Madugay na nga interesado ang mga scientist sa mapilit nga likido, ukon hydrogel, nga ginapagua sang hagfish. Ngaa? Bangod ang hydrogel sang hagfish isa sa “pinakamahumok kag nagainat nga nakilal-an nga biomaterial.”

 Binagbinaga: Ang hagfish isa ka klase sang isda nga daw pareho sa sili kag nagaistar ini sa pinakaidalom nga bahin sang dagat. Kon may gusto maghalit ukon magkaon sini, nagapagua ang hagfish sing daw gel nga likido. Ang likido may mga protein nga nagapapilit sang tubig kag may linibo pa gid ka sahi sang protein nga daw malaba nga mga hilo. Kon magsamo ini nga mga protein, ang tubig sa palibot sang hagfish nagapilit kag nagadanlog. Dayon, ining mapilit kag madanlog nga likido nagabara sa hasang sang gusto maghalit ukon magkaon sa hagfish. Bilang resulta, ginaluad ukon ginasuka na lang nila ang hagfish kag magpalagyo.

 Pinasahi gid ang hydrogel nga ginapagua sang hagfish. Ang kada protein sini mas manipis pa sangsa aton buhok sing ginatos ka beses, pero mas mabakod ini sangsa nylon sing napulo ka beses. Kon magsamo sa tubig sang dagat ining mapilit kag madanlog nga likido kag ang daw hilo nga mga protein sini, nagaporma ini sing daw mahumok nga salaan. Ini makadala sing tubig nga 26,000 ka beses sangsa bug-at sini. Ang matuod, ining mapilit kag madanlog nga likido halos puro tubig!

 Indi masarangan ilugon sang mga scientist ang hydrogel sang hagfish. Siling sang isa ka researcher, “Masibod katama ini.” Pero, ginatinguhaan nila nga maghimo sing pareho sining daw hilo nga mga protein paagi sa bacteria. Ang ila tuyo, maghimo sing mamag-an, indi dali magisi, nagainat, kag madali madunot nga materyales. Kon masunod nila ining daw hilo nga mga protein, makahimo sila sing mga tela kag gamit para sa mga doktor. Kag indi lang ina, madamo pa gid sila sang puede gamitan sini.

 Ano sa banta mo? Ang masibod katama nga desinyo sang mapilit kag madanlog nga likido nga ginapagua sang hagfish resulta bala sang ebolusyon? Ukon gindesinyo ini?