Sin-o si Maria Magdalena?

I-PLAY

Ang sabat sang Biblia

Si Maria Magdalena isa ka matutom nga sumulunod ni Jesucristo. Ang iya ngalan nga Magdalena, mahimo ginkuha sa ngalan sang banwa sang Magdala (posible nga Magadan). Malapit ini sa Dagat sang Galilea kag posible nga nakaistar si Maria didto sadto.

Si Maria Magdalena isa sa mga babayi nga nag-upod kay Jesus kag sa iya mga disipulo, kag nagsakdag sang ila materyal nga kinahanglanon. (Lucas 8:1-3) Nasaksihan niya ang pagpatay kay Jesus, kag isa sia sa mga nahauna nga nakakita kay Jesus pagkatapos mabanhaw si Jesus.—Marcos 15:40; Juan 20:11-18.

Si Maria Magdalena bala isa ka prostityut ukon makihilawason nga babayi?

Ang Biblia wala nagsiling nga si Maria Magdalena isa ka prostityut. Isa lang ang ginsiling sini parte sa ginhalinan ni Maria Magdalena, nga ginpagua ni Jesus ang pito ka demonyo halin sa iya.—Lucas 8:2.

Diin naghalin ang ideya nga isa sia ka prostityut sadto? Mga siniglo sang patay na sia, may pila nga nangangkon nga sia ang babayi nga wala masambit ang ngalan (posible nga isa ka prostityut) nga nagbasa sang mga tiil ni Jesus sang iya mga luha kag nagpahid sini sang iya buhok. (Lucas 7:36-38) Pero, ini nga pangangkon wala sang basihan sa Biblia.

Si Maria Magdalena bala “apostol sang mga apostoles”?

Indi. Ang simbahan sang Katoliko nagtawag kay Maria nga “Santa Maria Magdalena” kag “apostol sang mga apostoles” kay sia ang una nga nagbalita sa mga apostoles nga nabanhaw si Jesus. (Juan 20:18) Pero indi ini rason nga dapat sia tawgon nga apostol. Kag wala gid sing mabasa sa Biblia nga gintawag sia nga apostol.—Lucas 6:12-16.

Ang Biblia nakompleto sang manugtapos na ang unang siglo C.E. Pero, sang ikaanom lang nga siglo ginhimo sang mga awtoridad sang simbahan nga santa si Maria Magdalena. Ang mga sinulatan sang ikaduha kag ikatlo nga mga siglo, nga indi bahin sang Biblia, nagsiling nga may pila ka apostoles si Jesus nga nahisa kay Maria. Wala gid sing basihan sa Kasulatan ining himuhimo nga mga istorya.