Madugay na nga natalupangdan sang mga zoologist nga mabakod gid ang pagtapik sang mga tagimtim sa mga bato, pier, kag mga kasko sang barko. Kay man, ang kula sang tagimtim mas mabakod sangsa kula nga ginahimo sang tawo. Dugang pa, ang mga tagimtim makatapik sa basa nga mga butang kag bag-o lang nadiskobrehan sang mga sientipiko kon paano ini mahimo sang mga tagimtim.

 Binagbinaga: Base sa mga pagtuon, ang makalangoy na nga boto sang tagimtim nagapangita anay sang lugar nga puede sini tapikan kag dayon ginapili sini ang pinakamaayo. Kon ining boto sang tagimtim makapili na, nagapagua ini sing duha ka kemikal. Ang una amo ang mantikaon nga kemikal nga nagapamala sa lugar nga tapikan sini. Ini nga kemikal magahanda man sini nga lugar para sa ikaduha nga kemikal nga ipagua sang tagimtim, nga human sa mga protein nga ginatawag phosphoproteins.

 Kon magtingob na ining duha ka kemikal magaporma ini sing mabakod nga kula nga indi maguba bisan sang mga bakterya. Ini nga kula importante gid kay ang tagimtim magatapik sa sina nga lugar tubtob buhi ini.

 Ang proseso sang tagimtim sa paghimo sang kula mas komplikado sangsa ginhunahuna sang mga scientist sang una. Ang isa sa mga scientist nga nakadiskobre sini nga proseso nagsiling: “Ining dalayawon kag natural nga pamaagi makasolbar gid sang problema kon paano makatapik sa basa nga butang.” Ang resulta sini nga pagtuon mahimo makabulig sa mga researcher nga makahimo sing mga kula nga magamit sa idalom sang tubig, pati na sang mga synthetic nga kula halin sa natural nga mga butang para gamiton sa electronics kag mga medical implant.

 Ano sa banta mo? Ang kula sang tagimtim resulta bala sang ebolusyon? Ukon gindesinyo ini?