo-Persia na ang nagagahom, gin-asayn si Daniel nga mangin mataas nga opisyal kag gusto ni Hari Dario nga pataasan pa gid ang iya posisyon. (Daniel 6:1-3) Nahisa ang iban nga mga opisyal kag nagplano sila nga patyon si Daniel paagi sa paghaboy sa iya sa lungib sang mga leon, pero ginluwas sia ni Jehova. (Daniel 6:4-23) Sang tigulang na si Daniel kag malapit na lang sia mapatay, nagpakita sa iya ang isa ka anghel kag duha ka beses sia nga ginpasalig nga sia “hamili gid nga tawo.”—Daniel 10:11, 19.

 Tan-awa ini nga mga kasaysayan sa drama base sa Biblia nga may duha ka bahin. May tig-ulo ini nga Daniel—Bug-os-Kabuhi nga Pagtuo.