Ang termino nga “Golden Rule” ukon “Bulawanon nga Pagsulundan” indi mabasa sa Biblia. Pero, amo ini ang pagtawag sang madamo nga tawo sa isa ka pagsulundan sang paggawi nga gintudlo ni Jesus. Sa iya bantog nga Sermon sa Bukid, si Jesus nagsiling: “Himua ninyo sa inyo isigkatawo ang tanan nga luyag ninyo nga himuon nila sa inyo.” (Mateo 7:12; Lucas 6:31) Ang Golden Rule ginpaathag man sa sini nga paagi: “Himua sa iban ang gusto mo nga himuon nila sa imo.”—Encyclopedia of Philosophy.

•  Ano ang Golden Rule?

•  Paano makabulig sa imo ang Golden Rule?

•  Ang Golden Rule bala nagakahulugan nga dapat maghatag ka para makabaton ka?

•  Paano mo matuman ang Golden Rule?

 Ang Golden Rule nagapalig-on sa aton nga trataron naton ang iban sa kon paano naton gusto nga tratuhon nila kita. Halimbawa, gusto sang kalabanan nga tawo nga respetuhon sila sang iban, pakitaan sing kaayo, kag palanggaon. Gani, amo ina ang dapat naton ‘himuon’ sa iban nga tawo.—Lucas 6:31.

 Makabulig ang Golden Rule sa halos tanan nga sitwasyon sa aton kabuhi. Halimbawa, makabulig ini . . .

•   Para magbakod ang relasyon sang mag-asawa.—Efeso 5:28, 33.

•   Para mapadaku sing maayo sang mga ginikanan ang ila kabataan.—Efeso 6:4.

•   Para mangin maayo ang relasyon sang mga mag-abyan, magkaingod, kag magkaupod sa trabaho.—Hulubaton 3:27, 28; Colosas 3:13.

 Ang prinsipio sa Golden Rule pareho sa kalabanan nga prinsipio nga makita sa Daan nga Katipan. Ining pagsulundan nga gintudlo ni Jesus “amo . . . ang kahulugan sang Kasuguan [ang una nga lima ka libro sang Biblia] kag sang sinulatan sang mga Manalagna [libro sang mga tagna].” (Mateo 7:12) Buot silingon, ang Golden Rule nagatudlo sa aton sang importante nga kamatuoran nga makita sa Daan nga Katipan: higugmaa ang imo isigkatawo.—Roma 13:8-10.

 Wala. Ang Golden Rule parte sa paghatag. Sang gintudlo ni Jesus ang Golden Rule, ginpadaku niya kon paano naton dapat trataron ang tanan, pati ang aton mga kaaway. (Lucas 6:27-31, 35) Gani, ang Golden Rule nagapalig-on sa aton nga maghimo sing maayo sa tanan nga tawo.

1.  1. Magpanilag. Panilagi sing maayo ang mga tawo sa imo palibot. Halimbawa, mahimo nakita mo ang isa ka tawo nga nabudlayan magbitbit sang iya pinamakal, nabalitaan mo nga naospital ang isa mo ka kaingod, ukon natalupangdan mo nga nasubuan ang isa mo ka kaupod sa trabaho. Kon ‘ginapangita mo ang kaayuhan sang iban,’ posible gid nga may mahambal ka ukon may mahimo para mabuligan sila.—Filipos 2:4.

2.  2. Magpakita sing empatiya. Ibutang ang imo kaugalingon sa lugar sang iban. Kon ikaw ang ara sa iya sitwasyon, ano ang imo batyagon? (Roma 12:15) Tinguhai nga intiendihon ang ginabatyag sang iban. Magapahulag ini sa imo nga buligan sila.

3.  3. Mag-adjust. Dumduma nga lainlain ang kada tawo. Ang gusto sang isa nga himuon sa iya, mahimo nga indi pareho sa gusto mo nga himuon sang iban sa imo. Gani, bisan pa madamo ka sing puede himuon para sa iban, hibalua kon ano gid ang gusto nila nga himuon mo para sa ila. Kon himuon mo ini, sigurado gid nga pasalamatan nila ang imo ginhimo.—1 Corinto 10:24.