Ang malleefowl sang southern inland Australia nagamentinar sang temperatura sang pugad sini nga indi magnubo ukon magtaas sangsa duha ukon tatlo ka degree sa 34 degrees Celsius. Paano mamentinar sang sini nga pispis ini nga temperatura adlaw kag gab-i sa bilog nga tuig?

 Kada winter nagakutkot ini nga mga pispis sing daku nga buho nga mga isa ka metro ang kadalumon kag tatlo ka metro ang kalaparon. Ginapuno ini sang laki nga pispis sing mga hilamon, dahon, kag iban pa nga mga tanom. Sa tapos mabasa ang tinumpok nga mga tanom sang ulan sa hingapusan sang winter, ginabuhuan sang laki nga pispis ang tinumpok para butangan sang mga itlog. Dayon ginatabunan niya ang bilog nga buho sang balasbalason nga duta. Sa indi madugay, ang mga tanom nagakadunot kag nagainit, kag mangin pareho sa isa ka incubator.

 Sa kada tion nga handa na mangitlog ang bayi nga pispis, ginakahig sang laki nga pispis ang duta para mabutang sang bayi nga pispis ang itlog sa buho. Dayon ginatabunan liwat sang duta sang laki nga pispis ang tinumpok. Mahimo makapangitlog ang bayi nga pispis sang asta 35 ka itlog halin sa Septiembre asta sa Pebrero. a

 Pirme ginalubong sang mga pispis ang ila tuktok sa balas para mabal-an nila ang temperatura sini. Dayon gina-adjust nila ang tinumpok depende sa season. Halimbawa:

•   Sa tion sang spring, kon ang temperatura sang pugad nagainit gid bangod sang nagakadunot nga mga tanom, ginapabugnaw ini sang laki nga pispis paagi sa pagkahig sang duta sa ibabaw sang buho nga may mga itlog. Pagkadugaydugay, ginatabunan niya ini liwat sang nagbugnaw nga duta.

•   Kon summer, ginadugangan sang laki nga pispis ang duta sa ibabaw sang tinumpok para indi mainitan ang mga itlog bangod sa adlaw. Pero pagkaaga, ginakahig niya ang duta kag ginabalik ini liwat kon magbugnaw na ang pugad kag ang balas.

•   Kon autumn kag tapos na ang pagkadunot sang mga tanom sa tinumpok, ginakahig sang laki nga pispis ang halos tanan nga duta, para mapainit sang adlaw ang mga itlog kag ang naglapta nga duta. Dayon, ginatabunan niya liwat ang tinumpok sang napainitan nga duta para mainitan ang itlog kon gab-i.

 Sa aberids, ang laki nga pispis nagapangahig sing sobra lima ka oras para masaylo ang 850 ka kilo nga duta kada adlaw. Ang pirme nga pagkahig sa duta may ara sang dugang pa nga benepisyo: Ginapabilin sini nga buhaghag ang duta, para mahapos sa mga piso nga maggua sa tinumpok kon magboto na sila.

 Ano sa banta mo? Ang ikasarang bala sang malleefowl nga kontrolon ang temperatura sang pugad sini resulta sang ebolusyon? Ukon gindesinyo ini?