Sadto, nagapati ang mga scientist nga ginakuha sang dila sang hummingbird ang nektar paagi sa puersa nga nagapasaka sang fluid sa magagmay nga mga tube. Ini nga proseso ginatawag nga capillary action. Pero, natun-an sang mga scientist nga nagagamit ini nga pispis sang mas epektibo nga paagi, isa ka proseso nga ginatawag “fluid trap.”

 Binagbinaga: Kon magsawsaw ang dila sang hummingbird sa nektar, ang dila sini nagatunga, nga nagaporma sang duha ka sanga. May mga giha ang tagsa ka sanga sang dila sini. Ini nga mga giha may mga slit nga puede mag-abre kag magsirado. Kon ang dila magsawsaw sa nektar, nagasanga ini, kag nagaabre ang mga giha sa sini, gani makakuha sang nektar ang pispis paagi sa pagdilap, imbes nga pagsuyop pareho sang paggamit sang straw. Kon butungon liwat sang hummingbird ang dila sini, kabaliskaran naman ang nagakatabo. Nagasirado ang mga giha amo nga madala sang pispis ang nektar nga na-trap sa dila sini.

 Ini nga proseso nagakatabo sing “mas madasig pa sa isa ka pisok,” siling sang mga researcher nga sanday Alejandro Rico-Guevara, Tai-Hsi Fan, kag Margaret Rubega. Nagsiling pa sila: “Ang punta sang dila epektibo gid mag-trap sang fluid kag awtomatik nga nagabag-o . . . ang korte kon magsawsaw ini sa fluid.”

 Dugang pa, ini nga proseso mahimo sining gamay nga pispis nga wala nagagamit sang enerhiya. Kay man, ang punta sang dila sang hummingbird nagaabre kag nagasirado bilang reaksion sa komplikado nga mga puersa kon magsawsaw ang dila sa fluid kag kon butungon ini liwat sang pispis.

 Bangod epektibo gid nga fluid trap ang dila sang hummingbird, nagapati ang mga researcher nga ang natun-an nila sa sini puede nila magamit sa medisina, robotics, kag sa iban pa. Basi makabulig pa ini sa pagdesinyo sang mga gamit para sa pagtipon sang tubig ukon pagtinlo sang mga oil spill.

 Ano sa banta mo? Ang komplikado bala nga dila sang hummingbird resulta sang ebolusyon? Ukon gindesinyo ini?