Huo. Ginpakita ni Jesus nga ang iya mga sumulunod puede makapabulong sang nagsiling sia nga “ang tawo nga maayo ang lawas wala nagakinahanglan sang doktor, kundi ang nagamasakit lang.” (Mateo 9:12, Ang Pulong sang Dios, APD) Bisan pa nga ang Biblia indi libro parte sa medisina, may mga prinsipio man ini nga nagagiya sa mga gusto magpahamuot sa Dios.

Mga dapat mo ipamangkot sa imo kaugalingon

 1. Naintiendihan ko bala ang ginapanugyan nga pagbulong? Nagalaygay ang Biblia nga dapat naton pangitaon ang masaligan nga impormasyon sa baylo nga ‘magpati sa tagsa ka polong.’—Hulubaton 14:15.

 2. Kinahanglan ko bala magpatan-aw sa iban nga doktor? Makabulig ang ‘madamo nga manuglaygay’ labi na gid kon serioso ang imo kondisyon.—Hulobaton 15:22, Biblia sang Katilingban sang mga Kristiano.

 3. Ini bala nga pagbulong nagalapas sa sugo sang Biblia nga “maglikaw . . . sa dugo”?—Binuhatan 15:20.

 4. Nagagamit bala sing espiritismo para mahibaluan ukon para mabulong ang akon balatian? Ginapakamalaut sang Biblia ang “espiritismo.” (Galacia 5:19-21) Para mahibaluan mo kon bala may nadalahig nga espiritismo, binagbinaga ang mga pamangkot subong sang:

•   Nagagamit bala sing espiritismo ang nagabulong sa akon?

•   Ang paagi bala sang pagbulong nabase sa pagpati nga puede ka pamasakiton sang naakig nga mga dios ukon sang imo mga kaaway nga nagapanghiwit?

•   May mga halad bala, orasyon, ukon iban pa nga espiritistiko nga mga ritwal nga ginahimo sa paghanda sang bulong ukon pagbulong?

 5. Sobra na bala ang akon kabalaka sa akon panglawas? Ang Biblia nagalaygay: “Ipakita sa tanan nga tawo ang inyo pagkamakatarunganon.” (Filipos 4:5) Ang pagkarasonable makabulig sa imo nga unahon ang “mas importante nga mga butang,” subong sang imo espirituwalidad.—Filipos 1:10; Mateo 5:3.