Ginhambalan ka na bala sang imo bana ukon asawa nga nabalaka sia sa imo pag-inom sang alkohol? Kon huo, ari ang pila ka punto nga puede mo binagbinagon.

Sa sini nga artikulo

•  Ang malain nga epekto sang pagpahubog sa inyo pag-asawahay

•  Nangin palainom ka na bala sang alkohol?

•  Akua nga may problema ka sa pag-inom sang alkohol

•  Ang puede mo himuon

 Ang pagpahubog puede magresulta sa sarisari nga masakit, pareho sang balatian sa tagipusuon, cirrhosis sa atay, kag kanser. Pero wala lang ini nagaresulta sa mga problema sa panglawas; kundi nagapalala man ini sang mga problema sa pag-asawahay pareho sang pagpanakit sa miembro sang pamilya, kapigaduhon, pagluib, kag mahimo pa gani magresulta sa pagdiborsio.

 Ang Biblia nagasiling nga ang pagpahubog, ‘nagapangagat kaangay sang man-ug, kag nagapagua sang hilo kaangay sang dalitan nga man-ug.’ (Hulubaton 23:32) Paano mo mabal-an nga nangin palainom ka na sang alkohol?

 Makabulig sa imo ang masunod nga mga pamangkot para mabal-an kon nangin palainom ka na sang alkohol:

•   Nabudlayan ka bala magkontrol sang imo pag-inom sang alkohol?

•   Pirme mo bala ginapensar kon san-o ka naman liwat makainom sang alkohol?

•   Nagainom ka bala gihapon sang alkohol bisan pa nagaresulta ini sang mga problema sa imo kabuhi lakip na sa inyo pag-asawahay?

•   Nagalain bala ang imo pamatyag kon indi ka makainom sang alkohol?

•   Nagabaisay bala kamo nga mag-asawa bangod sang imo pag-inom sang alkohol?

•   Mas madamo na bala ang imo ginainom nga alkohol subong sangsa nagligad?

•   Sekreto ka bala nga nagainom sang alkohol ukon nagatago sang ilimnon sa inyo balay ukon sa imo ulubrahan?

 Kon huo ang imo sabat sa isa ukon sa pila sini nga mga pamangkot, mahimo nga nangin palainom ka na sang alkohol. Posible man nga nangin alcoholic ka na.

 Ginhambalan ka na bala sang imo bana ukon asawa nga nabalaka sia sa imo pag-inom sang alkohol? Mahimo nga nagasiling ka nga daw indi man problema ang imo pag-inom sang alkohol ukon nagarason ka sa iya. Posible ginabasol mo man ang iban, pati na ang imo asawa ukon bana, kag nagasiling nga:

•   “Kon maayo lang tani ang imo pagtratar sa akon, indi ko mag-inom.”

•   “Kon maagyan mo ang stress sa akon obra, mainom ka man.”

•   “Mas damo pa gani mag-inom ang iban sangsa akon.”

 Kon amo sina ang imo ginasiling, ginapakita sini nga posible mas importante para sa imo ang pag-inom sang alkohol sangsa mangin malipayon ang inyo pag-asawahay. Pero sa banta mo, ano dapat ang mas importante?

 Prinsipio sa Biblia: “Ang lalaki nga may asawa nagakabalaka . . . bangod luyag niya pahamut-an ang iya asawa.”—1 Corinto 7:33.

•   Pamatii sing maayo ang kabalaka sang imo bana ukon asawa. Bisan pa daw nasobrahan lang sia, puede ka gihapon makahimo sang mga pagbag-o. Kon indi mo ini mahimo, kag nagainom ka gihapon bisan pa nagalalain ang imo bana ukon asawa, ebidensia ini nga may problema ka na sa pag-inom sang alkohol.

   Prinsipio sa Biblia: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

•   Tun-i ang mga puede mo himuon. Para magdaug sa inaway, dapat mabal-an sang isa ka soldado ang mga taktika sang iya kaaway. Amo man sina ang dapat mo himuon para madaug ang imo kaaway. Dapat mo tun-an kon ano ang problema sa pag-inom sang alkohol kag kon paano sini ginasiod ang mga tawo. Dapat mo man mabal-an kon ano ang himuon mo para makauntat sa pag-inom sang alkohol kag malikawan nga magbalik sa sini nga bisyo.

   Prinsipio sa Biblia: “Padayon kamo nga maglikaw sa undanon nga mga kailigbon, nga nagapakig-away sa inyo.”—1 Pedro 2:11.

•   Magpabulig. Madamo sang mga medical program nga para sa mga alcoholic. May ara man sang mga recovery program, treatment center, kag mga ospital. Puede ka man magpabulig sa isa ka hamtong nga abyan para mabal-an mo kon ano ang iban pa nga mga rason kon ngaa nangin alcoholic ka. Dayon tawgi ini nga abyan kon pamatyag mo gusto mo liwat mag-inom sang alkohol.

   Prinsipio sa Biblia: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

 Mabudlay gid nga problema ang pagpahubog. Indi ini madali masolbar paagi lang sa pagbasa sang isa ka malip-ot nga artikulo, ukon sa pagsiling nga, “Haganhaganon ko lang ang pag-inom sang alkohol.” Pero, dapat mo gid mabal-an nga ang imo pilion nga solusyon indi lang makaapekto sa imo panglawas kundi sa inyo man pag-asawahay.

 Para sa dugang nga impormasyon: Basaha ang masunod nga mga artikulo para mabal-an mo kon ano ang ginhimo sang iban para mauntatan nila ang pagpahubog.

 “Indi Na Ako Mapintas”

 “Wala Ko Na Ginakahuya ang Akon Kaugalingon”

 “Sa Kalye Ako Nag-istar”

 Dayon tan-awa man ang video nga ‘Ginakapoy Na Ako sa Akon Kabuhi’