Huo. Ginapakita sang Biblia kag sang mga eksperiensia nga ginasabat sang Dios ang mga pangamuyo. Ang Biblia nagasiling: “Tumanon [sang Dios] ang handum sang mga nagakahadluk sa iya, pamatian man niya ang ila pagtuaw, kag luwason sila.” (Salmo 145:19) Pero sa imo nagadepende kon bala pamatian sang Dios ukon indi ang imo mga pangamuyo.

Kon ano ang importante sa Dios

•   Ang pagpangamuyo sa Dios, indi kay Jesus, kay Maria, sa mga santos, mga anghel, ukon mga imahen. Si Jehova nga Dios lamang ang “nagapamati sang pangamuyo.”​—Salmo 65:2.

•   Ang pagpangamuyo suno sa kabubut-on, ukon mga ginapatuman, sang Dios nga mabasa sa Biblia.​—1 Juan 5:14.

•   Ang pagpangamuyo sa ngalan ni Jesus, bilang pagkilala sa iya awtoridad. “Wala sing makakadto sa Amay kon indi paagi sa akon,” siling ni Jesus.​—Juan 14:6.

•   Ang pagpangamuyo nga may hugot nga pagtuo, kag pagpangayo sing dugang nga pagtuo kon kinahanglanon.​—Mateo 21:22; Lucas 17:5.

•   Ang pagkamapainubuson kag pagkasinsero. Ang Biblia nagasiling: “Ang GINOO mataas, apang sia nagatamud sa mga kubus.”​—Salmo 138:6.

•   Ang pagpangamuyo pirme. Si Jesus nagsiling: “Padayon sa pagpangayo, kag hatagan kamo.”​—Lucas 11:9.

Kon ano ang indi importante sa Dios

•   Ang imo rasa ukon nasyonalidad. “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.”​—Binuhatan 10:34, 35.

•   Ang imo posisyon. Makapangamuyo ka sa Dios samtang nagapungko, nagaduko, nagaluhod, ukon nagatindog.​—1 Cronica 17:16; Nehemias 8:6; Daniel 6:10; Marcos 11:25.

•   Ang kabaskugon sang imo tingog. Bisan bation man ukon hipos ang imo pagpangamuyo, ginapamatian ini sang Dios.​—Nehemias 2:1-6.

•   Ang sahi sang imo problema. Gamay man ukon mabug-at ang imo problema, ginapalig-on ka sang Dios nga ‘itugyan sa iya ang tanan mo nga kabalaka, bangod nagaulikid sia sa imo.’​—1 Pedro 5:7.