Wala sing mabasa sa Biblia nga isa ka grupo sang “pito ka makamamatay nga sala.” Pero ginatudlo sini nga ang isa indi maluwas kon nagahimo sia sing mabug-at nga mga sala. Halimbawa, ang Biblia nagsiling nga ang mabug-at nga mga sala pareho sang seksuwal nga imoralidad, pagsimba sa mga diosdios, espiritismo, pagsilabo sang kaakig, kag pagpahubog “mga buhat sang unod.” Dayon nagsiling ini: “Ang mga nagahimo sini indi makapanubli sang Ginharian sang Dios.”​—Galacia 5:​19-​21. a

Indi bala may mabasa man sa Biblia nga lista sang ‘pito ka butang nga kangil-aran sa Ginoo’?

 Huo. Suno sa Ang Biblia, ang Hulubaton 6:16 nagsiling: “May anum ka butang nga ginadumtan ang GINOO, pito nga kangil-aran sa iya.” Pero, ang mga sala nga ginsambit sa masunod nga mga bersikulo sa Hulubaton 6:​17-​19 wala nagapakita nga amo lang ini tanan. Kundi, ginapakita lang sini ang mga kategoriya nga nagarepresentar sang tanan nga klase sang sala, pati na sa ginapamensar, ginahambal, kag ginahimo. b

Ano ang buot silingon sang ekspresyon nga “makamamatay nga sala”?

 Sa iban nga bersion sang Biblia mabasa ang kaanggid sini sa 1 Juan 5:​16. Halimbawa ang Maayong Balita nga Biblia nagsiling: “May sala nga ikamatay.” Gani ang ekspresyon nga “makamamatay nga sala” ukon “sala nga ikamatay” mahimo man i-translate nga “sala nga nagadul-ong sa kamatayon.” Ano ang kinalain sang “sala nga nagadul-ong sa kamatayon” sa “sala nga wala nagadul-ong sa kamatayon”?​—1 Juan 5:16.

 Maathag nga ginapakita sang Biblia nga ang tanan nga sala nagadul-ong sa kamatayon. Pero puede kita maluwas sa sala kag kamatayon paagi sa halad nga gawad ni Jesucristo. (Roma 5:​12; 6:​23) Gani ang “sala nga nagadul-ong sa kamatayon” amo ang sala nga indi matabunan sang gawad sang Cristo. Ang tawo nga nagahimo sini nga klase sang sala wala gid sing plano nga magbag-o. Ang Biblia nagsiling man nga ini nga sala “indi mapatawad.”​—Mateo 12:31; Lucas 12:10.