Huo, sa kahulugan nga ginabag-o niya ang iya panimuot kon bag-uhon man sang mga tawo ang ila ginahimo. Halimbawa, sang nagpadala ang Dios sang mensahe sang paghukom sa katawhan sang Israel sadto, nagsiling sia: “Ayhan ang mga tawo magapamati kag magauntat sang ila malaut nga pagginawi. Kon mag-untat sila, dayon magabaylo ako sang akon hunahona nahanungod sa kalaglagan nga akon ginplano nga ipadala sa ila tungod sang ila malaut nga mga binuhatan.”​—Jeremias 26:3, Maayong Balita nga Biblia, HPV.

 Madamo nga translation sang Biblia ang nagasiling sa sini nga bersikulo nga ang Dios “naghinulsol” sa iya gintuyo nga kalaglagan, nga mahimo hangpon nga nagsala sia. Pero ang orihinal nga Hebreo nga tinaga mahimo magakahulugan sing “pagbag-o sang pensar ukon katuyuan.” Ang isa ka iskolar nagsulat: “Kon magbag-o ang paggawi sang tawo magabag-o man ang paghukom sang Dios.”

 Siempre, bisan mabag-o sang Dios ang iya pensar, wala ini nagakahulugan nga dapat gid niya ini bag-uhon. Binagbinaga ang pila ka sitwasyon diin ang Biblia nagasiling nga wala ginbag-o sang Dios ang iya pensar:

•   Wala gintugutan sang Dios nga bag-uhon ni Balak ang Iya pensar kag pakamalauton ang pungsod sang Israel.​—Numeros 23:18-​20.

•   Sang si Hari Saul sang Israel padayon nga nagpakasala, wala ginbag-o sang Dios ang iya pensar nga isikway sia subong hari.​—1 Samuel 15:28, 29.

•   Tumanon sang Dios ang iya promisa nga himuon ang iya Anak nga saserdote sing dayon. Indi gid pagbag-uhon sang Dios ang Iya pensar.​—Salmo 110:4.

 Huo, narekord sa Biblia nga ang Dios nagsiling: “Ako nga GINOO wala nagabaylo.” (Malaquias 3:6) Sing kaanggid, ang Biblia nagasiling nga ang Dios “wala sing pagbag-o subong sang pagbag-obag-o sang landong.” (Santiago 1:​17) Pero wala ini nagasumpakil sa ginasiling sang Biblia nga ang Dios nagabag-o sang iya pensar. Wala nagabag-o ang Dios sa kahulugan nga ang iya personalidad kag mga talaksan sang gugma kag hustisya wala nagabag-o. (Deuteronomio 32:4; 1 Juan 4:8) Pero makahatag sia sing lainlain nga instruksion sa mga tawo sa lainlain nga tion. Halimbawa, ginhatagan sang Dios si Hari David sing magkatuhay nga instruksion sa iya duha ka pagpakig-away, pero pareho ini nga nagmadinalag-on.​—2 Samuel 5:​18-​25.

 Wala. Pero naghinulsol sia nga ang kalabanan sa mga tawo nagtalikod ukon nagsikway sa iya. Bangod sa kahimtangan antes sang Anaw sang panahon ni Noe, nagsiling ang Biblia: “Naghinulsol [ang GINOO] nga gintuga niya ang mga tawo kag ginpapuyo sa duta. Daku gid ang iya paghinulsol.” (Genesis 6:6, HPV) Sa sini nga bersikulo, ang tinaga nga “naghinulsol” naghalin sa Hebreo nga tinaga nga mahimo magakahulugan “pagbag-o sang pensar.” Ginbag-o sang Dios ang iya pensar parte sa kalabanan nga tawo nga nagkabuhi antes sang Anaw bangod nangin malaut sila. (Genesis 6:​5, 11) Bisan pa nasubuan sia nga ginpili nila ang malaut nga dalanon, wala niya ginbag-o ang iya panimuot sa bug-os nga katawhan. Ang matuod, wala niya ginpapas ang katawhan sa Anaw paagi sa pagluwas kay Noe kag sa iya pamilya.​—Genesis 8:​21; 2 Pedro 2:​5, 9.