May naluyagan ka, kag nagdesisyon kamo nga mag-date para mabal-an ninyo kon madayunay kamo sa ulihi. Ano ang mapaabot mo kon naga-date na kamo?

Sa sini nga artikulo

•  Paabuta nga istoryahan ninyo ang serioso nga mga butang

•  Paabuta nga indi pareho ang inyo opinyon

•  Paabuta nga mangin stressful ang pag-date

 Makilala mo sing maayo ang imo gina-date kag makilala ka man niya kay pirme na kamo nagaupdanay. Mabal-an mo ang pila ka butang parte sa iya paagi sa pag-obserbar.

 Pero may pila ka butang nga dapat gid ninyo istoryahan kag dapat mangin honest kamo. Gani samtang ginaistoryahan ninyo ini, indi pagtuguti nga magpangibabaw ang imo balatyagon sa imo hunahuna.

 Mga dapat ninyo istoryahan:

•   Kuarta. May utang ka bala? Nabudlayan ka bala nga kontrolon ang imo paggasto? Kon magpakasal na kamo, ano ang inyo desisyon kon parte sa inyo income kag mga galastuhan?

•   Panglawas. Maayo bala ang imo panglawas? May ara ka bala malala nga balatian sang una?

•   Goal. Ano ang gusto mo nga malab-ot sa imo kabuhi? Ang imo bala goal pareho man sa goal sang imo gina-date? Kon mag-asawahay na kamo, mangin malipayon ka bala gihapon bisan indi mo malab-ot ang imo goal bangod sa inyo nga sitwasyon?

•   Pamilya. May obligasyon ka bala sa imo pamilya subong? May obligasyon ka bala sa imo pamilya sa ulihi? Gusto bala ninyo magbata? Kon huo, pila ka bilog?

 Kon istoryahan ninyo ining serioso nga mga butang, dapat mangin honest kamo. Indi pagtagua ukon patikua kon ano ang matuod para lang manamian sia sa imo.—Hebreo 13:18.

 Pamensari ini: Ano ang dapat mo mabal-an parte sa imo gina-date? Ano naman ang dapat niya mabal-an parte sa imo? Kon subong pa lang honest na kamo sa isa kag isa, ano ang benepisyo sini kon mag-asawahay na kamo sa ulihi?

 Prinsipio sa Biblia: “Ang tagsatagsa dapat magsugid sing matuod sa iya utod.”—Efeso 4:25, Maayong Balita nga Biblia.

 “Basi nagapamensar ang babayi nga, ‘Pagkatapos sang anom ka bulan, mapakasal na kami,’ pero basi para sa lalaki pagkatapos pa sang isa ka tuig. Kon amo sini ang matabo, basi masakitan ang babayi bangod naga-expect sia nga mapakasal na sila dayon. Importante gid nga nagaintiendihanay kamo nga duha parte sa sini nga butang.”—Ariana, kasal na sa sulod sang isa ka tuig.

 Wala sing duha ka tawo nga pareho. Gani indi magpensar nga pareho kamo pirme sang opinyon kag ginabatyag. Halimbawa, ang kultura kag ang pagpadaku sa inyo may epekto gid sa inyo pagtan-aw sa mga butang.

 Pamensari ini: Kon indi pareho ang inyo pagtan-aw sa magagmay nga mga butang, handa bala kamo nga magpaiway para may kalinong kamo kon wala man lang sang nalapas nga prinsipio sa Biblia?

 Prinsipio sa Biblia: “Ipakita . . . ang inyo pagkamakatarunganon.”—Filipos 4:5.

 “Bisan pa pamatyag mo ‘perfect match’ gid kamo, indi sa tanan nga tion pareho ang gusto n’yo. Maayo man nga compatible kamo, pero mas importante ang ginapakita ninyo nga mga batasan kon indi pareho ang inyo opinyon.”—Matthew, kasal na sa sulod sang lima ka tuig.

 Ang pag-date nagakuha sang imo daku nga tion gani posible ma-stress ka. Ano ang makabulig sa imo?

 Magbutang sang limitasyon. Indi magpatama sa pag-date kay basi indi mo na mahimo ang imo mga responsibilidad ukon mapabay-an mo na ang imo mga friend. Si Alana, nga lima ka tuig na nga nakasal, nagsiling: “Kinahanglan mo gihapon ang imo mga friend bisan may bana ukon may asawa ka na, kag kinahanglan ka man nila. Gani indi sila pagkalimti bangod lang naga-date ka na.”

 Dumduma nga kon mamana ukon mangasawa ka na, kinahanglan mo balansehon ang tanan nga bahin sang imo kabuhi. Gani, maayo nga umpisahan mo na ini subong samtang naga-date ka pa lang.

 Pamensari ini: Naga-demand ka bala sang sobra nga tion kag atension sa imo gina-date? Pamatyag mo naga-demand bala sia sini sa imo? Paano ninyo balansehon ang inyo relasyon para wala sing isa sa inyo ang magbatyag nga ginakapoy na ukon daw ginakuga?

 Prinsipio sa Biblia: “May tion para sa tagsa ka butang, may tion para sa tagsa ka hilikuton.”—Manugwali 3:1.

 “Kon ang naga-date nagaupdanay sa paglingawlingaw lang, basi makibot sila kon mag-asawahay na sila. Mas maayo nga nagaupdanay sila sa paghimo sang mga hilikuton kada adlaw pareho sang pagpang-grocery, paghimo sang mga ulubrahon sa balay, kag pagsimba. Makabulig ini sa ila nga mangin mabakod ang ila pag-asawahay sa ulihi.”—Daniel, kasal na sa sulod sang duha ka tuig.

 Dumduma nga indi asta san-o maga-date lang kamo. Magaabot gid ang tion nga magadesisyon ka kon bala pakaslan mo sia ukon indi. Buligan ka sang bahin 3 sini nga serye kon ano ang dapat mo binagbinagon sa paghimo sina nga desisyon.