Madugay na nga ginpahamtang sang aton Manunuga ang mga kasuguan para sa pag-asawahay antes pa ini ginsugdan sang mga gobierno. Ang una nga tulun-an sang Biblia nagasiling sa aton: “Bayaan sang lalaki ang iya amay kag ang iya iloy kag magahiusa sa iya asawa, kag mangin-isa sila ka unud.” (Genesis 2:24) Ang Hebreo nga tinaga nga “asawa,” suno sa Vine’s Expository Dictionary of Biblical Words, “nagapatuhoy sa isa ka tawo nga babayi.” Ginkompirmar ni Jesus nga yadtong gintingob sa pag-asawahay dapat “lalaki kag babayi” lamang.—Mateo 19:4.

 Kon amo, gintuyo sang Dios nga ang pag-asawahay mangin permanente kag suod nga kaangtanan sa tunga sang isa ka lalaki kag isa ka babayi. Ginhimo ang lalaki kag ang babayi para sa isa kag isa agod mapun-an nila ang emosyonal kag seksuwal nga kinahanglanon kag para makaagom sing kabataan.