Madamo nga magnobyahanay ang naga-live-in antes magpakasal. Ginahimo ini sang iban bangod gusto nila testingan kon bala magsahuay sila ukon para mabal-an nila kon mangin madinalag-on ang ila pag-asawahay. Ang pag-live-in bala maayo nga ideya?

Sa sini nga artikulo

•  Ano ang ginasiling sang Biblia?

•  Ang pag-live-in bala makabulig para mangin handa ka sa pagpakasal?

•  Ang pag-live-in bala makabulig sa imo nga makakinot sing kuarta?

•  Ang pag-live-in bala makabulig sa imo nga mapili sing insakto ang imo pakaslan?

•  Ano ang husto nga desisyon?

•   Sa Biblia, malain ang pagpakig-sex kon wala pa makasal. Halimbawa, nagasiling ini: “Maglikaw sa seksuwal nga imoralidad.” (1 Tesalonica 4:3; 1 Corinto 6:18) Nalakip dira ang pag-sex sang naga-live-in nga magnobyahanay, bisan pa may plano man sila nga magpakasal sa ulihi. a Ang mga sugo sang Biblia makabulig sa magnobyahanay nga malikawan ang pagbusong nga wala pa makasal kag iban pa nga malain nga resulta bangod sang pag-live-in.

•   Ang kasal kahimusan halin sa Dios. Sang ginsugdan niya ini, sia nagsiling: “Bayaan sang lalaki ang iya amay kag ang iya iloy kag magahiusa sia sa iya asawa, kag sila mangin isa ka unod.” (Genesis 2:24) Kon ang lalaki kag babayi nagpanumpa sa isa kag isa paagi sa pagpakasal, mas magapalanggaanay pa gid sila kag mangin mas mabakod ang ila pag-asawahay.

 Ang iban nagasiling nga huo. Nagapensar sila nga kon mag-live-in sila kag mag-updanay sa paghimo sang mga ulubrahon sa balay, makita nila kon ano ang batasan sang kada isa kag mabal-an nila kon bala magasahuay sila sa ulihi. Pero, para mangin madinalag-on ang pag-asawahay, importante nga may panumpa sila sa isa kag isa.

 Paano padayon nga mag-updanay ang magnobyahanay sa maayo kag mabudlay nga tion? Ang pag-live-in antes makasal, indi amo ang sekreto para mangin madinalag-on ang pag-asawahay. Bangod mahimo pamensaron nila nga puede lang nila untaton ang ila relasyon bisan san-o nila gusto. Mangin madinalag-on ang isa ka relasyon kon ang babayi kag lalaki nagpanumpa sa isa kag isa kag nagabuligay sila para masolbar ang mga problema.

 Ang punto: Imbes nga nagahanda sa pagpakasal, ang magnobyahanay nga nag-live-in basi nagahanda para sa pagbulagay.

 Prinsipio sa Biblia: “Kon ano ang ginasab-ug sang tawo, ini man ang iya anihon.”—Galacia 6:7.

 Ang iban nagasiling nga huo. Base sa isa ka surbe, nahibaluan sang Pew Research Center nga sa United States, mga apat sa pulo ka adulto ang naga-live-in bangod abi nila makakinot sila sing kuarta. Pero, pagligad sang tion, madamo nga tawo nga ginsurbe ang nagsiling nga indi pa sila handa magpakasal bangod kulang pa ang ila kuarta.

 Ang pag-live-in antes makasal may iban pa nga indi maayo nga resulta, ilabi na sa mga babayi. Halimbawa, kon magbulagay ang naga-live-in, ang mga babayi ang masami nga nagapadaku sa bata.

 Ang punto: Mas madamo ang malain nga resulta sang pag-live-in antes makasal sangsa ginapensar sang iban nga benepisyo sini.

 Prinsipio sa Biblia: “Ako si Jehova nga imo Dios, ang nagatudlo sa imo para sa imo kaayuhan.”—Isaias 48:17.

 Ang iban nagasiling nga huo. Pero, “wala marealisar sang mga tawo nga naga-live-in nga mas mabudlay magbulagay bangod nag-updanay na sila antes magpakasal,” siling sang libro nga Fighting for Your Marriage. Ngaa? Mahimo marealisar sang magnobyahanay nga naga-live-in nga indi sila magsahuay. Pero bangod may ara sila sang ginaatipan nga sapat, ginaarkilahan nga balay, ukon wala ginapaabot nga pagbusong, nagsiling ang mga researcher nga mas ginapili nila nga mag-updanay na lang bangod naanad na sila kag indi nila mahimo nga magbulagay bisan pa amo ini ang maayo para sa ila. b Buot silingon, “ang iban nga tawo nga mabulagay na kuntani antes magpakasal, nagadesisyon nga magpakasal na lang bangod mas mahapos para sa ila nga padayunon na lang ang ila relasyon,” dugang pa sang Fighting for Your Marriage.

 Ang punto: Imbes makabulig para makahimo ka sang maayo nga desisyon, ang pag-live-in posible nga magpabudlay sa pag-untat sang isa ka indi malipayon nga relasyon.

 Prinsipio sa Biblia: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.

 Malikawan mo ang malain nga resulta sang pag-live-in antes makasal kag mangin madinalag-on ang inyo pag-asawahay. Paano? Paagi sa pagsunod sa mga sugo sang Biblia parte sa pag-asawahay. Kilalaha anay sing maayo ang tawo nga gusto mo pakaslan antes kamo mag-updanay bilang mag-asawa. Mas maayo kon pilion mo ang imo pakaslan bangod pareho kamo sang batasan kag ginapatihan. Mas importante ini sangsa mga naluyagan mo sa iya sa pisikal.

 May laygay ang Biblia nga makabulig sa imo para mangin malipayon kag mabakod ang pag-asawahay. c Halimbawa, ang Biblia may mga prinsipio nga makabulig para . . .

•   malikawan ang pagluib

•   mangin maayo ka nga bana ukon asawa

•   makita ang indi maayo nga mga kinaiya sang isa ka tawo samtang naga-date

 Para sa dugang nga impormasyon parte sa sini nga mga topiko, tan-awa ang “Pag-asawahay kag Pamilya” nga seksion sa jw.org.

 Prinsipio sa Biblia: “Ang pagsulat sa bug-os nga Kasulatan gintuytuyan sang Dios kag mapuslanon sa pagpanudlo.”—2 Timoteo 3:16.