Mabakod ang basehan sang mga iskolar sa pagpati nga nagluntad gid si Jesus. Parte sa mga komento sang una kag ikaduhang siglo nga mga historian parte kay Jesus kag sa mga Cristiano sang una, ang Encyclopædia Britannica, 2002 nga Edisyon, nagsiling: “Ining magkatuhay nga mga report nagapamatuod nga sang una bisan ang mga nagapamatok sa Cristianismo wala gid nagduhaduha nga nagluntad si Jesus.” Suno pa sa sini nga reperensia, ginbaisan lamang ini sang katapusan nga bahin sang ika-18 nga siglo asta sang una nga bahin sang ika-20 nga siglo.

 Sang 2006, ang libro nga Jesus and Archeology nagsiling: “Wala ginaduhaduhaan sang kilala nga mga iskolar subong kon bala may nagluntad gid man nga Judiyo nga nagahingalan Jesus nga anak ni Jose; madamo sa ila ang nagabaton nga bastante na ang aton impormasyon parte sa iya binuhatan kag panudlo.”

 Ginalaragway sang Biblia si Jesus subong isa ka matuod nga tawo. Ginsambit sini ang mga ngalan sang iya katigulangan kag kaparyentehan. (Mateo 1:1; 13:55) Ginsambit man sini kon sin-o ang kilala nga mga gumalahom sang panahon ni Jesus. (Lucas 3:1, 2) Sa bulig sining mga detalye, napamatud-an sang mga researcher nga sibu gid ang rekord sang Biblia.