Matuod Gid Bala ang Yawa?

I-PLAY

Ang sabat sang Biblia

Huo, matuod ang Yawa. Sia ang “manuggahom sang kalibutan,” ang espiritu nga tinuga nga nangin malaut kag nagrebelde sa Dios. (Juan 14:30; Efeso 6:11, 12) Ginasugid sang Biblia ang personalidad sang Yawa paagi sa masunod nga mga ngalan kag deskripsion:

Satanas, nga nagakahulugan “Manugpamatok.”—Job 1:6.
Yawa, nga nagakahulugan “Manugpasipala.”—Bugna 12:9.
Man-ug, nga ginagamit sa Biblia sa pagpatuhoy sa isa nga “Manugdaya.”—2 Corinto 11:3.
Panulay.—Mateo 4:3.
Butigon.—Juan 8:44.

Indi lamang simbulo sang kalautan

Ang iban nagapati nga si Satanas nga Yawa simbulo lamang sang kalautan nga ara sa sulod naton. Pero, may mabasa sa Biblia nga pag-istoryahanay sang Dios kag ni Satanas. Ang Dios perpekto, gani indi mahimo nga nagapakig-istorya sia sa malaut nga bahin sang iya kaugalingon. (Deuteronomio 32:4; Job 2:1-6) Isa pa, ginsulay man ni Satanas si Jesus, nga wala sing sala. (Mateo 4:8-10; 1 Juan 3:5) Gani, ginapakita sang Biblia nga ang Yawa matuod kag indi lamang simbulo sang kalautan.

Matingala bala kita nga madamo nga tawo ang wala nagapati nga matuod ang Yawa? Indi, kay ang Biblia nagsiling nga nagapangdaya si Satanas para matigayon ang iya gusto. (2 Tesalonica 2:9, 10) Ang isa sa iya mga pahito amo ang pagpapati sa mga tawo nga wala sia nagaluntad.—2 Corinto 4:4.

Dugang pa nga sayop nga pagpati parte sa Yawa

Pagpati sang iban: Ang isa pa ka ngalan sang Yawa amo ang Lucifer.

Kamatuoran: Ang Hebreo nga tinaga nga gina-translate sa iban nga Biblia nga “Lucifer” nagakahulugan ‘kabugwason.’ (Isaias 14:12) Ginapaathag sa sini nga mga bersikulo nga ini nga termino nagapatuhoy sa dinastiya, ukon linya sang mga hari, sang Babilonia nga pakahuy-an sang Dios bangod sang pagkamatinaastaason sini. (Isaias 14:4, 13-20) Ang ekspresyon nga ‘kabugwason’ gingamit para yagutaon ang Babilonia sang ginlaglag ini.

Pagpati sang iban: Si Satanas ginagamit sang Dios para mahukman ang mga tawo.

Kamatuoran: Si Satanas kaaway sang Dios, indi alagad. Ginapamatukan kag ginasumbong ni Satanas nga Yawa ang mga tawo nga nagaalagad sa Dios.—1 Pedro 5:8; Bugna 12:10.