Ang pila ka mag-asawa nga daw indi na maayo ang relasyon sa isa kag isa nagasiling nga mas maayo para sa ila kabataan nga magbulagay na lang sila ukon mag-diborsio sangsa mag-upod sila pero pirme man nagaaway. Ano ang masami nga resulta?

•  Ano ang epekto sang pagbulagay sa kabataan?

•  Mangin mas malipayon bala ang akon bata kon magbulagay kami nga mag-asawa?

•  Matungdan ko bala gihapon ang akon responsibilidad bilang ginikanan bisan bulagay kami?

•  May mas maayo bala nga solusyon?

 Ginapakita sang research nga malain gid ang epekto sang pagbulagay sa kabataan. Ang kabataan nga may nagbulagay nga ginikanan mahimo:

•   mas madali maakig, mabalaka, kag madepres

•   indi maayo ang pamatasan

•   nagaka-failure sa eskwelahan ukon nagauntat na lang eskwela

•   madali magmasakit

 Dugang pa, madamo nga kabataan ang nagabasol sang ila kaugalingon sa pagbulagay kay nagapensar sila nga sila ang rason sini, ukon may nahimo pa sila kuntani para indi magbulagay ang ila ginikanan.

 Ang malain nga resulta sang pagbulagay sa kabataan mahimo magpadayon asta mag-adulto sila, nga sa masami, nagakadulaan sila sing kompiansa sa kaugalingon kag pagsalig sa iban. Kag mas daku ang posibilidad nga magbulag man sila sa ila tiayon sa ulihi kon makaatubang sila sing problema sa pag-asawahay.

 Ang punto: Bisan pa ginasiling sang iban nga tawo nga ang pagbulagay para sa kaayuhan sang kabataan, suno sa research indi ini matuod. “Mangin miserable ang kabuhi sang kabataan bangod sa diborsio,” siling sang eksperto sa pag-atipan sa kabataan nga si Penelope Leach. a

 Prinsipio sa Biblia: ‘Pangitaa ninyo indi lamang ang inyo personal nga kaayuhan, kundi ang iya man sang iban.’—Filipos 2:4.

 Ang iban nagasiling nga huo. Pero dumduma, sa masami, ang kinahanglanon sang ginikanan indi pareho sa kinahanglanon sang bata. Ang isa nga nagapensar nga magbulag, gusto nga magbag-o ang iya kabuhi. Pero ang kalabanan nga bata indi gusto nga magbag-o ang ila kabuhi kag gusto nila nga mag-upod gihapon ang ila mga ginikanan.

 Pagkatapos nga mausisa ang parte sa linibo ka diborsio, ang mga author sang libro nga The Unexpected Legacy of Divorce nagsulat: “Isa lang ang maathag: wala nagsiling ang kabataan nga mas malipayon sila. Kundi, nagsiling sila, ‘Sang ang akon mga ginikanan nagbulagay, nadula man ang akon kalipay.’” Ang libro nagdugang nga para sa ila ang kalibutan “indi na masaligan, kay bisan ang pinakasuod nga relasyon sa tunga sang duha ka tawo nga malapit sa ila, wala na sing seguridad.”

 Ang punto: Sa masami, wala nalipay ang kabataan pagkatapos magbulagay ang ila mga ginikanan.

 Prinsipio sa Biblia: “Ang nadugmok nga espiritu nagaubos sang kusog.”—Hulubaton 17:22.

 Ang iban nga ginikanan nga nagbulagay nagatinguha gihapon nga tungdan ang ila responsibilidad sa pagpadaku sang ila bata, nga daw mag-asawa lang sila gihapon. Pero, mabudlay ini himuon. Ginapakita sang research nga ang nagbulagay nga mga mag-asawa sa masami:

•   mas diutay ang tion para sa ila kabataan

•   indi pareho ang ginatudlo sa ila kabataan

•   ginapagustuhan lang ang kabataan kay ginakonsiensia sila sa natabo ukon kapoy na sila

 Ang bata nga nagbulagay ang ginikanan mahimo magbatyag nga indi niya kinahanglan mamati sa iya ginikanan, kay ang iya gani mga ginikanan wala nagtuman sa ila promisa nga mag-unong sa isa kag isa. ‘Ngaa mamati ko sa ila?’ mahimo irason sang bata.

 Ang punto: Mabudlay sa mag-asawa nga nagbulagay nga tungdan ang ila responsibilidad bilang ginikanan. Pero ini nga sitwasyon, mas mabudlay para sa kabataan.

 Prinsipio sa Biblia: “Indi ninyo pagpaakiga ang inyo mga anak, agod indi sila maluyahan sing buot.”—Colosas 3:21.

 Mas maayo nga panikasugan gid sang mag-asawa nga pabakuron ang ila pag-asawahay. Kay mas mabudlayan sila sa pagsugod sang ila bag-o nga kabuhi kon magbulagay sila. “Kon may problema ang pag-asawahay, indi buot silingon nga indi na gid ini masolbar,” siling sang libro nga The Case for Marriage. “Sang ulihi, ang mga mag-asawa nga may mga problema pero wala nagbulagay, nangin mas malipayon.” Sa kabilugan, mas maayo ang epekto sa kabataan kon ang ila ginikanan indi magbulagay.

 Pero indi buot silingon nga indi na gid puede ang pagdiborsio ukon pagbulagay. Ang matuod, ginatugutan sang Biblia ang pagdiborsio kon ang isa nakahimo sang seksuwal nga imoralidad. (Mateo 19:9) Pero, ang Biblia nagsiling man nga “ang tawo nga maalamon nagabinagbinag sang tagsa niya ka tikang.” (Hulubaton 14:15) Gani kon may problema ang mag-asawa kag nagaplano nga magbulagay, dapat hunahunaon nila sing maayo ang ila desisyon, lakip na ang epekto sini sa ila kabataan.

 Siempre, may mas maayo pa nga solusyon. Ang Biblia nagahatag sang pinakamaayo nga laygay sa mga bana kag asawa para mapakita nila ang mga kinaiya nga kinahanglanon para magdugay kag mangin malipayon ang ila pag-asawahay. Natural lang ini, kay ang Awtor sang Biblia, si Jehova, amo ang naghimo sing kahimusan sa pag-asawahay.—Mateo 19:4-6.

 Prinsipio sa Biblia: “Ako si Jehova nga imo Dios, ang nagatudlo sa imo para sa imo kaayuhan.”—Isaias 48:17.