Wala ginadumilian sang Biblia ang pag-sex, kundi ginapakita sini nga dulot ini sang Dios sa mga mag-asawa. Gintuga niya ang mga tawo nga “lalaki kag babayi” kag gintamod niya sila nga “tama gid kaayo.” (Genesis 1:​27, 31) Sang ginkasal niya ang una nga lalaki kag babayi, nagsiling sia nga dapat “mangin-isa sila ka unud.” (Genesis 2:​24) Nalakip sa sini ang ila kalipay sa pag-sex kag ang suod nga kaangtanan.

 Amo sini ang paglaragway sang Biblia sa kalipay nga mabatyagan sang bana sa pag-asawahay: “Magkalipay sa asawa sang imo pagkapamatan-on . . . Ang iya mga dughan magbusug sa imo sa tanan nga tion, kag magpabihag ka sa gihapon sang iya gugma.” (Hulubaton 5:​18, 19) Gintuyo man sang Dios nga mabatyagan ini sang mga asawa. Ang Biblia naglaygay sa mga bana kag mga asawa: “Ang tagsa sa ila dapat maghatag sing kabulosgan sa isa kag isa.”​—1 Corinto 7:3, Maayong Balita nga Biblia.

Mga limitasyon

 Gintuyo sang Dios nga ang pag-sex para lamang sa mag-asawa, subong sang ginasiling sa Hebreo 13:4: “Ang pag-asawahay mangin dungganon sa tanan, kag ang hiligdaan sang pag-asawahay mangin wala sing dagta, kay hukman sang Dios ang mga makihilawason kag mga makihilahion.” Ang mga mag-asawa dapat magtuman sang ila ginsumpaan kag mangin matutom sa isa kag isa. Mabatyagan nila ang kalipay, indi sa pag-una sang ila kaugalingon, kundi sa pagtuman sang prinsipio sa Biblia: “May kapin nga kalipay sa paghatag sangsa pagbaton.”​—Binuhatan 20:35.