Natukiban sang iya asawa ang iya sekreto. Grabe gid ang iya pagpangayo sing pasensia. Nagpromisa sia nga mauntat na, kag nag-untat gid man sia pero kadali lang. Dayon ginliwat naman niya ini. Kon madakpan gani sia nagapangayo naman sia sing pasensia kag nagasulitsulit lang ini.

 Nagakatabo man bala ini sa imo? Kon huo, dapat maintiendihan mo kon ano ang ginabatyag sang imo asawa sa pagtan-aw mo sang pornograpiya kag kon paano mo mauntat ini nga bisyo kag indi na gid magliwat. a

Sa sini nga artikulo

•  Ang dapat mo mahibaluan

•  Ang puede mo himuon

•  Kon ang imo bana nagatan-aw sang pornograpiya

 Ang pornograpiya makaguba sang pag-asawahay. Posible nga bangod sini, maakig kag madula na ang pagsalig sang inosente nga tiayon sa iya asawa ukon bana. b

 Kon ang bana nagatan-aw sang pornograpiya, posible mabatyagan sang iya asawa ang masunod:

•   Ginluiban. Ang asawa nga si Sarah nagsiling, “Daw pareho lang nga sulitsulit nga nagpakighilahi ang akon bana.”

•   Manubo nga pagtan-aw sa kaugalingon. Ang isa ka asawa nagsiling nga bangod nagatan-aw sang pornograpiya ang iya bana pamatyag niya “malaw-ay sia kag manubo ang iya pagtan-aw sa iya kaugalingon.”

•   Nadulaan sang pagsalig. “Ginasuspetsuhan ko ang tanan nga hulag sang akon bana,” siling sang isa ka asawa nga si Helen.

•   Nabalaka. Ang asawa nga si Catherine nagsiling, “Grabe gid ang akon kabalaka sa bisyo sang akon bana nga daw diri na lang nakapokus ang akon atension.”

 Binagbinaga ini: Ang Biblia nagasiling nga dapat higugmaon sang bana ang iya asawa. (Efeso 5:25) Masiling bala nga palangga niya ang iya asawa kon bangod sa iya ginahimo nabatyagan sang iya asawa ang isa sa mga ginsambit sa ibabaw?

 Indi mahapos untatan ang bisyo nga pagtan-aw sang pornograpiya. “Gin-untatan sang akon bana ang pagpanigarilyo, pag-marijuana, kag pag-inom,” siling sang asawa nga si Stacey, “pero wala gid niya nauntatan ang pagtan-aw sang pornograpiya.”

 Kon amo man sina ang imo sitwasyon, ang masunod nga mga panugda makabulig sa imo nga mauntatan ini nga bisyo kag indi na gid magliwat.

•   Intiendiha kon ngaa malain ang pornograpiya. Bangod sang pornograpiya, himuon sang isa ang bisan ano nga makapalipay sa iya. Pero ginaguba sini ang gugma, pagsalig, kag katutom nga kinahanglan para sa malipayon nga pag-asawahay. Ginapakita man sini nga wala mo ginarespeto ang Ginhalinan sang pag-asawahay, si Jehova nga Dios.

   Prinsipio sa Biblia: “Dapat padunggan sang tanan ang pag-asawahay.”—Hebreo 13:4.

•   Batuna nga ikaw ang may salabton sa imo ginahimo. Indi magsiling nga, ‘Nagatan-aw man lang ako sang pornograpiya kay ang akon asawa indi mapinalanggaon.’ Indi gid insakto nga basulon mo ang imo asawa, kay himuon mo lang ina nga rason nga magtan-aw liwat sang pornograpiya kon may ginhimo ang imo asawa nga indi mo gusto.

   Prinsipio sa Biblia: “Ang kada isa ginatilawan kon ginaganyat sia kag ginahaylo sang iya kaugalingon nga kailigbon.”—Santiago 1:14.

•   Mangin honest sa imo asawa. Ang bana nga si Kevin nagsiling: “Wala gid ako sang ginatago sa akon asawa. Ginasugid ko sa iya kon may gintan-aw ako nga makatentar ukon kon ginlikawan ko ini. Gani, wala sia nagabatyag nga may ginatago ako sa iya.”

   Prinsipio sa Biblia: “Luyag namon magkabuhi sing bunayag sa tanan nga butang.”—Hebreo 13:18.

•   Pirme mangin alerto. Bisan pa malawig na nga tinuig nga nauntatan mo ini nga bisyo, puede gihapon ini magbalik. Si Kevin nga ginsambit kaina, nagsiling: “Gin-untatan ko ang pagtan-aw sang pornograpiya sa sulod sang pulo ka tuig kag abi ko indi na gid ini magbalik. Pero ini nga bisyo ara gihapon, kag daw monster nga nagakatulog kag puede mapukaw para mag-atake liwat.”

   Prinsipio sa Biblia: “Ang nagahunahuna nga nagatindog mag-andam nga indi sia matumba.”—1 Corinto 10:12.

•   Kon ginatentar ka, maghulat. Bisan pa indi mo mapunggan ang sala nga mga handum, puede mo pilion kon bala mapadaug ka sa sini ukon indi. Malipas lang ini nga handum, kag mas madali ini madula kon mamensar ka sang iban nga butang.

   Prinsipio sa Biblia: “Dapat mahibaluan sang kada isa sa inyo kon paano niya punggan ang iya kaugalingon nga lawas sa balaan kag dungganon nga paagi, indi sa makagod kag indi mapunggan nga kailigbon sa sekso.”—1 Tesalonica 4:4, 5.

•   Likawi ang sitwasyon nga makapukaw sang imo handum nga magtan-aw liwat. “Kon ara ka sa sitwasyon nga daw matentar ka na,” siling sang libro nga Willpower’s Not Enough, “daw pareho lang nga nagsindi ka sang palito. Bisan gamay lang nga gatong . . . magadaku na ang kalayo.”

   Prinsipio sa Biblia: “Kabay nga indi ako madaug sang kalautan.”—Salmo 119:133.

•   Indi madulaan sang paglaum. Kinahanglan ang malawig nga tion, kis-a tinuig pa gani, para mabalik ang pagsalig sa imo sang imo asawa. Pero madamo na nga mag-asawa ang nakahimo sini.

   Prinsipio sa Biblia: “Ang gugma mapinasensiahon.”—1 Corinto 13:4.