Halos tanan nga pamilya may mga pagsulundan. Ang pila sini amo ang curfew, paggamit sing gadyet, kag pamatasan.

 Ano abi kon wala mo matuman ang pagsulundan sang imo pamilya? Indi mo mabag-o ang natabo, pero may mahimo ka para indi ini maglala. Ipakita sa imo sini nga artikulo kon paano mo ini himuon.

•  Kon ano ang indi dapat himuon

•  Mas maayo nga himuon

•  Ang ginasiling sang iban

•   Kon wala nakahibalo ang imo mga ginikanan nga wala mo matuman ang pagsulundan, posible nga matentar ka nga taguon ini.

•   Kon nakahibalo sila, posible nga matentar ka nga mangita sang balibad ukon sang balasulon.

 Pareho ini nga indi maayo. Ngaa? Bangod ang pagtago sini ukon pagpangita sang balibad binatabata. Ginapakita sini sa imo mga ginikanan nga indi ka pa hamtong.

 “Ang pagbinutig indi gid maayo nga solusyon. Sa ulihi, magua gid ang matuod, kag sobra pa ang disiplina nga mabaton mo sangsa nanugid ka na lang nga daan.”—Diana.

•   Akua ang imo nahimo. Ang Biblia nagsiling: “Ang tawo nga nagatago sang iya sala indi magmadinalag-on.” (Hulubaton 28:13) Nakahibalo ang imo mga ginikanan nga indi ka perpekto. Gani, nagapaabot sila nga manugid ka sing matuod.

   “Mas mangin maluluy-on ang imo mga ginikanan kon manugid ka sing matuod. Kon wala ka sing gintago, saligan ka pa gid nila.”—Olivia.

•   Mangayo sing pasaylo. Ang Biblia nagsiling: “Mangin mapainubuson.” (1 Pedro 5:5) Kinahanglan mo ang pagkamapainubuson para magsiling “Pasayluha ako” kag indi na mangita sing balibad.

   “Ang mga tawo nga pirme nagapangita sang balibad nagahabol ang konsiensia. Sa ulihi, wala na sila ginakonsiensia bisan may nahimo sila nga malain.”—Heather.

•   Batuna ang indi maayo nga resulta. Ang Biblia nagsiling: “Pamatii ang akon disiplina.” (Hulubaton 8:33) Indi magkumod, kag batuna ang disiplina sang imo mga ginikanan.

   “Kon reklamo ka nga reklamo, nagadugang pa gid ang disiplina. Tinguhai nga batuna ini, kag indi magpokus sa mga restriksion.”—Jason.

•   Panikasugi nga makuha liwat ang ila pagsalig. Ang Biblia nagsiling: “Ubahon ninyo ang daan nga personalidad nga nahisuno sa inyo paggawi sadto.” (Efeso 4:22) Padayuna ang paghimo sing maayo nga mga desisyon para saligan ka liwat sang imo mga ginikanan.

   “Kon pirme mo ginahimo ang maayo nga mga desisyon kag ipakita sa imo ginikanan nga indi mo pagliwaton ang imo sala, sa ulihi saligan ka nila liwat.”—Karen.

 TIP: Himua ang sobra pa sa ginapaabot nila sa imo para pamatud-an nga masaligan ka nila. Halimbawa, kon may laktan ka, pahibalua sila nga nagapapuli ka na bisan wala pa ang imo curfew. Paagi sini mahangpan nila nga luyag mo nga saligan ka nila liwat.