GINDESINYO BALA INI?

Ang Ikasarang sang mga Cell nga Magpasibu Para Mangin Sarisari nga Bahin sang Lawas

I-PLAY

Sang ginbusong ka, ang imo kabuhi nagsugod sa isa ka magamay nga cell nga ginatawag zygote, nga makita lang paagi sa microscope. Pero pagligad sang pila ka bulan, natawo ka bilang isa ka lapsag. Atong isa ka cell, natunga kag nahimo nga sobra 200 ka klase nga cell nga sarisari ang korte, kadakuon, kag function.

Binagbinaga: Ginakopya sang zygote ang iya kaugalingon nga DNA kag nagatunga ini sa duha. Dayon, ini nga pagtungatunga sulitsulit nga nagakatabo sing madamo nga beses. Sa umpisa, ang tanan nga bag-o nga cell pareho sing hitsura. Kag sa ila DNA, nasulat ang tanan nga instruksion nga kinahanglanon para maghimo sang tanan nga klase sang cell.

Isa ka semana sa tapos magkitaay ang egg cell kag sperm cell, ang mga cell mangin duha ka klase. Ang isa ka klase mangin sibudbod ukon embryo, samtang ang isa pa mangin inunlan ukon placenta kag iban pa nga mga tissue nga makabulig sa pagtubo sang embryo.

Sa ikatlo nga semana, ang mga cell sa embryo nagagrupo sa tatlo ka klase. Ang sa naibabaw nga bahin mangin mga ugat, utok, baba, panit, kag iban pa nga mga cell. Ang mga cell naman sa tunga nga bahin mangin dugo, tul-an, batobato ukon kidney, maskulo, kag iban pa nga mga tissue. Kag ang mga cell sa nasulod nga bahin mangin mga internal organ, pareho sang baga, barukan ukon bladder, kag mangin kalabanan nga bahin sang digestive system.

Samtang naga-develop ang wala pa matawo nga lapsag, ang mga cell nahimo nga sobra sa 200 ka sarisari nga klase sang mga cell

Sa tion sang pagbusong, ang pila sining mga cell nagasaylo sing isahanon ukon bilang grupo, halin sa isa ka bahin sang embryo pakadto sa iban nga mga bahin. Ang iban nga mga cell nagagrupohay kag nagaporma nga mga sheet ukon nagapilo para mangin mga cord ukon cavity. Para mahimo ini nga proseso kinahanglan nga magbuligay sing maayo ang mga cell. Halimbawa, may mga bes nga ang mga sheet sang mga cell nagalukot kag mangin magagmay nga mga tubo. Dululungan ini nga nagakatabo sa sarisari nga bahin sang embryo. Dayon nagalaba ining mga tubo kag nagapangalapkap, kag magasugponsugpon kag mangin kompleto nga circulatory network.

Sa tion nga matawo ang isa ka healthy nga lapsag, ang binilyon sini nga mga cell, nagpasibu na para mangin sarisari nga bahin sang lawas, sa insakto nga lokasyon, kag sa insakto nga tion.

Ano sa banta mo? Ang ikasarang bala sang mga cell nga magpasibu para mangin sarisari nga bahin sang lawas resulta sang ebolusyon? Ukon gindesinyo ini?