Sanday Adan kag Eva ang una nga mga tawo nga nakasala. Wala sila nagtuman sa Dios kay ginkaon nila ang bunga sang “kahoy sang pagkilala sang maayo kag malain,” gani nakahimo sila sang ginatawag sang madamo nga orihinal nga sala. a (Genesis 2:16, 17; 3:6; Roma 5:19) Wala gintugutan sanday Adan kag Eva nga magkaon sang bunga sini nga kahoy kay nagarepresentar ini sa awtoridad sang Dios, ukon kinamatarong sa pagdesisyon kon ano ang husto kag sala para sa mga tawo. Bangod nagkaon sila sang bunga sini nga kahoy, nagdesisyon sila para sa ila kaugalingon kon ano ang husto kag sala. Gani ginsikway nila ang awtoridad sang Dios sa moral.

•  Ano ang epekto sang “orihinal nga sala” kanday Adan kag Eva?

•  Ano ang epekto sang “orihinal nga sala” sa aton?

•  Mahilway pa bala kita sa epekto sang “orihinal nga sala”?

•  Mga sala nga pagpati parte sa “orihinal nga sala”

 Bangod nakasala sanday Adan kag Eva, nagtigulang sila kag napatay. Ginguba nila ang ila pagpakig-abyan sa Dios kag nadula nila ang kahigayunan nga mabuhi sing wala katapusan nga may perpekto nga panglawas.—Genesis 3:19.

 Napanubli sang tanan nga kaliwatan nanday Adan kag Eva ang ila sala. Daw pareho ini sa mga kabataan nga nakapanubli sang depekto nga genes sa ila mga ginikanan. (Roma 5:12) Gani, tanan nga tawo nabun-ag “sa sala,” b buot silingon natawo kita nga indi perpekto kag masami makahimo gid kita sing sala.—Salmo 51:5; Efeso 2:3.

 Bangod sang napanubli nga sala, ukon indi kita perpekto, nagamasakit kita, nagatigulang, kag nagakapatay. (Roma 6:23) Nagaantos man kita bangod sa resulta sang aton nahimo nga sala kag sa sala sang iban.—Manugwali 8:9; Santiago 3:2.

 Huo. Ang Biblia nagasiling nga napatay si Jesus bilang “nagatumbas nga halad para sa aton mga sala.” (1 Juan 4:10, footnote) Ang halad ni Jesus makahilway sa aton sa epekto sang napanubli nga sala kag nagahatag sa aton sing kahigayunan nga matigayon ang nadula nanday Adan kag Eva—ang kabuhi nga wala sing katapusan nga may perpekto nga panglawas.—Juan 3:16. c

 Sala nga pagpati: Bangod sang orihinal nga sala, indi na gid kita makapakig-abyan sa Dios.

 Kamatuoran: Wala kita ginabasol sang Dios sa ginhimo nanday Adan kag Eva. Nahangpan niya nga indi kita perpekto, kag wala sia nagapaabot sang indi naton mahimo. (Salmo 103:14) Bisan pa nagaantos kita bangod sang aton napanubli nga sala, may kahigayunan kita kag pribilehiyo nga mangin abyan sang Dios.—Hulubaton 3:32.

 Sala nga pagpati: Mahilway ang isa sa orihinal nga sala kon magpabawtismo sia, gani kinahanglan nga mabawtismuhan ang mga lapsag.

 Kamatuoran: Matuod nga dapat kita magpabawtismo para maluwas, pero ang pagtuo sa halad ni Jesus amo lamang ang makatinlo sa isa sa sala. (1 Pedro 3:21; 1 Juan 1:7) Ang matuod nga pagtuo nabase sa ihibalo, gani imposible sa mga lapsag nga makatigayon sing pagtuo. Amo nga wala ginatudlo sang Biblia nga bawtismuhan ang mga lapsag. Wala ini ginhimo sang mga Cristiano sang una. Ginbawtismuhan nila indi ang mga lapsag, kundi ang “mga lalaki kag mga babayi” nga may pagtuo sa Pulong sang Dios.—Binuhatan 2:41; 8:12.

 Sala nga pagpati: Ginpakamalaut sang Dios ang mga babayi kay si Eva ang una nga nagkaon sang gindumilian nga prutas.

 Kamatuoran: Imbes nga pakamalauton ang mga babayi, ginpakamalaut sang Dios “ang orihinal nga man-ug, ang isa nga ginatawag Yawa kag Satanas,” nga nagsulay kay Eva nga magpakasala. (Bugna 12:9; Genesis 3:14) Dugang pa, para sa Dios, si Adan ang may panguna nga salabton sa orihinal nga sala, indi ang iya asawa.—Roma 5:12.

 Ngaa nagsiling ang Dios nga gamhan ni Adan ang iya asawa? (Genesis 3:16) Sang ginsiling ini sang Dios, indi buot silingon nga ginapasugtan niya ini nga batasan. Ginatagna lang niya ang malain nga resulta sang sala sa relasyon sang lalaki kag babayi. Gusto sang Dios nga higugmaon kag padunggan sang lalaki ang iya asawa kag tahuron gid ang mga babayi.—Efeso 5:25; 1 Pedro 3:7.

 Sala nga pagpati: Ang orihinal nga sala amo ang pagpakig-sex.

 Kamatuoran: Ang orihinal nga sala indi amo ang pagpakig-sex bangod sa masunod nga mga rason:

•   Sang ginsugo sang Dios si Adan nga indi magkaon sang bunga sang kahoy sang pagkilala sang maayo kag malain, sia pa lang isa kag wala pa sia sang asawa.—Genesis 2:17, 18.

•   Ginsugo sang Dios sanday Adan kag Eva nga ‘magpanganak kag magdamo,’ ukon magpamata sila. (Genesis 1:28) Indi gid rasonable kag mapintas ang Dios kon silutan niya ang una nga mag-asawa kay gintuman nila ang ginsugo man niya sa ila.

•   Indi dungan nga nagpakasala sanday Adan kag Eva. Una nga nagpakasala si Eva, dayon ang iya bana.—Genesis 3:6.

•   Wala ginapakamalaut sang Biblia ang pagpakig-sex sang mag-asawa.—Hulubaton 5:18, 19; 1 Corinto 7:3.