Madamo nga mag-asawa ang wala masyado nagaistoryahanay bisan pa updanay sila. Ano ang pila ka rason kon ngaa nagakatabo ini?

•  Indi suod bisan magkaupod—ngaa?

•  Ang puede mo himuon

•  Ang ginasiling sang iban nga mag-asawa

•  Bulig kon mag-istoryahanay kamo

•   Sobra nga kakapoy

   “Kon kaisa, may tion nga magkaupod kami sang akon bana, pero bangod kapoy na sia ukon kapoy ako, indi man kami gihapon makaistoryahanay. Kon kapoy ako, kadasig lang sa akon mainit, gani mas maayo nga magtan-aw na lang kami sing TV.”—Anna.

•   Nawili sa mga gadyet

   “Ang social media kag ang iban pa nga kalingawan sa Internet makaubos sang imo oras. Posible nga inoras ka na nga nagaatubang sa imo mga gadyet, pero wala mo maistorya ang imo asawa ukon bana. Daw pareho lang nga indi kamo updanay sa isa ka balay.”—Katherine.

•   Sarisari ang hilig

   “Madamo sing hilig ang akon bana, gani pagpauli niya halin sa iya obra amo ’na dayon ang iya himuon. Naintiendihan ko man nga dapat may tion gid sia sa iya kaugalingon kay ti, kapoy sia sa iya obra. Pero gusto ko gid tani nga damo kami sing oras para sa isa kag isa.—Jane.

•   Trabaho

   “Bangod may mga gadyet kami, bisan ara na kami kon kaisa sa amon balay, nagatrabaho kami gihapon. Tani oras ko na ’ni sa akon asawa, galing sige ako gihapon reply sa mga e-mail kag text sa akon trabaho.”—Mark.

•   Dumduma nga importante nga hatagan mo sing tion ang imo asawa ukon bana, indi kon san-o ka lang makalugar.

   Prinsipio sa Biblia: ‘Pat-ura ang mas importante nga mga butang.’—Filipos 1:10.

   Pamensari ini: Makita bala sa imo mga ginahimo nga mas importante sa imo ang inyo pag-asawahay sangsa imo trabaho ukon mga hilig? Ginahatagan mo lang bala sing oras ukon atension ang imo asawa ukon bana bangod kay wala ka na sang iban nga madumduman nga himuon?

   Tip: Indi paghulata kon san-o ka lang may tion para makaupod mo ang imo asawa ukon bana. Sa baylo, mag-iskedyul sing tion para mag-updanay kamo nga duha kag siguraduha nga makapokus kamo sa isa kag isa.

   “Nanamian gid ako kon may ginaplano ang akon bana nga himuon namon nga kami lang nga duha. Nabatyagan ko gid nga espesyal ako sa iya, kag gusto niya ako makaupod. Bangod sina, mas ginpalangga ko pa gid sia.”—Anna.

•   Kontrola ang paggamit mo sang imo gadyet.

   Prinsipio sa Biblia: “May tion para sa tagsa ka butang.”—Manugwali 3:1.

   Pamensari ini: Nagakadula bala ang imo pokus sa pagpamati sa imo asawa ukon bana kay gulpi lang may nag-text sa imo?

   Tip: Panikasugi nga magkaon kamo sing magkaupod bisan isa lang ka bes kada adlaw. Kahigayunan ninyo ini nga istoryahan ang mga natabo sa inyo sa bilog nga adlaw. Gani indi pag-itupad ang imo cell phone samtang nagakaon kamo.

•   Kon posible, mag-updanay kamo sa pagpamalaklon ukon sa paghimo sang mga ulubrahon sa balay.

   Prinsipio sa Biblia: “Ang duha mas maayo sangsa isa, bangod may mas daku nga kaayuhan ang ila pagpangabudlay.”—Manugwali 4:9, footnote.

   Pamensari ini: Naanad bala kamo nga indi kamo updanay nga duha kon nagahimo sang mga ulubrahon para sa inyo pamilya, pareho sang pagpamalaklon?

   Tip: Mag-updanay kag magbuligay, bisan sa mga ulubrahon nga masarangan sang isa lang ka tawo.

   “Imbes nga pamensaron nga ang pag-grocery, pagpanghugas sing pinggan, pagpamiod sing bayo, ukon pagpanggarden mga ulubrahon sa balay, pamensara nga kahigayunan mo na ini nga makaupod ang imo asawa ukon bana.”—Nina.

•   Indi magpaabot sing sobra.

   Prinsipio sa Biblia: “Ipakita sa tanan . . . ang inyo pagkamakatarunganon.”—Filipos 4:5.

   Pamensari ini: Ano ang himuon mo para indi ka magpaabot sing sobra sa imo asawa ukon bana?

   Tip: Mag-istoryahanay kamo nga duha para mabal-an ninyo kon ano ang gusto sang kada isa. Istoryahi ninyo kon ano ang himuon ninyo nga pareho kamo nga malipay.

   “Mapagsik ang akon bana, pero ako naman ’ya pirme lang nagamasakit. Pirme ko sia ginahambalan nga maggua kag himuon kon ano ang gusto niya, kag hulaton ko lang sia sa balay. Nagatener ako sa balay kay kinahanglan ko magpahuway, samtang sia kinahanglan ’ya naman maggua para maka-exercise. Nalipay kami nga duha kay mahimo namon ang gusto namon himuon.”—Daniela.

 Una, binagbinaga ang masunod nga mga pamangkot nga ikaw lang. Dayon, istoryahi ninyo nga mag-asawa ang inyo mga sabat.

•   Sa banta mo, bastante na bala ang oras nga ginahatag mo subong sa imo asawa ukon bana?

•   Ano nga panikasog ang ginahimo sang imo asawa ukon bana para makaupdanay kamo nga duha, nga dapat mo gid pasalamatan?

•   Ano pa gid ang gusto mo nga himuon sang imo asawa ukon bana?

•   Wala ka bala pirme nagapokus sa ginasiling sang imo asawa ukon bana kay nawili ka sa imo gadyet?

•   Ano ang himuon ninyo para indi kamo magpaabot sing sobra sa isa kag isa?

•   Sa sini nga semana, ano ang puede himuon sang kada isa sa inyo para mas makaupdanay kamo pirme kag makapokus sa isa kag isa?